Read Kahua 1 MAHERAHA 17 Bible Online

1 MAHERAHA 17 - Kahua bible

1 MAHERAHA 17

¹Ta na poropete ki no Elia ni Tisibe i Gileata. Ngaia ki vi tanga na maneraha o Agaba, ki vi: “Inê kê tamasi suria na Araha God mamauri iata na Isiraelita gê tagara tanga. Inê be vi tangago, i asa, vige page vora me na kârupu, se vige rangi surigi na harisi gi rua se gi oru, haganega tenia i ngekê mataro me kê vivi kê nikâ.”

²Hemuri na Araha ki vi tanga o Elia, ki vi:

³“Gu pania na hinua ikê ku bêbêkê ma ko ahiahi hagarangia na ve i Kerite kerekê i ve i Jotano.

⁴Go girara go totono igê na ve ngekana. Inê kê bani bonasira na manu, hanana viga totora ngêra tangago.”

⁵O Elia ki tê viteana na Araha ma ki râ ki oga hagarangia na ve i Kerite.

⁶Ngaia ki totono igê na ve ngekana ma na manu ka toregi me na bereti ma na ganiani i na ara ni mavoraro ma i na ara ni manurahi.

⁷Ki rârâ ma na ve ki mamata, suria i mareha vige rangi rârâ.

⁸Hoita, na Araha ki vi tanga o Elia, ki vi:

⁹“Gu râ i hinua i Sarepata hagarangia i Sitone ma ko gâga igê. Inê kê bani bonasia ta na gete na nâ i ngekana, hanana i hagangêgo.”

¹⁰Vikê o Elia ki râ tanga i Sarepata. Matena i hagarangia râ na maani para na hinua, ngaia ki bâsia râ na gete na nâ i ruguni na ario. O Elia ki vi tanga, ki vi: “Inê kê pasi tono.”

¹¹Matena na gete ki tabea na ve, o Elia ki ngere, ki vi: “Torea me nikâ na bereti tangê.”

¹²Na gete ki arami, ki vi: “Inê kê tohe renia na Araha God mamauri iamu, vi inê kê pe nahunigi rârâ na bereti. Inê kê nahunia ma na kere koni tanga na bereti igê na apira, na ararina i vunuvunu ma na rimaku gi tage, ma na kere oile sisite igê na pi na hê. Inê kê râ me ikê, kê ruguni na kere ario, hanana gê migiaporo ma kê hahigi na kere koni tangagamirua o kareku menê. Ngaia ki na hagahatongina na ngêra iamamirua ma kamuru kahu mesi magêha.”

¹³O Elia ki vi tanga na gete, ki vi: “Siana ko tako bâraha. Râ ku hahi. Ma hagenago ko hahia na kere hêna na koni renia na oile go nahunigi ma ko torea me tangê. Ma hemuri ko kahu hahahi na koni i hitahita râ tangagamurua igo ma o karemu.

¹⁴Suria na Araha iata na Isiraelita ki vi vikê: ‘I asa vige hato na koni igê na apira ma na oile igê na pi na hê mataro me na tangiana gê page hagarangi nikâ igê inê na Araha.’”

¹⁵Na gete na nâ ki râ ma ki kato manga i vi o Elia. Ma ngaira hato ka nahunigi na ngêra ga ararigi na tangiani rako.

¹⁶Tagenana manga i bani tamasi na Araha i harana o Elia, vi na koni igê na apira ma na oile igê na pi na hê ki asa, vige page hato.

¹⁷Ki rârâ ma o karena na gete na nâ ki maeha. Na maeha ki raha ngavê tanga, rârâ ma ki me.

¹⁸Na gete ki vi tanga o Elia, ki vi: “Poropete, tanu hega ko kato vikana tangê? I hega, go râ me vari ikê, hanana go hagatakusia aporo God renigi na tasi iaku, tahema i katoa o kareku ki me?”

¹⁹O Elia ki arami, ki vi: “Me o karemu!” Vikê ngaia ki ragea na kere mane tenia kenana ma ki metagere igê na kiboru iana i haha, ma ki hagatâhia i bea.

²⁰Hemuri ngaia ki nunginungi raha, ki vi: “Araha God iaku, tanu hega ko hagamamasiaga apena bâraha na nâ ikê? Ngaia ki bani koro tangê ngavê, suria i marupeê. Ma ki tanu hega ko hagamesia o karena?”

²¹Hoi, o Elia ki tâhia hageoru na kare mane ma ki nunginungi, ki vi: “Araha God iaku, gu hagamauria aporo na kare ikê.”

²²Na Araha ki aganaria na nunginungiha iana o Elia. Na kare ki haganega ki manavaso ma ki mêri aporo.

²³O Elia ki mevato aporo na kere mane tanga kenana, ma ki vi tanga, ki vi: “Bâ, o karemu ki mêri aporo!”

²⁴Na gete ki arami, ki vi: “Hoi, i ngekê inê kê kahu tahetara renigo, vi igo ka na poropete iana God ma na Araha ki tamasi monari i haramu.”