Read Kahua 2 SAMUELE 6 Bible Online

2 SAMUELE 6 - Kahua bible

2 SAMUELE 6

¹O Tavite ki hagahakura nikâ na mane ni me ramo i Isiraele. Ngaira ka na 30,000 na mane ni me.

²Ngaia ki bêngenira tanga i Bala i Juta, hanana ga torea me tenia i ngekana na bokesi na suruheri iana God. Na Araha raramohaga hunia ki oga i avoraterua na angero gi rua. Ngaira ka banu i ruma iana o Abinataba.

³Ngaira ka mehura tenia na ruma iana o Abinataba igê na hungana ma ka naka igê na kati haoru. O Usa mo Agio vesina o Abinataba karu hagaotoa na kati. Tani ki nanago ma tani ki mumuri.

⁴O Agio ki nanago.

⁵O Tavite ma na Isiraelita hato ka mâmâ ma ka kiki ramo ngavê, hanana ga hagarahasia na Araha. Ngaira ka tarugigi na gita, na ukelele, na gogo ma ka ngarangaranigi na tete ma na marâ vigana.

⁶Matena ga tariha me igê na agua ni hatanga ni koni iana o Nakoni, ngairerua na puruka garu okea na kati, karu atobera. O Usa ki tagare râ ki têa na bokesi na suruheri.

⁷Ki parama na Araha God ma ki mangariaga tanga o Usa ma ki nahuia ki me, suria i pe hagahigasia. O Usa ki me i ngekana i na akerena na bokesi na suruheri.

⁸Tahema, haganega tenia ngekana ka hêtana na agua ngekana vi ‘Hagaitangiha tanga o Usa.’ O Tavite ki mangariaga ngavê, suria na Araha ki mangariaga ma ki hagaitangia o Usa.

⁹Vikana o Tavite ki magutenia na Araha ma ki tako ki vi: “Manga i he kanigê girara vigê torea na bokesi na suruheri?”

¹⁰Vikê ngaia ki pe torea tanga i Jerusaleme. Ngaia ki aharo tenia na tara ma ki torea râ i ruma iana o Obeti Etome na mane ni Gate.

¹¹Na bokesi na suruheri ki oga i ngekana surigi na hageha gi oru ma na Araha ki koro tangara o Obeti Etome ma na ahemata iana.

¹²O Tavite ki rongo, vi na Araha ki koro tanga na ahemata iana o Obeti Etome ma ki haganahunia renia na ramana, suria vi na bokesi na suruheri ki oga i pasina. Vikê ngaia ki torea na bokesi na suruheri tenia na ruma iana o Obeti ma ki torea râ i Jerusaleme, matena ga hagarahasia na tangiana ngekana.

¹³Matena na mane ga tugia na bokesi na suruheri ka tavo uga hageono, o Tavite ki vi pusira ka ura so ma ki kahu vogasia na Araha renirerua na puruka mane ma karena i binibinikaga.

¹⁴O Tavite ki hagesuru ma renia na gahu siki ma ki mâ raramohaga ngavê, hanana i hagarahasia na Araha.

¹⁵Vikana ngaia ma na Isiraelita hato ka meakê na bokesi na suruheri tanga i Jerusaleme, matena ga ngerengere vagevage ma ka uhigi na ahuri.

¹⁶Matena ga mebanu na bokesi na suruheri i hinua, ka Mikale ka karena o Saulo ki kirihi hura igê na mabaha. Ngaia ki bâsia na maneraha o Tavite i rekereke ma ki mâmâ tanga na Araha. Ngaia ki kitakita o Tavite.

¹⁷Matena ga mebanu hato na bokesi na suruheri i hinua, ngaira ka naka i rarona na ruma na gahu, o Tavite ki bani hagêrasia. Hemuri o Tavite ki susu tanga na Araha ma ki vogasia renigi na ngêra tanga na ngêra haku.

¹⁸Matena i susu ma ki vogasi hato, ngaia ki nungia na Araha raramohaga hunia, ki korokoro tangara na enoni.

¹⁹Hemuri o Tavite ki vutungira na enoni hato renigi na ngêra. Na ara ni mane ma na ara ni gete i Isiraele ki toregi na guana na bereti gi tage, na agua na ganiana ga hahia ma tani na guani na vaini. Hemuri ngaira hato ka hetake.

²⁰Matena o Tavite ki aporo i pasina, hanana vi bâsira na ahemata iana, ka Mikale ki hura me vurusia, ma ki vi: “I ngekê na atana na maneraha i Isiraele ki rongo raha! Ngaia ki hagesuru bera manga na beka i maata na kere gete tagara iata na kariana!”

²¹O Tavite ki arami, ki vi: “Inê kê mâ, hanana gê hagarahasia na Araha, i bani ateê kê maneraha urusira o vaemamu ma na apaparaha iana ma kê bêngenira na kariana na Isiraelita. Na mâha iaku, gê hagarahasia na Araha renia, ki asa vige page hato.

²²Inê kê ama ni hagamakiê mareku nga i maata na kere gete tagara go visira, hanana ngaira ka page takotako hagahigasiê!”

²³Ka Mikale ka karena o Saulo ki pe apara kare rârâ mataro me ki me.