Read Kahua 1 MAHERAHA 15 Bible Online

1 MAHERAHA 15 - Kahua bible

1 MAHERAHA 15

¹Matena o Jerobeama ki bani maneraha noga i Isiraele surigi na tangahuri na harisi matara ge varu, o Abiama ki vora re na maneraha i Juta.

²Ngaia ki oga i Jerusaleme ma ki marungia i Juta surigi na harisi gi oru. Kenana kani ka Maka ka karena o Abisalome.

³Ngaia ki tasi manga o vaemana ma ki pe toto suria rârâ na Araha God iana manga hete o Tavite na êvarina.

⁴Ma suria na Araha God ki takuia o Tavite, tahema ngaia ki haganahunia o Abiama renia na kare mane, hanana i maneraha urusia ma ki anumasia i Jerusaleme.

⁵Na Araha ki kato vikana, suria o Tavite ki hagakoro obana ma ki marupegi tare na ramata iana, nga noga ma renia o Uria na Hitita.

⁶O Abiama ma o Jerobeama karu heariha tare suria na matena hagenani i maneraha igê o Abiama.

⁷Na tauhana hato getigi o Abiama ka bani segegi so i na buka na sihonga renira na maneraha i Juta.

⁸O Abiama ki me ma ka bagia i hinua iana o Tavite, ma o Asa ki maneraha urusia.

⁹Matena i bani maneraha noga o Jerobeama surigi na tangahuri na harisi gi rua i Isiraele, o Asa ki vora re na maneraha i Juta.

¹⁰Ngaia ki oga i Jerusaleme ma ki marungia i Juta surigi na tangahuri harisi ge he matare tage. Kirana kani ka Maka ka karena o Abisalome.

¹¹O Asa ki hagakoro obana na Araha tagenana manga o Tavite na êvarina.

¹²Ngaia ki paira hura na êra hato tenia na agua, na mane ma na gete, ga tagara igê na agua ga vogasira igê na ataro, ma ki kasigi râ na nunuta hato na ataro ga tagarahigi o vaemana ma na êvarina.

¹³Ngaia ki hatungia na ramoha tenia ka Maka kirana, suria ka Maka ki tagarahia ki bera na nununa ka Asera na ataro ni hagarakoniha. O Asa ki tapia so na nununa ngekana ma ki sungia igê na maruguna i Kiterone.

¹⁴Henaka, ma o Asa ki pe ruhuruhugi na agua ga vogasira igê na ataro. Ngaia ki ama ni toto suria nga na Araha igê na ogaha iana hagenani.

¹⁵Ngaia ki nakagi i ruma ni rotu na ara ni marâ hato, o vaemana ki bani hagapunarigi tanga God. Ma ngaia marena ki hagapunarigi nikâ na marâ i tagarahigi renigi na golo ma na siliva ma ki nakagi i ruma ni rotu.

¹⁶O Asa na maneraha i Juta ma o Basa na maneraha i Isiraele karu heariha tare igê na matena garu maneraha surigi.

¹⁷O Basa ki banu i Juta ma ki haganega ki pararihia i Rama, hanana i hagabarasigi na ara ni tara banu tanga ma hura tenia i Juta.

¹⁸Tahema na maneraha o Asa ki toregi na siliva ma na golo hato, ga hita so i ruma ni rotu ma i ruma raha iana, ma ki hagatorangenira tani na kariana ka tora tanga i Tamasiko tanga o Benihatata na maneraha i Siria karena o Tabarimone ma o vesina o Gesione, ka vi:

¹⁹“O vaemakerua karu suruheri. Naka karu suruheri nogakerua. Na siliva ma na golo igê ka na mahatanga tangago. Hoi, gu naka vê na suruheri iamu henia o Basa na maneraha i Isiraele, hanana ngaia ki torera hura na mane ni me iana tenia na apanena iaku.”

²⁰Na maneraha o Benihatata ki aganaria na katoha iana o Asa ma ki hagatorangenira na mane ga bêngenira na mane ni me henira na me iata, ka taharigi na hinua i Isiraele. Ngaira ka henahuraugi i Ione, i Tane, i Abele Betemaka, na apanena hagarangia i Kinaroto ma na apanena hagenani iana o Napatali.

²¹Matena na maneraha o Basa ki rongo vikana, ngaia ki naka vê vige parapararihia i Rama ma ki râ tanga ma i Tirisa.

²²Hemuri na maneraha o Asa ki kasi tamasinga suria i Juta hagenani, ki bonasira na enoni hato igê, mareha vige tihia rârâ tani, hanana ga tamania, ka toregi tenia i Rama na hê ma na apinige i nakagi o Basa, hanana vi parapararihia i Rama renigi. Ma o Asa ki pararihirerua i Misipa ma i Geba na hinua i na apanena iana o Benamino renigi na marâ ngegana.

²³Na tauhana hato getigi na maneraha o Asa, na tagaraha raha iana ma na hinua i pararihigi ka bani segegi so igê na buka na sihonga renira na maneraha i Juta. Matena i merahaga ta na maeha ki tarahua na êgana ma ki magi renia.

²⁴O Asa ki me ma ka bagia igê na matahuta na maneraha i Hinua iana o Tavite. O Josapata o karena ki maneraha urusia.

²⁵Igê na ruata na harisi o Asa i maneraha suria i Juta, o Nataba karena na maneraha o Jerobeama ki vora re na maneraha i Isiraele. Ngaia ki maneraha surirerua na harisi gi rua.

²⁶Ngaia ki haritohea na Araha ma ki hagatasira na Isiraelita manga o vaemana.

²⁷O Basa karena o Agia tenia na varo ninuni iana o Isakare, ngaia ki harikato renia o Nataba ma ki nahuia ki me, matena o Nataba ma na mane ni me iana ka ogarihia na hinua i Gibetone i Pilisitia.

²⁸Na tarana ngekê ki vora me igê na oruta na harisi iana o Asa i maneraha igê i Juta. Vikê o Basa ki urusia o Nataba ki maneraha i Isiraele.

²⁹Ngaia ki mutera ototo râ nga ngaira hato i ruma iana o Jerobeama. Ngaira hato i ruma iana o Jerobeama ka me, suria na tamasinga iana na Araha i harana o Agia na poropete i Silo. I mareha rârâ tani vige tahi.

³⁰Na tarana ngekê ki vora me, suria o Jerobeama ki hagamangaria na Araha God iata na Isiraelita renia ngaia ki tasi ma ki hagatasira na Isiraelita.

³¹Na tauhana hato getigi o Nataba ka bani segegi so igê na buka na sihonga renira na maneraha i Isiraele.

³²O Asa na maneraha i Juta ma o Basa na maneraha i Isiraele karu heariha tare igê na mateni garu maneraha surigi.

³³Igê na oruta na harisi iana o Asa i maneraha suria, o Basa karena o Agia ki vora re na maneraha i Isiraele hagenani. Ngaia ki oga i Tirisa ma ki maneraha surigi na harisi tangahuru gi rua matara ge he.

³⁴Ngaia ki haritohea na Araha ma ki hagatasira na Isiraelita tagenana manga o Jerobeama na maneraha.