Read Kahua 1 MAHERAHA 1 Bible Online

1 MAHERAHA 1 - Kahua bible

1 MAHERAHA 1

¹Na maneraha o Tavite ki merahaga ngavê. Ngaia ki ama ni marato nga, henaka na kariana ka aruhea renigi na aruhana.

²Tahema na mane ni hagaotonga iana ka vi tanga, ka vi: “Maneraha, naka kami garia ta na gete haoru ke oga henigo ma ke marupego. Ngaia ki page tâtâ ngahisigo, hanana go mahanahana.”

³Ngaira ka gari suria i Isiraele hagenani renia na kere gete bâkoro. Ki rârâ ma i Suneme ka tarahua igê na ani nga i bâkoro. Na atana kani ka Abisage. Ngaira ka merâ i pasina na maneraha.

⁴Ngaia ki bâkoro teha ngavê na apena. Ngaia ki bâbâsurira na enoni ga vatugia me na maneraha, ki marupea na maneraha ma ki mareha vige memêru.

⁵Hoi, i murina i me o Abasalome, o Atonia o kareterua o Tavite ma ka Gagita ngaia ki na ani i nago tarata na ani ga tahitahi mêngara. Ngaia ki na mane i bâkoro era na apena. O Tavite ki mareha ngavê, vige ramonia rârâ renia ta na marâ. O Atonia ki gunahia bâraha vi maneraha. Ngaia ki toregi tanga marena na kati ni me, na hosi ma na tangahuru gi rima na mane ni anumasiha.

⁶

⁷Ngaia ki mererâtamasi o Joaba o karena ka Seruia mo Abiatare na mane ni vogasiha. Ngairerua karu aganaria na takoha iana.

⁸Ma ngaira o Satoke na mane ni vogasiha mo Benaia karena o Joiata mo Natane na poropete, mo Simi, mo Rei ma na mane ni anumasiha iana o Tavite ngaira ka pe pane henia o Atonia.

⁹Hemuri o Atonia ki vogasi renira na sipi, na goti, na puruka mane ma na kareta na puruka ga binibinikaga i Hênima hagarangia na ve banga i Rogele. Ngaia ki guhira me o karena getera na maneraha.

¹⁰Ngaia ki pe guhira o Salomo o vesina, se vi o Natane na poropete, se vi o Benaia, se vi na me ni anumasiha iana na maneraha.

¹¹Hoi, o Natane ki râ i pasina ka Bateseba kenana o Salomo, ma ki hagatea, ki vi: “I hega, igo ko pe rongoa, vi o Atonia karena ka Gagita ki pusia marena vi maneraha? Ma na maneraha o Tavite ki pe hagarea rârâ, kego!

¹²Manga igamurua igo ma o karemu o Salomo, ma kamuru obania vigamuru tahitahi, inê be vi tangago,

¹³ko arâ ototo râ nga i pasina na maneraha o Tavite, ma ko hagatea vikê: ‘Maneraha, i hega, igo ko pe bani tohe tangê, vi o Salomo o kareku ki page maneraha urusigo? Tanu hega o Atonia kani maneraha ngaia?’”

¹⁴Ma o Natane ki vi nikâ ki vi: “Hoi, matena go metamasi mênga na maneraha o Tavite, inê kê page bêbanu me ma kê tamanigo igê na tamasinga.”

¹⁵Hoita, ka Bateseba ki râ ki bâsia na maneraha igê na kiboru ni mêruha iana. Na maneraha ki merahaga ngavê ma ka Abisage na kere gete ni Suneme ki marupea.

¹⁶Ka Bateseba ki tubê so i maana na maneraha ma na maneraha ki hagatea, ki vi: “Na ta ko obania?”

¹⁷Ka Bateseba ki arami, ki vi: “Maneraha, igo ko bani tohe renia na atana na Araha God iamu, vi o kareku o Salomo ki maneraha urusigo.

¹⁸Ma o Atonia ki bani vora re na maneraha ma igo ko pe hagarea rârâ.

¹⁹Ngaia ki bani vogasi renira rako na puruka mane, na sipi na goti ma na kareta na puruka binibinikaga. Ngaia ki guhira o karemu, ma o Abiatare na mane ni vogasiha mo Joaba i bêngenira na mane ni me iamu, ma ki mareha vige guhia o karemu o Salomo.

²⁰Maneraha, na Isiraelita hato ka nasigo, vigo hagarongora, vi o ti kani page maneraha urusigo.

²¹Manga i mareha, matena go meme râ, o karemu o Salomo menê ka page merongasigamirua ngavê.”

²²Matena i tamasi mênga ka Bateseba, o Natane ki ata me i ruma iana na maneraha.

²³Ka hagarongoa na maneraha, vi na poropete ki ata me. O Natane ki banu ma ki tubê so tanga na maneraha.

²⁴Ngaia ki hagatea na maneraha, ki vi: “Maneraha, i hega, igo ko bani visia vari, vi o Atonia ki maneraha urusigo?

²⁵I ngekê nga ngaia ki bani râ ma ki vogasi renira rako na puruka mane, na sipi na goti ma na kareta na puruka binibinikaga. Ngaia ki guhira o karemu hato, mo Joaba na mane i bêngenira na mane ni me iamu, ma o Abiatare na mane ni vogasiha. Ma i ngekê nga ngaira ka magoto henia ma ka ngere, ka vi, ‘O Atonia na maneraha ke mêri arihu!’

²⁶Maneraha, ngaia ki pe guhigami, inê se vi o Satoke na mane ni vogasiha, se vi o Benaia se vi o Salomo.

²⁷Maneraha, i hega, igo ko aganaria vari na tarana ngekana? Maneraha, i tanu hega ko pe hagarongora na mane ni hagaotonga iamu renia vi o ti kani maneraha urusigo?”

²⁸Na maneraha o Tavite ki arami, ki vi: “Vi tanga ka Bateseba ke aporo banu me.” Ma ngaia ki banu me ma ki ura so i maana.

²⁹Na maneraha ki vi tanga, ki vi: “Inê kê tohe renia na Araha mamauri i bani hagatahiê tenigi na ara ni mamasiaganiha iaku,

³⁰vi i ngekê inê be hagamonaria na tohenga iaku tangago, na tohenga renia na atana na Araha God iata na Isiraelita, vi o karemu o Salomo ki page maneraha urusiê.”

³¹Ka Bateseba ki tubê so ma ki vi: “Araha, maneraha iaku, gu mêri arihu!”

³²Na maneraha o Tavite ki vi: “Unira me o Satoke, o Natane mo Benaia.” Matena ga banu me,

³³o Tavite ki vi tangara, ki vi: “Mu merarâ na mane ni hagaotonga iaku. Mu hagatagiria o kareku o Salomo igê na tonki iaku mareku ma kamu anumasia matena mu merâ tanga i Vebanga Gigone.

³⁴I ngekana igamurua o Satoke mo Natane, kamuru monea o Salomo ki maneraha i Isiraele. Hemuri kamu uhia na ahuri ma kamu ngerengere, kamu vivi, ‘Na maneraha o Salomo ke mêri arihu!’

³⁵Ma kamu meaporo me ikê, hanana i gâga igê na atohaku, suria i maneraha urusiê. Ngaia ki page maneraha urusiê, suria ngaia ka na ani gê bani atea, hanana vi marungirerua i Isiraele me Juta.”

³⁶O Benaia ki arami, ki vi: “Hoita, maneraha, ngaia ngekana! Na Araha God iamu ke hagamonaria na tamasinga iamu!

³⁷Maneraha, na Araha ke ngahisia o Salomo manga i bani ngahisigo igo, ma ke katoa na arahanga iana ke tavoraha bâkoro teharia na animu igo.”

³⁸Hoita o Satoke ma o Benaia mo Natane ma na me ni anumasiha iana na maneraha ka hagatagiria o Salomo igê na tonki iana na maneraha o Tavite ma ka anumasia matena ga merâ tanga i Vebanga Gigone.

³⁹O Satoke ki merâ na pi na oile, i bani torea tenia na ruma apuna na gahu iana na Araha, ma ki monea o Salomo ki maneraha. Ngaira ka uhia na ahuri, ma na enoni hato ka ngere, ka vi: “Maneraha o Salomo ke mêri arihu!”

⁴⁰Hemuri matena i aporo me, ngaira hato ka mumuri, ka ngerengere vagevage, ka uhigi na êhihi ma ka barongo raha ngavê ki angingi na ano.

⁴¹Matena o Atonia ma na me hato iana i guhira ka hatongia na magotoha, ngaira ka rongoa na barongoha. Ma na matena o Joaba ki rongoa na ahuri, ngaia ki hagate, ki vi: “E, ga baronga i hinua tanga na ta?”

⁴²Matena i tamasi mênga, o Jonatane karena o Abiatare na mane ni vogasiha, ki ata. O Atonia ki vi tanga, ki vi: “Banu me! Igo na mane koro. Na rongoha koro kanigo merâ me.”

⁴³O Jonatane ki arami, ki vi: “Hetaki, i mareha! Na maneraha o Tavite ki bani kasia o Salomo ki maneraha.

⁴⁴Ngaia ki bonasira o Satoke, mo Natane mo Benaia ma na mane ni anumasiha iana ka anumasia i tara. Ngaira ka hagatagiria igê na tonki iana na maneraha.

⁴⁵O Satoke mo Natane karu monea i Vebanga Gigone ki maneraha. Hemuri ngaira ka meaporo i hinua ma ka ngerengere vagevage. Tahema na enoni ka barongo. Na barongoha ngekana kanigo rongoa.

⁴⁶O Salomo nga kani maneraha.

⁴⁷Ma ta na marâ nikâ: Na mane ni hagaotonga ka râ, hanana viga hagahigasia na maneraha o Tavite ma ka vi tanga, ka vi, ‘God iamu ke katoa na atana o Salomo ke rongo raha teharigo igo, ma na arahanga iana o Salomo ke tavoraha bâkoro ngavê teharia na animu igo.’ Hemuri na maneraha o Tavite ki susure igê na bea iana ma ki rahesia God.

⁴⁸Ngaia ki nunginungi, ki vi: “Ge hagarahasia na Araha God iata na Isiraelita, suria i ngekê ngaia i kasia na hitangita na raraha iaku ki maneraha urusiê ma ki nakê kê bâsia!”

⁴⁹Hoi, na enoni i guhira me o Atonia ka magu. Ngaira hato ka aharaga vê ka râ hegitigi.

⁵⁰O Atonia ki magutenia ngavê o Salomo. Ngaia ki râ tanga na ruma na gahu iana na Araha ma ki hererâ igê na sukuni na bea ni vogasiha.

⁵¹Na maneraha o Salomo ki rongo, vi o Atonia ki magutenia ma ki ama ni hererâ nga igê na sukuni na bea ni vogasiha, suria i vi: “Inê kê obania vi na maneraha o Salomo i tohetohe tangê hagenago, vi ngaia ki asa vige nahuiê kê meme.”

⁵²O Salomo ki arami, ki vi: “Manga vi ngaia ma ki tototo suriê maninga, inê ki asa hagetage be erasia, naka ma vi na kere varehuna gi tage i bêna. Manga i mareha, hoi, ngaia ki page meme.”

⁵³Na maneraha o Salomo ki vi, ka torea me tenia na bea ni vogasiha. O Atonia ki râ i pasina na maneraha ma ki tube so tanga ma na maneraha ki vi tanga, ki vi: “I koro ma. Gu aporo i pasimu.”