Read Kahua 1 MAHERAHA 18 Bible Online

1 MAHERAHA 18 - Kahua bible

1 MAHERAHA 18

¹I ta na matena igê na oruta na harisi ni arito ru, na Araha ki vi tanga o Elia, ki vi: “Gu râ ku bâsia na maneraha o Agaba. Inê kê page hagarangi.”

²Vikê o Elia ki tavoraha ki râ. Na magêha ki nahuia ngavê i Samaria.

³Vikê o Agaba ki unia me o Obatia i bâsuria na ruma raha iana na maneraha. O Obatia ki rahesia maninga tare na Araha.

⁴Matena ka Isebele ki nahuira ka me na poropete iana na Araha, o Obatia ki merarâ vê na tangarê na poropete ngegana, ki pinihira igê na vaba gi rua: na tangahuru gi rima i rarona tani ma na tangahuru gi rima nikâ i rarona tani. Ngaia ki bâsurira renigi na ngêra ma na ve.

⁵O Agaba ki vi tanga o Abatia, ki vi: “Nika, garu râ karu bâsigi na ara ni ve banga ma na ara ni marave igê na agua, hanana garu tarahugi na go i ararira na hosi ma na tonki ga tahitahi igê. Manga i mareha, igia ka nanahuira nga tani na togoha iaka.”

⁶Ngairerua karu heriri vi i he ki arâ igê na ara ni hitangiterua ki bâbâ igê renigi na go. Vikê ngairerua karu râ hegitigi.

⁷Matena o Obatia ki arâ vê, ngaia ki parama ma ki mahetarahu o Elia. Ngaia ki bâgirara, ki susure, ki tubê so i ano ma ki hagatea, ki vi: “Ti kanigo? O Elia?”

⁸O Elia ki arami, ki vi: “Mako. O Elia kani inê. Gu râ ku hagarongoa na maneraha iamu, vi inê kê gâga ikê.”

⁹O Obatia ki hagatea, ki vi: “Na tarana ta kanigê erasia, tahema go obania, vigo tagareniê tanga na maneraha o Agaba, hanana vi nahuiê kê meme?

¹⁰Inê kê tohe renia na Araha God mamauri iamu, vi na maneraha ki bâbâ renigo igê na ara ni agua hato i maveta. I na ara ni matena ta na maneraha ki vivi, vi igo ko mareha igê na apanena iana, o Agaba ki bonasia na maneraha ngekana ki tohe vi ngaia ki pe tarahugo.

¹¹Tanu hega go obaniê, vigê arâ kê hagarongoa, vi igo ko gâga ikê?

¹²Manga ve panigo so ma be râ, na raramohana na Araha ki pe asa vige torego vê tanga ta na agua ga pe girara, vikana ke hega? Bâ, manga gê hagarongoa o Agaba, vi igo kanigo gâga ikê, ma ngaia ki pe tarahugo, ngaia ki page nahuiê kê meme. Go girara, vi inê kê bani rahesia maninga tare na Araha, haganega me tenia na matena gê sisite.

¹³Igo ko pe rongoa vari, na matena ka Isebele ki nahuira ka me na poropete iana na Araha, inê kê pinihira na tangarê na poropete ngegana igê na vaba gi rua: na tangahuru gi rima i tani ma na tangahuru gi rima i tani. Ma inê kê bâsurira renigi na ngêra ma na ve?

¹⁴Hoi, tanu hega kanigo bonasiê, vigê arâ kê hagarongoa na maneraha, vi igo ko gâga ikê? Ngaia ki page nahuiê kê meme nge!”

¹⁵O Elia ki arami, ki vi: “Inê kê tohe renia na Araha raramohaga hunia gê tagara tanga, vi i ngekê inê kê page arâ mareku kê bâsia na maneraha.”

¹⁶Vikana o Obatia ki râ i pasina na maneraha o Agaba ma ki hagarongoa. O Agaba ki râ vurusia o Elia.

¹⁷Matena o Agaba ki mehetarahu, ngaia ki vi: “I monari igo ko oga hete ikê. Igo na mane go oga sutaga i Isiraele!”

¹⁸O Elia ki arami, ki vi: “Inê ki mareha ve oga sutaga manga igamurua hete igo mo vaemamu. Igamurua kamuru aharêngigi na ramata iana na Araha ma kamuru vogasigi na nununa o Bala.

¹⁹Hoi, gu bonasira na Isiraelita hato ke mumuriê me tanga i hungana i Karemele. Go merarâ me na 450 na poropete iana o Bala ma na 400 na poropete iana ka Asera na ataro ka Isebele i marupera.

²⁰Vikana o Agaba ki bonasira na Isiraelita hato ma na poropete iana o Bala ka haku i hungana i Karamele.

²¹O Elia ki râ tangara na enoni ma ki vi: “Mu takoherua taraha? Manga vi na Araha ma ki God, hoi rahesia ngaia. Ma ki manga o Bala ma ki God, hoi, mu rahesia ngaia.” Ma na enoni ka muni ma.

²²Hoi, o Elia ki vi: “Inê gitageku ka na poropete iana na Araha gê hita so. Na poropete iana o Bala ka 450.

²³Torererua me na puruka mane gi rua. Na poropete iana o Bala ke torea na hitangiterua, ke nahuia ki meme, ke vuruvurusia ma ke naka igê na ario, ma siana ka tanga na gi igê. Ma inê kê katoa vikana nogaku tani.

²⁴Hemuri na poropete iana o Bala ka nungia na ataro iata ma inê nogaku be nungia na Araha. Nga noga ma na hitangiterua i tanga na gi, ngaia nga kani God.” Na enoni hato ka ngere, ka vi: “Ngaia ngekana!”

²⁵Hemuri o Elia ki tamasi tangara na poropete iana o Bala, ki vi: “Suria igamu kamu rako, hoi mu haganega kamu torea na puruka mane ma kamu hagarêa. Kamu nungia na ataro iami ki tanga na gi, siana vi igamu.”

²⁶Ngaira ka torea na puruka mane, ga bani urua me tangara ka hagarêa ma ka nungia o Bala haganega igê mavoraro mataro me na ritovagana. Ngaira ka ngere, ka vi: “Bala, gu aganarigami!” Ngaira ka ama ni mâmâ rihia nga na bea ni vogasiha ga bani tagarahia. Ma ki mareha rârâ vi na aramiha.

²⁷Igê na ritovagana o Elia ki haganega ki rurusira, ki vi: “Mu nunginungi raha! Na ataro ngekana! Ngaia ki bono vari na bêna renia ta na tarana! Ngaia ki râ vari ki hatare! Ngaia ki râ vari ki barebare! Ngaia vari ki mauru! Mu hagaritea vegamu!”

²⁸Vikê na poropete ka nunginungi, ka tamasi raha ngavê. Ngaira ka taritarira so mareta renigi na gê ma na gira surigi na tauha igê na rotu iata. Ki rârâ ma ki gogo na gaputa.

²⁹Ngaira ka ama ni mâmâ nga ma ka ngerengere rârâ mataro me i murina i pane na arito. Ma ki mareha rârâ vi na kere aramiha. I mareha ngavê.

³⁰Hoita, o Elia ki vi tangara na enoni, ki vi: “Mu guru me!” Ngaira hato ka aruru me rihia. O Elia ki haganega ki tagarahia aporo tanga na Araha na bea ni vogasiha i bani ahoge.

³¹Ngaia ki tavogi na hê tangahuru matarerua tonganigi na varo ninuni tangahuru matarerua iata o karena o Jakobo, na mane God i hêtana vi o Isiraele.

³²Ngaia ki tagarahia aporo na bea ni vogasiha tanga na vogasiha igê tanga na Araha renigi na hê ngegana. Ngaia ki oparia na tarana ruhu rihia. Na tarana ruhu hagenani ki vora na 40 mita.

³³Ngaia ki naka na ario igê na bea ni vogasiha, ki vuruvurusia na puruka mane ma ki nakagi na megani igê na ario. Ngaia ki vi: “Tigi me na pi na hê ge he ma kamu karangigi hurigi na megani na puruka ma na ario.” Ngaira ka kato vikana.

³⁴Ma o Elia ki vi: “Nikâ!” Ma ngaira ka kato vikana nikâ. Ngaia ki vi nikâ: “Hagetage kê nikâ!” Ma ngaira ka kato vikana nikâ.

³⁵Na ve ki gogo so tenia na bea ni vogasiha ma ki nonga igê na tarana ruhu.

³⁶I manurahi, igê na matena ni vogasiha, na poropete o Elia ki râ tanga na bea ni vogasiha ma ki nunginungi, ki vi: “Araha God iata o Abarahamo, o Isako mo Jakobo, go hagatanga monari, vi igo ka na God iata na Isiraelita ma vi inê ka na kariamu ma kê katogi na tarani hato ngegê suria na tamasinga iamu.

³⁷Araha, gu aganariê. Gu aganariê, hanana na enoni ngegê ke tahetara renigo, vi igo Araha ka na God ma ko hagaporosira me tangago maremu.”

³⁸Na Araha ki kasia me na gi ki ngêgi na megani na puruka, na ario ma na hê, ki singia ngavê na mako ma ki hagamamataria na ve igê na tarana ruhu.

³⁹Matena na enoni ka bâsia vikana, ngaira ka tubê so i ano ma ka tamasi raha, ka vi: “Na Araha nga ki God! Na Araha ngaia getea ma ki God!”

⁴⁰O Elia ki bonasira, ki vi: “Ranguira na poropete iana o Bala! Siana tani ki gavagava!” Na enoni ka ranguira ngaira hato. O Elia ki torera vato tanga na ve i Kisone ma ki mutera igê.

⁴¹Hemuri o Elia ki vi tanga na maneraha o Agaba, ki vi: “Hoi, râ ku ngê. Inê kê rongoa na rangi i vahao me.”

⁴²Matena o Agaba ki râ ki ngêngê, o Elia ki tagere tanga na botena na hungana i Karamele. I ngekana ngaia ki susure igê ki tubê so i ano. Na bêna i berarogaterua na buru êgana.

⁴³Ngaia ki vi tanga na kariana, ki vi: “Râ ku bâ ataha i asi.” Na kariana ki râ, ki aporo me ma ki vi: “Inê kê pe bâsia rârâ ta na marâ.” O Elia ki vi hagepi tanga na kariana, ki râ ki bâ.

⁴⁴Na pita na matena i aporo me igê, ngaia ki vi: “Inê kê bâsia râ na kere vaha i taromega teharia na rimana na enoni, i akê me i asi.” O Elia ki bonasia na kariana, ki vi: “Gu râ ku vi tanga na maneraha o Agaba, ke tagiria na kati ni me iana ma ke aporo i pasina, i era ma na rangi ki hagabarasia.”

⁴⁵I page arihu ma na vavearo ki puru renigi na roto ni rangi, ki haganega ki roga ma ki ata me na bagarangi raha. O Agaba ki tagiria na kati iana ma ki râ ki aporo tanga i Jeserele.

⁴⁶Na raramohana na Araha ki angaria o Elia. Ngaia ki rumia akê na gahu iana ki rugia renia na kâna ma ki tango tanga i Jeserele i nago tarana o Agaba.