Read Kahua 2 SAMUELE 7 Bible Online

2 SAMUELE 7 - Kahua bible

2 SAMUELE 7

¹Na maneraha o Tavite ki oga tonge i ruma raha iana ma ki ape tatara, suria na Araha ki anumasia tenira na merongana hato.

²Vikê na maneraha ki vi tanga na poropete o Natane, ki vi: “Bâ, inê kê oga igê na ruma raha na bagorani na apinige, ma na bokesi na suruheri iana God ki oga ma igê na ruma na gahu!”

³O Natane ki arami, ki vi: “Go katoa nga na tarana go takusia, suria na Araha ki ngahisigo.”

⁴Ma igê na bungiana ngekana na Araha ki vi tanga o Natane, ki vi: “Gu râ ma ku hagarongoa na maneraha o Tavite, vi inê kê vi vikê tanga:

⁵‘Gu kahu takusia vigo torea tangê na ruma ni rotu kê gâga igê? I bara!

⁶Haganega me tenia na matena gê hagatahira igê na Isiraelita tenia i Esipito mataro me i ngekê, inê kê pe oga rârâ igê na ruma ni rotu. Inê kê oga rârâ ma igê na ruma na gahu, matena gê arârâ.

⁷Igê na ara ni rârâha iaku henira na Isiraelita, inê kê pe nungia rârâ ta na hitangita na mane ni hagaotonga gê kasira, hanana vige tagarahia tangê na ruma ni rotu na bagorani na apinige.’

⁸“Gu hagarongoa na kariaku o Tavite, vi inê na Araha raramohaga huniê, kanigê vi vikê tanga: ‘Inê ma kê torego hura tenia na bâsuriana ni sipi igê na bena ma kê kasigo ko bêngenira na kariaku na Isiraelita.

⁹Inê kê bani ngahisigo me tare i na ara ni agua go arâ igê. Inê kê bani mutera me na merongamu hato go sugarira taramu. Inê be katoa ke rongo raha na atamu mangagi na atata na mane ga raramohaga ngavê i maveta.

¹⁰Inê kê bani atea na agua tangara na kariaku na Isiraelita, hanana vi ga ogasia. Ngaira ka gâga i ngekana, ma ki asa ta na enoni vige page hagamamasiaga apeta aporo nikâ. Na merongata tenigi na agua getigi ki hato, vige page taharira nikâ.

¹¹Manga i nago igê na mateni iata na mane ni hagaotonga, gê kasira ka bêngenira na kariaku, inê kê surua, vigê hagatahigo tare tenira na merongamu hato, ma na apaparaha iamu ke heheuri tare ki bê ki arâ.

¹²Matena go meme ma ko panepane henira na êvarimu, inê kê page kasia na hitangita o karemu hanana i maneraha urusigo ma kê page katoa na arahanga iana ki ama ni raramohaga nga.

¹³Hoi, ngaia nga ka na ani i page torea na ruma ni rotu tangê, ma inê kê page katoa na apaparaha iana ki heheuri tare ki bê ki arâ.

¹⁴Inê kê page manga o vaemana ma ngaia ki page manga o kareku. Matena i aharê igê ta na tarana, inê kê page hagaitangia manga o vaema ni kare i hagaitangia o karena.

¹⁵Inê ki asa vi ve kasi renia manga gê kasi renia noga o Saulo, gê kasia hura, hanana vi igo ko maneraha urusia.

¹⁶Na apaparaha iana ki asa vige page hato ma na arahanga iana ki asa vige page hato nogana. Na raraha iamu ki asa vige page hato.’”

¹⁷O Natane ki hagarongoa o Tavite renigi na ara ni marâ God ki hagamarutea renigi.

¹⁸Hoi, na maneraha o Tavite ki banu igê na ruma na gahu, i oga igê na bokesi na suruheri iana na Araha. Ngaia ki oga so ma ki nunginungi, ki vi: “God Araha raramohaga hunigo, igo ko nakagami akê, na ahemata iaku menê, igê na tarana i pe marisimami.

¹⁹Henaka, ma igo God Araha raramohaga hunigo, ko ama ni kasigami akê nga. Igo ko bani nakagi na suruha iamu tangara na raraha iaku igê na mateni i muri me. Araha God raramohaga hunigo, igo ko hagabâsira na enoni renia na tarana ngekê.

²⁰Na ta nikâ be visia tangago? Inê na kariamu. Igo ko bani aitangisiê ngavê.

²¹Vikana nga ki na obaniha ma na katoha iamu. Igo ko bani katogi na tarani hato ngegana, hanana go hagesuriê.

²²God Araha raramohaga hunigo, igo ko raha teha ngavê. I mareha rârâ tani vige maratoramu. Igami kami bani girara me, vi igo getego ma ko God.

²³I maveta hagenani ki mareha rârâ igê ta na apanini nuni, vige maratorata na Isiraelita, suria go hagatahira tenia i Esipito, ga voravora re na kare rakuraku igê, hanana go atera, ka vora re na kariamu maremu. Na atamu ki rongo raha i maveta hagenani, suria go tamanira renigi na tagaraha raha ma na mena. Igo ko tarigenira hura na apaneni nuni getera henira na ataro iata, matena na kariamu ka sugarira tarata na kariamu, go hagatahira tenia i Esipito, hanana ga vora re na animu maremu.

²⁴Igo ko katora na Isiraelita ka vora re na kariamu hagahu, ma igo Araha ko God iata.

²⁵“Hoita, Araha God, gu hagamonarigi tare na suruha iamu tangagami, inê ma na raraha iaku ma ko katogi ka vagavaga me mave na tarani, go bani visigi.

²⁶Na atamu ki page rongo raha ngavê, ma na enoni ka page vivi tare, ki bê ki arâ, vi ‘Na Araha God raramohaga hunia ki God iata na Isiraelita.’ Ma igo ko page katoa na raraha iaku ki asa vige page hato.

²⁷Araha raramohaga hunigo, God iata na Isiraelita, inê kê pe magu, vi ve nungigo vikana, suria igo ko bani hagagirarê, inê na kariamu, renigi na tarani hato ngegana ma ko bani hagarongoê, vi na raraha iaku ka page heheuri ka maneraha.”

²⁸“Hoita, Araha raramohaga hunigo, igo nga ko God. Igo ko hagamonarigi tare na suruha iamu. Igo ko naka na suruha koro iamu tangê.

²⁹Inê kê nungigo, ku korokoro tangara na raraha iaku, hanana ngaira ka page ama ni vagevagesigi nga na korohamu. Igo Araha God raramohaga hunigo, igo ko bani suru vikana, ma na korohamu ki page aharêsira tare na raraha iaku.”