Read Kahua 2 SAMUELE 9 Bible Online

2 SAMUELE 9 - Kahua bible

2 SAMUELE 9

¹I ta na tangiana o Tavite ki hagate, ki vi: “I hega, ta na raraha iana o Saulo ki tahitahi mênga? Manga i gâga mênga inê kê obania vigê korokoro tanga renia o Jonatane.”

²Ta na mane, i bani tagara i nago tanga na ahemata iana o Saulo, ki no Siba. Na maneraha o Tavite ki unia me i pasina ma ki hagatea, ki vi: “O Siba kanigo? Ngaia ki arami, ki vi: “Inê nga, maneraha.”

³Na maneraha ki hagatea, ki vi: “I hega, ta na raraha iana o Saulo ki tahitahi mênga? Manga i gâga mênga, inê kê obania, vigê korokoro tanga ma kê marupea, suria inê kê bani surua vikana tanga God.”

⁴O Siba ki arami, ki vi: “Ua. Na ani gi tage o karena o Jonatane ki gâga mênga. Ngaia ki tavi.” Na maneraha ki hagate, ki vi: “I he ngaia?” O Siba ki arami, ki vi: “Ngaia kani gâga i Lotebare i pasina o Makire karena o Amiele.”

⁵Vikê o Tavite ki kasi tamasinga tanga ki râ me.

⁶Matena o Mepiboseti o karena o Jonatane ma o vesina o Saulo ki ata me, ngaia ki susure ma ki tube so i ano i maana o Tavite, hanana i hagahigasia. O Tavite ki vi: “Mepiboseti!” O Mepiboseti ki vi: “Inê ngekê, maneraha!”

⁷O Tavite ki vi: “Siana ko magu. Inê be korokoro tangago renia o Jonatane o vaemamu. Inê be vatego aporo na ara ni mako hato iana o viramu o Saulo, ma ki koro ma tangago, vigo ngêngê i pasiku i na anima na matena go obania.”

⁸O Mepiboseti ki tubê so nikâ ma ki vi: “Maneraha, inê ki pe arariê ngavê vikana. Inê kê manga na o i me.”

⁹Hemuri na maneraha ki unia me o Siba na kariana o Saulo, ma ki vi tanga, ki vi: “Inê kê vatea o Mepiboseti o vesina na maneraha iamu o Saulo, na ara ni nahuninga iata o Saulo ma na ahemata iana.

¹⁰Igo, o karemu ma na kariamu, igamu kamu tagara igê na mako tangara na ahemata iana na maneraha iamu o Saulo ma na ara ni ngêra ga maua mu totora me, ki gâga tangara ka ngêngê, nga noga ma o Mepiboseti ki page ngêngê tare i pasiku.” O Siba ki nahunira o karena tangahuru matare rima ma na kariana tangahuru gi rua.

¹¹O Siba ki arami, ki vi: “Maneraha, ua, i koro ma vikana. Vikê o Mepiboseti ki ngêngê i pasina na maneraha manga vi ngaia ki na hitangita o karena na maneraha.

¹²O Mepiboseti ki nahunia na kare mane o Mika. Na ruma hato iana o Siba ka vora re na kariana o Mepiboseti.

¹³Vikê o Mepiboseti i tavi na êgana gi rua, ki oga i Jerusaleme ma ki ngêngê tare i pasina na maneraha.