Read Kahua 1 MAHERAHA 19 Bible Online

1 MAHERAHA 19 - Kahua bible

1 MAHERAHA 19

¹Na maneraha o Agaba ki hagarongoa ka Isebele kaniana renigi na tauhana o Elia ma manga i he ki mutera na poropete hato iana o Bala.

²Ka Isebele ki kasi tamasinga tanga o Elia, ki vi: “Na ataro ke hagamesiê, manga vi inê ma kê pe katogo manga igo bani katora na poropete igê na matena manga i ngekê i gomaha.”

³O Elia ki magu ma ki gava tanga na manavana. Ngaia ki merâ na kariana ma ki râ tanga i Bereseba i Juta. O Elia ki pania so na kariana i ngekana,

⁴ma ngaia getea ki râ na tangiana hagenani igê na bagamasusu raha. Ngaia ki mamaro ma ki oga so igê na mamarugana na apinige ma ki obania vi meme igê. Ngaia ki nunginungi, ki vi: “Araha, i uhu noga. Gu nakê be me! Be me surira na êvariku.”

⁵O Elia ki tâ so i mamarugana na apinige ma ki mêru. Na angero ki parama ma ki hagaritea, ki vi: “Rite. Ku ngê!”

⁶Ngaia ki bâ rârâ ma ki bâsia na guana na bereti henia na pi na ve hagarangia so ma na bêna. Ngaia ki ngê ma ki tono ma ki tâ so aporo nikâ.

⁷Na angero iana na Araha ki aporo me ma ki hagaritea nikâ, ki vi: “Aharaga ku ngê, suria i borahu na tara tangago.”

⁸O Elia ki aharaga, ki ngê ma ki tono. Na ngêra ki hagagata na apena ki râ surigi na tangiani tangahuru ge he tanga na hungana apuna i Sinai.

⁹I ngekana ngaia ki bêbanu igê na vaba ma ki mêru igê matena i bungi. Ki parama na Araha ma ki hagatea, ki vi: “Elia, go râ me ikê tanga na ta?”

¹⁰O Elia ki arami, ki vi: “Araha God raramohaga hunigo, inê kê tagara tare tangago, tangago igo getego ma. Na Isiraelita ka aharêngia na suruheri iata henigo, ka hogegi na bea ni vogasiha iamu ma ka mutera na poropete hato iamu, nga noga ma inê geteê kanigê hita so. Ngaira ka rapasiê, viga nahuiê kê meme!”

¹¹Na Araha ki vi tanga, ki vi: “Gu hura me ma ku ura heniê igê na botena na hungana.” Hoi, na Araha ki ri. Na roga raha ngavê ki nanago tarana na Araha ki vagarigi na hungani ma ki menamenarigi na hê. Ma na Araha ki mareha igê na roga. Na roga ki hato ma ki nunu. Ma na Araha ki mareha igê na nunu.

¹²Matena i hato na nunu, na gi ki râ me. Ma na Araha ki mareha i rarona na gi. Ki hato na gi, ma ki râ me na mamava.

¹³O Elia ki rongoa ma ki buhia na maana renia na aruhana ma ki hura ki ura igê na teha igê na vaba. Na ringe ki hagatea, ki vi: “Elia, go râ me ikê tanga na ta?”

¹⁴O Elia ki arami, ki vi: “Araha God raramohaga hunigo. Inê kê tagara tare tangago, tangago igo getego ma. Ma na Isiraelita ka aharêngia na suruheri iata henigo ma ka mutera na poropete hato iamu, nga noga ma inê kanigê hita so geteê. Ngaira ka rapasiê viga nahuiê kê meme.”

¹⁵Na Araha ki vi: “Gu aporo tanga na bagamasusu raha hagarangia i Tamasiko. Hemuri ko bêbanu i hinua ma ko monea o Hasaele ki maneraha i Siria.

¹⁶Go monea nikâ o Jehu karena o Nimisi ki maneraha i Isiraele, ma ko monea o Elisa karena o Sapata tenia i Abele Magola ki poropete urusigo.

¹⁷Na ani, ga gava ka tahitahi tenia o Hasaele i rapasira vi nahuira ka meme, o Jehu kani page nahuira ngaia. Ma na ani, ga gava ka tahitahi tenia o Jehu, o Elisa kani page nahuira ngaia.

¹⁸Henaka, ma inê kê page nakara vê ma na rehagaro gi pi na enoni ka tahitahi i Isiraele, suria ngaira ka toto suriê ma ka pe vogasia o Bala se vige siginia na nununa.”

¹⁹O Elia ki râ ma ki tarahua o Elisa, i hagatagarahirerua na puruka gi rua karu horogi na mako tanga na mu. Na mane tangahuru matare tage ka tagara ka nanago tarana. Na ara ni hitangita ki hagatagarahirerua na puruka gi rua. O Elisa ki hagemuri. O Elia ki tasia râ na aruhana ma ki hagatugunia o Elisa renia.

²⁰O Elisa ki panirerua so na puruka, ki tangohia o Elia ma ki vi: “Gu nakê be siginirerua noga o vaemaku ma kenaku kê aruirerua ma kê kahu takugo. O Elia ki arami, ki vi: “I koro ma. Gu aporo. Inê kê pe manimanigo.”

²¹Hoi, o Elisa ki aporo tangarerua na puruka iana, ki nahuirerua karu me, ma ki hagamako na hasigoterua. Ngaia ki tanga na gi renia na totora iaterua. Ngaia ki vatera na enoni na hasigoni ma ngaira ka ngê. Hemuri ngaia ki râ ma ki takua o Elia, hanana i tamania.