Read Kahua 1 MAHERAHA 14 Bible Online

1 MAHERAHA 14 - Kahua bible

1 MAHERAHA 14

¹I na matena ngekana o Abia karena na maneraha o Jerobeama ki maeha.

²O Jerobeama ki vi tanga kaniana, ki vi: “Gu gahu ku bâ getego, hanana siana ka bâbâgirarago. Hemuri ko arâ tanga i Silo. O Agia na poropete kani gâga, i bani visiê, vigê maneraha i Isiraele.

³Gu migirâ tanga na tangahuri na guani na bereti ma tani na hêni na koni ma na pi na pirui. Go hagatea renia o karekerua, vi ngaia ki page hega. Ngaia ki page visia me tangago.”

⁴Vikê ngaia ki râ i Silo i pasina o Agia. O Agia ki guru, suria i merahaga ngavê.

⁵Na Araha ki bani hagarongoa, vi kaniana o Jerobeama ki râ me noga, hanana vi hagatea renia o karena i maeha. Na Araha ki hagagirara o Agia renia vi na ta kani page visia. Matena kaniana o Jerobeama ki ata me, ngaia ki hagaparu vi ngaia ka na gete getea.

⁶Ma na matena o Agia ki rongoa râ i ura me i maani ruma, ngaia ki vi tanga, ki vi: “Banu me! Inê kê girarago, igo kani kaniana o Jerobeama. Tanu hega kanigo hagaparu, vi igo ka na gete getego? Inê kê nahunia na rongoha era tangago.

⁷Go aporo ma ko hagarongoa o Jerobeama renia na Araha God iata na Isiraelita ki tamasi vikê tanga: ‘Inê kê atego i berarogata na enoni ma kê nakago ko marungira na kariaku na Isiraelita.

⁸Inê kê hatungia na arahanga tenira na raraha iana o Tavite ma kê haganahunigo igo renia. Ma igo ko pe maratorana o Tavite na kariaku, i toto suriê tare ma ki marupegi na ramata iaku, ma na tauhana ka hagakoro obaku tare.

⁹Igo ko bagatauhamu teharira na maneraha i nago taramu. Igo ko usiteniê ma ko hagamangariê, suria go tagarahigi na nunuta na ataro renigi na aiani, hanana go hagarapera.

¹⁰Tahema inê be nakagi na bagabevoani ke tarahua na apaparaha iamu ma be mutera na mane na raraha iamu, henaka ga sisite se ga raha. Inê be hagamagahurua na apaparaha iamu mangagi na ae ga sinogi râ.

¹¹Na apaparaha iamu ga meme i hinua, na o kaniga page ngaura, ma na ani ga meme tarege râ, na ahetaronga kaniga page ngaura. Ngaia nga kanigê visia inê na Araha.’”

¹²Ma o Agia ki vi tanga nikâ kaniana o Jerobeama, ki vi: “Hoi, gu aporo. O karemu ki page meme igê nga na matena go bêbanu vê i hinua.

¹³Na Isiraelita ka page angiangi maramara renia ma ka page bagia. Ngaia ma ka na ani i berarogata na apaparaha iana o Jerobeama ka page bagia maninga, suria ngaia getea ma kani hagakoro obana na Araha God iata na Isiraelita.

¹⁴Na Araha ki page kasia ta na mane ki maneraha i Isiraele, hanana i hagamagahurua na apaparaha iana o Jerobeama.

¹⁵Na Araha ki page hagaitangira na Isiraelita, ma ngaira ka page angingi mangagi na asire i ve. Ngaia ki page ragera hura na Isiraelita tenia na agua na mako koro ikê, i bani haganahunira na êvarita renia. Ngaia ki page tokorenira i na apanena tare na ve i Uparatesi, suria ngaira ka hagamangaria, suria ga tagarahigi na nununa ka Asera na ataro.

¹⁶Na Araha ki page rumakaka renira na Isiraelita, suria o Jerobeama ki tasi ma ki hagatasira na Isiraelita.”

¹⁷Kaniana o Jerobeama ki aporo i Tirisa. Ma pusina ma i banu i ruma iana, ma o karena ki me.

¹⁸Na Isiraelita ka angi maramara renia ma ka bagia manga na Araha i bani visia i harana o Agia na poropete.

¹⁹Na tauhana hato getigi o Jerobeama na maneraha ma na hearihatana iana ma manga i he na marungiha iana ka bani segegi so igê na buka na sihonga renira na maneraha i Isiraele.

²⁰O Jerobeama ki maneraha surigi na harisi tangahuru gi rua matarerua ma o Nataba o karena ki maneraha urisia.

²¹Matena o Regabeama karena o Salomo ki tonga na tangahuru ge he matare tage na harisi iana, ngaia ki vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru matare pi. I Jerusaleme ka na hinua na Araha ki bani atea i berarogani na hinua hato i Isiraele hagenani, hanana ga rahesia igê. Kenana o Regabeama kani ka Nama na gete ni Amone.

²²Na ai ni Juta ka guguruga tanga na Araha ma ka hagamangaria teharira na êvarita hato.

²³Ngaira ka tagarahigi na agua ni vogasiha tangara na ataro ma ka hagêrasigi na u na hê ma na nununa ka Asera igê na hungani ma i mamarugani na apinige raha, hanana ga vogasira igê.

²⁴Na tarana i erataga ngavê ka na êra, na ani mane ma na gete, igê na agua ga vogasira igê na ataro. Na ai ni Juta ka bagaparongata mangara na enoni, na Araha i bani paira hura tenia na agua, matena na Isiraelita ka oga parera.

²⁵Igê na rimata na harisi i maneraha surigi o Regabeama o Sisake na maneraha i Esipito ki taharia i Jerusaleme.

²⁶Ngaia ki henahuraugi na ruruguha hato tenia na ruma ni rotu ma tenia na ruma raha iana na maneraha henigi na bêata na golo i tagarahigi o Salomo.

²⁷Na maneraha o Regabeama ki urusigi renigi na bêata na kapa ma ki tagarenigi tangara na mane ni me ga bâsurira na mane ni me ga anumasigi na maani para na ruma raha iana.

²⁸Na ara ni mateni matena na maneraha ki arâ i ruma ni rotu, na mane ni anumasiha ka taugi na bêata ma hemuri ka nakagi aporo igê na kiboru iata.

²⁹Na tauhana hato getigi na maneraha o Regabeama ka bani segegi so igê na buka na sihonga renira na maneraha i Juta.

³⁰O Regabeama ma o Jerobeama karu heariha ngavê tare.

³¹O Regabeama ki me ma ka bagia igê na matahuta na maneraha i hinua iana o Tavite. Kenana kani ka Nama na gete ni Amone. O Abiama o karena ki maneraha urusia.