Read Kahua 1 MAHERAHA 12 Bible Online

1 MAHERAHA 12 - Kahua bible

1 MAHERAHA 12

¹O Regabeama ki râ i Sigeme, suria na Isiraelita hato ka bani haku i ngekana, ka kasia igê ki maneraha.

²Matena o Jerobeama karena o Nebata ki rongo vikana, ngaia ki aporo me tenia i Esipito na agua i bani gava tanga tenia o Salomo.

³Na Isiraelita ka unia me ma ngaira hato ka tage râ tanga o Regabeama. Ngaira ka vi tanga, ka vi:

⁴“O Salomo o vaemamu ki hagamamasiagagami ma ki hagamarâ apemami ngavê. Manga igo ma ko hagamahagami ma ko katoa ki mataku na ogaha iamami, hoi, igami kami page tototo surigo maninga.”

⁵O Regabeama ki aramira, ki vi: “Mu aporo me i murini na tangiani gi oru ma kê kahu aramigamu igê.” Vikê ngaira ka râ.

⁶Na maneraha o Regabeama ki gari takoha tenira na meraha ga mane ni hagaotonga iana o Salomo o vaemana. Ngaia ki hagatera, ki vi: “Na aramiha ta kanimu takusia, vigê page aramira na enoni ngegana renia?”

⁷Ngaira ka arami, ka vi: “Manga igo ma ko obania vigo tamanira maninga na enoni ngegana, hoi, gu aganaria na obaniha iata, ma ngaira ka page tototo surigo maninga tare.”

⁸Ma ngaia ki usitenia na hagaotonga iata na meraha ma ki gari takoha tenira ma na mane na gapu haoru, ga tage raha haku henia vora re ma ka na mane ni hagaotonga iana i ngekê.

⁹Ngaia ki hagatera, ki vi: “Na hagaotonga ta kani iami tangê? Gê vivi bâ hega tangara na enoni, ga nungiê, vigê hagamahagi na ogaha iata?”

¹⁰Ngaira ka aramia, ka vi: “Hoi, go vi tangara ko vivi vikê: ‘Na kere kakêku i akere ki upupuga teharia na gupina o vaemaku!’

¹¹Go vi tangara, ko vivi, ‘O vaemaku ki hagamamasiagagamu bâraha, ma inê kê page hagamamasiagagamu teha ngavê. Ngaia ki ramusigamu renigi ma na varo gonari, ma inê kê page ramusigamu nga renigi na varo ga tâ igê na gavi!’”

¹²I hato na tangiani gi oru o Jerobeama ma na enoni ka aporo tanga na maneraha o Regabeama, manga i bani vi tangara.

¹³Na maneraha ki pe râ suria na hagaotonga iata na meraha, ma ki tamasi ramo tangara na enoni,

¹⁴manga ga bani vi tanga na mane na gapu haoru. Ngaia ki vi: “O vaemaku ki hagamamasiagagamu bâraha ma inê kê page hagamamasiagagamu teha ngavê. Ngaia ki ramusigamu renigi na varo gonari, ma inê kê page ramusigamu renigi na varo ga oga igê na gavi!”

¹⁵Vikana na Araha ki hagamonaria na tamasinga iana i harana o Agia na poropete i Silo tanga o Jerobeama. Tahema na maneraha ki pe aganaria na obaniha iata na enoni.

¹⁶Matena na enoni ka tahetara, vi na maneraha ki pe rongo ringeta, ngaira ka ngere raha, ka vi: “Nakara vê ngaira getera mareta o Tavite ma na raraha iana! Na ta kaniga katoa noga tangagia? Isiraelita, nika ge aporo! Naka vê o Regabeama ngaia marena!” Vikana na Isiraelita ka hura pania o Regabeama,

¹⁷ki maneraha tangara ma na enoni ga oga i na apanena i Juta.

¹⁸Hoi, na maneraha o Regabeama ki hagatorangenia o Atonirama i bâsurira na enoni rakuraku, ki râ i pasita na Isiraelita, ma ngaira ka arihahunia. Ngekana o Regabeama ki hatani gaha râ ki tage igê na kati ni me iana ma ki gava tanga i Jerusaleme.

¹⁹Haganega tenia ngekana na Isiraelita ka kahu merongasira tare na raraha iana o Tavite.

²⁰Matena na Isiraelita ka rongo, vi o Jerobeama ki bani aporo me tenia i Esipito, ngaira ka unia ki râ me igê na hekarigiana iata, ma ka kasia ki maneraha i Isiraele. Na raraha iana o Juta ki oga so ma henira na raraha iana o Tavite.

²¹Matena o Regabeama ki ata i Jerusaleme, ngaia ki unihakura na 180,000 na mane ni me ramo tenirerua na varo ninuni iaterua hegitigi o Juta mo Benamino. Ngaia ki kato vi meraheariha na Isiraelita, hanana i nakara aporo i marungana.

²²Ma God ki bonasia na poropete o Semaia,

²³ki râ ki tamasi tangara o Regabeama ma na varo ninuni iaterua hegitigi o Juta mo Benamino, ki vi:

²⁴“Siana kamu taharira na goami na Isiraelita. Mu aporo, igamu hato. Na tarana i akê me ngaia ka na obaniha iaku.” Ngaira hato ka tê viteana na Araha ma ka aporo.

²⁵O Jerobeama na maneraha i Isiraele ki pararihia na hinua i Sigeme igê na hungani i Eparaimi ma ki oga sisite i ngekana. Hemuri ngaia ki râ pania ma ki pararihia na hinua i Penuele.

²⁶Ngaia ki tako, ki vi: “Manga vi na kariaku ma ka arâ, tanga i Jerusaleme, hanana viga vogasia igê na Araha i ruma ni rotu i ngekana, vari ngaira ka page huhura teniê, hanana ga hakunia na maneraha o Regabeama ma ka page nahuiê kê meme.”

²⁸Vikana ngaia ki tagarahirerua na puruka mane gi rua renigi na golo, ma ki vi tangara na kariana, ki vi: “Mu rârâ tanga na hagarahenga i Jerusaleme ki uhu noga. Isiraelita, bâ, na ataro iami kani ngairerua igê, garu bêngenigamu hura tenia i Esipito!”

²⁹Ngaia ki naka na hitangiterua na puruka mane na golo ngegana i Betele ma tani ki naka i Tane.

³⁰Vikana na enoni ka tasi, suria ga vogasi i Betele ma i Tane.

³¹O Jerobeama ki tagarahigi nikâ na bea ni vogasiha surigi na botoni na hungani, ma ki atera ka mane ni vogasiha tenira na ahemata, ga mareha vi na raraha iana o Levi.

³²O Jerobeama ki haganega na tangiana raha na rotu igê na tangahuruta matare rima na tangiana igê na varuta na hageha, ki manga na tangiana raha na rotu i Juta. Igê na bea ni vogasiha i Betele ngaia ki vogasirerua igê na karena puruka mane gi rua na golo, i tagarahirerua, ma ki nakara i Betele na mane ni vogasiha, hanana ga vogasi igê na agua ni vogasiha i bani tagarahigi.

³³Igê na tangahuruta matare rima na tangiana igê na varuta na hageha, na tangiana i bani naka ngaia marena, ngaia ki râ i Betele, hanana i vogasi igê na bea ni vogasiha, hanana i hagahigasia na tangiana raha na rotu, i bani haganega tangara na Isiraelita.