Read Kahua 1 MAHERAHA 20 Bible Online

1 MAHERAHA 20 - Kahua bible

1 MAHERAHA 20

¹O Benihatata na maneraha i Siria ki hagahakura na mane ni me hato iana. Na maneraha getera tangahuru gi oru matarerua ka tamania renigi na hosi ma na kati ni me iata. Ngaia ki tavo uga ma ki oga rihia i Samaria ma ki taharia.

²Ngaia ki hagatorangenira banu i hinua na mane tora tamasinga tanga o Agaba na maneraha i Isiraele, ka vi: “Na maneraha o Benihatata ki bonasigo,

³vigo tagarenigi na siliva ma na golo iamu tanga henira kaniamu ma henira o karemu ga ramo.”

⁴O Agaba ki arami, ki vi: “Mu hagarongoa o Benihatata na tamaku, vi inê kê aganaria na tamasinga iana. I koro ma ki nahuniê henigi na ara ni nahuninga iaku.”

⁵Hemuri o Benihatata ki hagatorangenira nikâ na mane tora tamasinga tanga o Agaba, ki vi: “Inê kê bani bonasigo, vigo tagarenigi tangê na golo ma na siliva iamu henira kaniamu ma henira o karemu.

⁶Hoi, inê kê page hagatorangenira na kariaku ka garigari i ruma raha iamu ma i ruma iata na mane ni hagaotonga iamu, hanana ga toregi na ara ni marâ ga takusigi viga koro. Ngaira ka page atata vê i pasimu i gomaha matena manga i ngekê.”

⁷Na maneraha o Agaba ki unihakura me na meraha hato i na agua ma ki vi tangara, ki vi: “Igamu kamu bani girara, vi o vani ngekana ki obania vi têtê erasigia ngavê. Ngaia ki kasi tamasinga me tangê, ki bonasiê, vigê tagarenira kaniaku tanga henira o kareku ma henigi na siliva ma na golo iaku. Ma inê kê aganaria.”

⁸Na meraha ma na enoni ka arami, ka vi: “Siana ko tê ringena. Naka vê!”

⁹Vikê o Agaba ki aramira na mane tora tamasinga iana o Benihatata, ki vi: “Mu hagarongoa na maneraha o Benihatata, vi inê kê aganaria na tamasinga hagenago iana ma na ruata na tamasinga iana ki mareha.” Na mane tora tamasinga ka râ ma o Benihatata ki hagatorangenira aporo nikâ, ki vi:

¹⁰“Inê kê page merarâ me rako na mane ni me, hanana ga ruhuruhua na hinua iamu ma ka page sinoa ngavê. Na ataro ke nahuiê be me, manga vi mareha.”

¹¹Na maneraha o Agaba ki arami, ki vi: “Siana ko tamasi rasigo. Na hearihatana ki mamênga vige hatohato.”

¹²Na aramiha iana o Agaba ki tarahua o Benihatata, matena ngaia ma na maneraha getera ga tamania ka tono igê na ruma na gahu iata. Ngaia ki bonasira na mane ni me iana ka nanê hanana viga taharia na hinua. Nikâ ngaira ka ura tongatonga igê na atohata.

¹³I na matena ngekana ta na poropete ki râ i pasina na maneraha o Agaba ma ki vi tanga, ki vi: “Na Araha ki vi, vi siana ko magutenira na mane ni me gahu. Inê kê page katogo ko teharira i ngekê, ma ko page tahetara, vi inênga ka na Araha.”

¹⁴O Agaba ki hagatea, ki vi: “Ti kani haritaha hagenago?” Na poropete ki arami, ki vi: “Na mane ga bâsurigi na apaneni na agua henira na mane ni me na gapu haoru iata.” Na maneraha ki hagate, ki vi: “Ma o ti kani page bêngenira na mane ni me hato getera?” Na poropete ki arami, ki vi: “Kani igo!”

¹⁵Vikê na maneraha ki unira na mane ni me na gapu haoru iata na mane ga bâsurigi na apaneni na agua. Ngaira hato ka vora 232. Ma hemuri ngaia ki unira na mane ni me na Isiraelita. Ngaira hato ka vora na 7,000.

¹⁶Na hearihatana ki taha igê na ritovagana, matena o Benihatata ma na maneraha tangahuru gi oru matarerua ga tamania ka tono ki ruguhira igê na ruma na gahu iata.

¹⁷Na mane ni me na gapu haoru ka haritaha hagenago. Na mane ni râ bâbâha iana o Benihatata ka hagarongoa, vi tapanena me ka hura me tenia i Samaria.

¹⁸O Benihatata ki haribona, ki vi: “Mu ranguira ma siana kamu nahuira ka meme, naka vi ngaira ma ka arâ me tanga na hearihatana se vi tanga na marapeha.”

¹⁹Na mane ni me na gapu haoru ka haritaha hagenago ma na mane ni me na Isiraelita ka mumurira.

²⁰Na ara ni hitangita ki nahuia ki meme na mane ni me i meheariha. Na me ni Siria ka gava. Na Isiraelita ka tarigenira ngavê. O Benihatata ki gava igê na hosi iana henira tani na mane ni me igê na hosi iata.

²¹Na maneraha o Agaba ki râ nogana henira na me iana igê na agua ni hearihatana ki henahuraura na hosi henigi na kati ni me, ma ki purira so i ano na me i Siria.

²²Hemuri na poropete ki râ i pasina na maneraha o Agaba ma ki vi: “Gu aporo ma ku hagarêra na mane ni me iamu ma ko katokato maninga, suria na maneraha i Siria ki page taharigo nikâ igê na oruta se na heta na hageha igê na harisi haoru.”

²³Na mane ni hagaotonga iana o Benihatata na maneraha ka vi tanga, ka vi: “Na ataro iata na Isiraelita ka na ataro ni mu. Tahema na Isiraelita ka teharigia. Ma igia ka page teharira manga vi igia ma ka meraheariha igê na tarasini.

²⁴Hoita, gu hatungira na maneraha tangahuru gi oru matarerua, hanana siana ka bêngenira nikâ na mane ni me, ma ko urusira renira na mane ga bâsurigi na apaneni na agua.

²⁵Go hagahakura na mane ni me ga gahu manga na mane ni me ga reke i bêmu. Na hosi ma na kati ni me ga gahugahu nikâ manga i nago. Igia ka page meraheariha na Isiraelita igê na tarasini ma i ngekana igia ka page teharira igê.” Na maneraha o Benihatata ki aganarira ma ki râ surigi na tamasinga iata.

²⁶Matena i bani haganega na harisi haoru, ngaia ki hagahakura na mane ni me iana ma ki meratavo uga tanga na hinua i Apeke, hanana ga taharia i Isiraele.

²⁷O Agaba ki hagahakura na mane ni me na Isiraelita ma ki hagarêra. Ngaira ka tavo uga ma ka tênga ka maatira na ai ni Siria. Na tênga gi rua iata na Isiraelita karu bâ mangarerua na kere totoha gi rua na goti, ma na ai ni Siria ka manasia na bena hagenani.

²⁸Ta na poropete ki râ i pasina na maneraha o Agaba ma ki vi: “Na Araha ki vi vikê: Suria na ai ni Siria ka visiê, vi inê ka na ataro ni bemu ma ki mareha vi ni tarasini, hoi, inê be katogo ku teharira na mane ni me gahu iata ma igo ma na kariamu kamu page tahetara, vi inênga ka na Araha.”

²⁹Surigi na tangiani gi pi na ai ni Siria ma na Isiraelita ka ogasigi na tênga hegitigi iata ka matohetanga. Igê na pita na tangiana ngaira ka haganega ka heariha. Na Isiraelita ka nahuira ka me na 100,000 na ai ni Siria.

³⁰Na ani ga tahi ka gava banu igê na hinua i Apeke. Na para ni hinua ka guguru hunira na 27,000 na hitangita. O Benihatata ki gava banu nikâ igê na hinua ma ki ahi igê na kiboru i murina banu na ruma.

³¹Na mane ni hagaotonga iana ka vi tanga, ka vi: “Igami kami rongo, vi na maneraha iata na Isiraelita ka girara ga hetaki. Gu nakagami, kami hagesuru kakaga ma kami kuharenigi na varo i riomami ma kami arâ i pasina na maneraha iata na Isiraelita. Vikana ngaia ki asa vige nahuigo ku meme vari.”

³²Hoi, ngaira ka hagesuru kakaga ma ka kuharenigi na varo i riota ma ka râ i pasina o Agaba, ka vi: “O Benihatata na kariamu ki avarasigo, siana ko nahuia ki meme.” O Agaba ki arami, ki vi: “E, i tahitahi mênga? Koro era! Ngaia ki manga na goaku!”

³³Matena na mane ni hagaotonga iana o Benihatata ka rongoa o Agaba i vi ‘Goaku’, ngaira ka takusia vi i koro. Tahema ngaira ka vi: “Go vi koro. O Benihatata ka no goamu!” O Agaba ki haribona, ki vi: “Merâ me.” Matena o Benihatata ki ata me, o Agaba ki vi tanga, ki tage henia igê na kati ni me.

³⁴O Benihatata ki vi tanga o Agaba, ki vi: “Inê be haganahunigo aporo renigi na hinua i henahuraugi o vaemaku tenia o vaemamu, ma be katogo ku tagarahia na ruma ni hagavarahi haga i Tamasiko tangago maremu tagenana manga o vaemaku i kato vikana i Samaria.” O Agaba ki arami, ki vi: “Manga ngekana, hoi, inê be nakago vê ku râ.” Ngaia ki naka na suruheri henia ma ki naka vê ki râ.

³⁵Na Araha ki bonasia na hitangita na poropete ki vi tanga na tamana, hanana vi bahitaria. Ma na tamana ki usi.

³⁶Vikê ngaia ki vi tanga, ki vi: “Suria igo ko haritohea na Araha, na laione ki page garagara hunigo igê nga na matena go huhura vê ko arâ paniê.” Igê nga na matena i râ vê, na laione ki râ me ki garahunia.

³⁷Hoi, ngaia ma nikâ na poropete ngekana ki mehetarahu ta na mane ma ki vi tanga, ki vi: “Gu bahitariê.” Na mane ngekê ki bahitaria raha ngavê na poropete ma ki hagamamaria.

³⁸Na poropete ki baraia marena na maana renia na gahu, hanana siana ka bâbâgirara. Ngaia ki râ ki ura i na akerena na tara, karia na maneraha iata na Isiraelita i riri i ngekana.

³⁹Matena na maneraha ki râ me ki ri, na poropete ki ngiria, ki vi: “Maneraha, inê kê oga igê na hearihatana, matena ta na mane ni me ki merâ me tangê na mane ni me i henahuraua. Ngaia ki vi tangê, ki vi, ‘Go bâbâsuria o vani ikê. Manga i gavagava, igo ko page meme se go kasikasi haga na 3,000 na maani na siliva.’

⁴⁰Ma inê kê bari surigi na ani getigi na marâ ma na mane ki gava.” Na maneraha ki arami, ki vi: “Igo ko bani surigo maremu. Igo ko bani girara na hagaitangiha tangago.”

⁴¹Na poropete ki tasia râ na gahu tenia na maana ma na maneraha ki bâgirara ototo râ, vi ngaia ka na hitangita na poropete.

⁴²Hoi, na poropete ki vi tanga na maneraha, ki vi: “Na Araha ki tamasi tangago vikê: Suria go naka vê na mane ki gava, henaka gê vi tangago vigo nahuia ki meme, tahema igo ko page meme ma na mane ni me iamu ka page meme nogata, suria ga nakara vê ka gava na mane ni me iana ngaia.”

⁴³Na maneraha ki aporo i pasina i Samaria. Ngaia ki anumanuma ma ki bagamangamangariaga.