Read Kahua 2 SAMUELE 8 Bible Online

2 SAMUELE 8 - Kahua bible

2 SAMUELE 8

¹Ki rârâ ma na maneraha o Tavite ki taharira nikâ na Pilisitina. Ngaia ki teharira ma ki hatungia tenira vige marungia na agua.

²Hemuri ngaia ki teharira na Moabita. Ngaia ki henahuraura, ki hagatâhira so harahara i ano, ma ki ahura tatarê renira tihira na ara ni oruta na enoni. Vikana na Moabita ka oga i ruguhana ma ka vuria na takesi tanga.

³Hemuri ngaia ki teharia na maneraha i Soba i Siria o Hatatesere karena o Regobo, matena i râ hanana vi naka aporo na apanena i ve i Uparatesi i ruguhana.

⁴O Tavite ki henahuraura na 1,700 na mane ni me igê na hosi ma na 20,000 na mane ni me ga arâ ma re ugata. Ngaia ki nakara na 200 na hosi tangagi na 100 na kati ni me, ma ki raharugura na ani getera hato.

⁵Matena na ai ni Siria ga oga i Tamasiko, ka tamania o Hatatesere renira na mane ni me iata, o Tavite ki taharira, ma ki mutera na 22, 000 na me iata.

⁶Ngaia ki nakara totoko na mane ni me iana surigi na tênga igê na apanena ngekana. Vikana na ai ni Siria ka oga i ruguhana o Tavite ma ka vuria na takesi tanga. Na Araha ki katoa o Tavite ki tehateha tare igê na ara ni hearihatani.

⁷O Tavite ki henahuraugi na bêata na golo iata na mane, ga bêngenira na mane ni me iana o Hatatesere ma ki migirâ tanga i Jerusaleme.

⁸Ngaia ki tora nikâ rako na kapa i higa tenirerua na hinua i Betaga me Berotai, o Hatatesere ki marungirerua.

⁹O Toi na maneraha i Hamata ki rongo, vi o Tavite ki teharira na mane ni me hato iana o Hatatesere.

¹⁰O Toi ma o Hatatesere karu hemeronge tare. Tahema o Toi ki hagatorangenia o Jorama o karena, ki râ ki hagamauru koro tanga na maneraha o Tavite ma ki hagarahasia, suria i teharia o Hatatesere. O Jorama ki tagarenigi na mahatanga na golo, na siliva ma na kapa i higa tanga o Tavite.

¹¹Na maneraha o Tavite ki nakagi râ tanga na rotu henigi na siliva ma na golo, i bani henahuraugi tenira na enoni i na agua getigi i bani teharira.

¹²Na ai ni Etome, ni Moaba, ni Amone, ni Pilisitia, na Amalekita henia ta apanena na marâ, i henahuraugi tenia o Hatatesere.

¹³O Tavite ki kahu rongo raha ngavê na atana, matena i mutera hato na 18,000 na Etomita igê na maruguna Marasiga ma ki bani aporo me.

¹⁴Ngaia ki kasira totoko na mane ni me iana ka tênga suria i Etome hagenani, ma na ai ni Etome ka oga i marungana. Na Araha ki katoa o Tavite ki tehateha tare igê na hearihatani hato.

¹⁵O Tavite ki marungia i Isiraele hagenani ma ki katogi na koroha ma na otoha ka aharêsira tare na kariana.

¹⁶O Joaba karena ka Seruia ki bêngenira na mane ni me. O Josapata karena o Agilute ki na mane segesege igê na gavumane.

¹⁷O Satoke karena o Agitube ma o Agimeleki karena o Abiatare, ngairerua karu mane ni vogasiha. O Seraia ki na mane segesege igê na hagatamasinga.

¹⁸O Benaia karena o Joiata ki bêngenira na Keretita ma na Peletita, ga anumasia o Tavite. O karena o Tavite ka mane ni vogasiha.