Read Kahua 1 MAHERAHA 16 Bible Online

1 MAHERAHA 16 - Kahua bible

1 MAHERAHA 16

¹Na Araha ki tamasi tanga na poropete o Jehu karena o Ganani, ma ki hagatorangenia tanga o Basa, ki vi:

²“I nago igo ka na marâ purua ma, ma inê kê nakago, ko marungira na kariaku na Isiraelita. Ma ku bâ, igo ko tasi manga o Jerobeama ma ko hagatasira na kariaku. Na bagatauhata ka hagamangariê.

³Tahema inê be hagamagahurugamu igo ma na ruma iamu manga o Jerobeama.

⁴Na hitangita i ruma iamu ga meme i hinua, na o ka page ngaura, ma na hitangita ga meme tarege râ tenia na hinua, na ahetaronga ka page ngaura.”

⁵Na tauhana hato getigi o Basa ma na tagaraha raha hato iana ka bani segegi so igê na buka na sihonga renira na maneraha i Isiraele.

⁶O Basa ki me ma ka bagia i Tirisa ma o Ela o karena ki maneraha urusia.

⁷Na Araha ki tamasi i harana o Jehu na poropete ma ki ramonira o Basa ma na ruma iana, suria o Basa ki murisigea na Araha. Ngaia ki hagamangaria na Araha manga na maneraha o Jerobeama, ma suria nikâ i mutera ngaira hato i ruma iana o Jerobeama.

⁸Matena o Asa ki bani maneraha noga i Juta surigi na harisi tangahuru gi rua matare ono, o Ela karena o Basa ki vora re na maneraha i Isiraele. Ngaia ki oga i Tirisa ma ki marungia i Isiraele surirerua na harisi gi rua.

⁹O Simiri na hitangita na mane ni me iana i bêngenira ta na apanena na mane ni me igê na kati ni me, ngaia ki harikato renia o Ela. I ta na tangiana, matena i oga i Tirisa, o Ela ki tono ki ruguhia i ruma iana o Arasa, i bâsuria na anumasiana na ruma iana na maneraha.

¹⁰O Simiri ki banu i ruma ma ki nahuia ki me o Ela ma ki maneraha urusia. Na tarana ngekê ki vora me igê na harisi tangahuruta gi rua matare pi iana o Asa i maneraha suria i Juta.

¹¹Pusina ma o Simiri ki maneraha, ngaia ki mutera ngaira hato i ruma iana o Basa. Ngaia ki mutera na goana ma na tamana hato o Ela.

¹²Vikana suria na tamasinga iana na Araha i harana o Jehu na poropete i ramonia o Basa, o Simiri ki mutera ngaira hato i ruma iana o Basa.

¹³O Basa ma o Ela karu hagamangaria na Araha God iata na Isiraelita, suria garu vogasira na ataro ma karu hagatasira na Isiraelita.

¹⁴Na tauhana hato getigi o Ela ka bani segegi so igê na buka na sihonga renira na maneraha i Isiraele.

¹⁵Matena o Asa ki bani maneraha noga i Juta surigi na tangahuru gi rua matare pi na harisi, o Simiri i Tirisa ki marungira na Isiraelita surigi na tangiani gi pi. Na mane ni me na Isiraelita ka ogarihia na hinua i Gibetone i Pilisitia.

¹⁶Matena ga rongo, vi o Simiri ki kato renia na maneraha ma ki nahuia ki me, ngaira ka atea ototo râ nga o Omiri i bêngenira, ki maneraha i Isiraele.

¹⁷O Omiri ma na mane ni me iana ka naka vê i Gibetone ma ka râ ka ogarihia i Tirisa.

¹⁸Matena o Simiri ki bâsira ga henahuraua na hinua, ngaia ki banu igê na kiboru nganganihaga i ruma raha iana, ma ki sungia na ruma raha ma ki me vê igê.

¹⁹Na tarana ngekê ki vora me, suria ngaia ki haritohea na Araha. Ngaia nogana ki hagamangaria na Araha renigi na tasi iana marena ma suria i hagatasira na Isiraelita manga o Jerobeama.

²⁰Na tauhana hato getigi o Simiri ma na harikatoha iana ka bani segegi so igê na buka na sihonga renira na maneraha i Isiraele.

²¹Na Isiraelita ki tora hegitigi na takoha iata. Tani ka obania o Tibini karena o Ginata vi maneraha, ma tani ka obania vi o Omiri.

²²Ki rârâ ma na ani ga obania o Omiri ka teha. O Tibini ki me ma o Omiri ki vora re na maneraha.

²³Matena o Asa ki bani maneraha noga i Juta surigi na tangahuri harisi gi oru matare tage, o Omiri ki vora re na maneraha i Isiraele. Ngaia ki maneraha surigi na harisi tangahuru matarerua. Na harisi gi ono hagenago iana i maneraha surigi ngaia ki oga i Tirisa.

²⁴Hemuri ngaia ki vuria na hungana i Samaria tenia o Semere renigi na 6,000 na maana na siliva. O Omiri ki pararihia na hungana, ki tagarahia igê na hinua ma ki hêtana vi i Samaria, suria o Semere ki na avanuna i nago na hungana.

²⁵O Omiri ki haritohea nga na Araha teharira na maneraha i nago tarana.

²⁶O Omiri nogana ki hagamangaria na Araha God iata na Isiraelita manga o Jerobeama, suria ngaia ki tasi ma ki hagatasira na enoni, ka vogasira na ataro.

²⁷Na tauhana hato getigi o Omiri ma na tagaraha raha iana ga bani segegi so igê na buka na sihonga renira na maneraha i Isiraele.

²⁸O Omiri ki me ma ka bagia i Samaria ma o Agaba o karena ki maneraha urusia.

²⁹Matena o Asa ki bani maneraha noga i Juta surigi na harisi tangahuru gi oru matare varu, o Agaba karena o Omiri ki vora re na maneraha i Isiraele. Ngaia ki oga i Samaria ma ki marungia i Isiraele surigi na harisi tangahuru gi rua matarerua.

³⁰Ngaia ki haritohea nga na Araha teharira na maneraha i nago tarana.

³¹Ngaia ki tasi manga na maneraha o Jerobeama ma ki tasi teharia, suria i êragia ka Isebele ka karena o Etebala na maneraha i Sitone ma ki hagarapea o Bala na ataro.

³²Ngaia ki tagarahia i Samaria na ngêsu tanga o Bala. Ngaia ki tagarahia na bea ni vogasiha tanga ma ki naka banu igê na ngêsu.

³³Ngaia ki hagêrasia nikâ na nununa ka Asera na Ataro. Ngaia ki hagamangaria ngavê na Araha God iata na Isiraelita teharira na maneraha hato i nago tarana.

³⁴Matena o Agaba ki maneraha, o Giele ni Betele ki tagarahia aporo i Jeriko. O Giele ki tê tara renia o Abirama na bêbê ni kare iana, matena i haganega na hinua i Jeriko. Ma o Segubu o karena hagemuri ki me, matena o Giele ki tagarahigi na maani para na hinua. Na Araha ki bani visia vikana i harana o Josua karena o Nune.