Read Kahua 1 MAHERAHA 22 Bible Online

1 MAHERAHA 22 - Kahua bible

1 MAHERAHA 22

¹Surirerua na harisi gi rua na Isiraelita ma na ai ni Siria ka pe heariha rârâ igê. Na marapeha ki oga i berarogata.

²Ma igê na oruta na harisi o Josapata na maneraha i Juta ki râ ki bâsia o Agaba na maneraha i Isiraele.

³O Agaba ki hagatera na mane ni hagaotonga iana, ki vi: “Tanu hega igia ka pe uhungia rârâ, vige têa aporo i Ramote i Gileata tenia na maneraha i Siria? Na hinua iaka ngekana!”

⁴Hoi o Agaba ki hagatea o Josapata, ki vi: “I hega, igo ko arâ me heniê karu taharia i Ramote?” O Josapata ki arami, ki vi: “Mako, inê kê nanê matena go nanê, ma nikâ na mane ni me iaku ma na hosi iaku.

⁵Ma ki naka ke hagatea hagenago na Araha.”

⁶Vikana o Agaba ki unira me na poropete, na ararina na tangarê gi he ma ki hagatera, ki vi: “I hega, i koro ma vigê arâ kê taharia i Ramote se mareha?” Ngaira ka arami, ka vi: “Gu taharia. Na Araha ki page katogo ko teharia.”

⁷Ma o Josapata ki hagatea o Agaba, ki vi: “I hega, i mareha vi ta na poropete râ nikâ, hanana vige hagatea na Araha tangagia?”

⁸O Agaba ki arami, ki vi: “Ua, na ani gi tage kani gâga mênga, o Migaiehu karena o Imila. Ma inê kê usitenia, suria ngaia ki pe tamasi poropete renigi noga na tarani vige koro tangê, ma na tarani ga era ma tangê.” O Josapata ki arami, ki vi: “Siana ko vi vikana.”

⁹Vikê o Agaba ki unia banu na mane ni hagaotonga ma ki bonasia, ki râ ki merâ me ototo râ o Migaiehu.

¹⁰Na maneraha gi rua karu tuguni renigi na tuguni i marisiterua vi na maneraha. Ngairerua karu oga so igê na atohaterua igê na agua ni hatanga i metara na maani para i Samaria. Na poropete hato ka tamasi poropete i maaterua.

¹¹O Sitikia karena o Kenana na hitangita ki nakarerua i bêna na aiani na hona ma ki tamasi tanga o Agaba, ki vi: “Na Araha ki vi vikê: Renirerua na honi ngegê igo ko page nahuira na ai ni Siria ma ko page teharira ngavê.”

¹²Na poropete hato getera ka tamasi nogata ka vi: “Taharia i Ramote i Gileata! Igo ko page teharia.” Ngaira ka vi: “Na Araha ki page katogo ko teharia.”

¹³Ngekana na mane ni hagaotonga i bani merâ me o Migaiehu, ki vi tanga o Migaiehu, ki vi: “Na poropete hato getera ka tamasi poropete renigi na marâ hato viga page tavoraha bâkoro ma tanga na maneraha. I ararigo, vigo tamasi vikana nogamu.”

¹⁴Ma o Migaiehu ki arami, ki vi: “Inê kê tohe renia na Araha mamauri, vi inê kê page tamasigi ma na marâ i hagatorê renigi!”

¹⁵Matena i ura i maana na maneraha o Agaba, o Agaba ki hagatea, ki vi: “Migaiehu, i hega, i arari ma vi igamirua na maneraha o Josapata menê kamuru arâ kamuru taharia i Ramote i Gileata se mareha?” O Migaiehu ki arami, ki vi: “Mako! Taharia. Igamurua kamuru page tehateha. Na Araha ki page katogamurua kamurua tehateha.”

¹⁶Ma o Agaba ki arami, ki vi: “Go tamasi nga igê na monariha, matena go tamasi urusia na Araha! Hagarako inê kê bani tamasi tangago vikana.”

¹⁷O Mikaiehu ki arami, ki vi: “Inê kê bâsia, vi na mane ni me na Isiraelita ka totoko surigi na hungani mangara na sipi i mareha na ani hanana vige bêngenira. Nakara ke aporo suri parongata i pasita!”

¹⁸O Agaba ki vi tanga o Josapata, ki vi: “I hega, inê kê pe bani vi tangago, vi ngaia ki mareha rârâ vige tamasi poropete renigi na tarani ge koro tangê. Tarema na tarani ga pe koro tangê!”

¹⁹Ma o Mikaiehu ki vi: “Karinga na tamasinga iana na Araha! Inê kê bâsia na Araha ki oga igê na atohana i pasina. Na angero hato iana ka ura hetangenia.

²⁰Na Araha ki hagatera, ki vi, ‘Ti na hitangimi kani page hagabekasia o Agaba, hanana vi arâ tanga i Ramote, ka nahuia ki meme igê?’ Tani na angero ka visia ta na marâ ma tani ka visia ta na marâ getea.

²¹Rârâ ma ta na angero ki ura râ tanga na Araha ma ki vi, ‘Inê be hagabekasia.’

²²Na Araha ki hagatea, ki vi, go hagabekasia hega? Na angero ki arami, ki vi, ‘Gê page arâ kê katora na poropete hato iana o Agaba ka hagaparu.’ Na Araha ki vi, ‘Gu râ ku hagabekasia. I girara ma!’”

²³O Migaiehu ki hatungia na tamasinga iana, ki vi: “Nga hanana ngekana! Na Araha ki katora na poropete iamu ngegana ka hagabekasigo, suria ngaia marena ki bani naka vi na bagabevoana ki page tarahugo.”

²⁴Hoi, na poropete o Sitikia ki ura râ tanga o Migaiehu ma ki bahitaria ma ki hagatea, ki vi: “I tanu hega? Na raramohana na Araha ki hato teniê inê vari ma ki angarigo igo hanana go tamasi poropete?”

²⁵O Migaiehu ki arami, ki vi: “I ta na tangiana igo ko page ahiahi i murina banu ta na ruma ma ko kahu girara.”

²⁶Hoi, na maneraha o Agaba ki haribona, ki vi: “Hagatotongoa o Migaiehu ma kamu torea tangarerua o Amone, i bosuria na hinua ma o kareku o Joasa.

²⁷Vi tangarerua karu kasia i ruma ni hagaitangiha ma karu hagangêa renigi ma na bereti ma na ve mataro me kê aporo me purupurungunihaga.”

²⁸O Migaiehu ki vi: “Manga go aporo me purupurungunihaga, ngekana, ki vi, vi na Araha ki pe tamasi i haraku!” Ngaia ki vi nikâ: “Igamu hato mu karinga na tamasinga iaku.”

²⁹Hemuri o Agaba na maneraha i Isiraele mo Josapata na maneraha i Juta karu râ ma karu taharia na hinua i Ramote i Gileata.

³⁰O Agaba ki vi tanga o Josapata, ki vi: “Matena garu arâ tanga na hearihatana, inê kê atani gahugahu mavê, hanana na enoni ki asa vige bâgirarê, ma igo ma kanigo tuguni nga manga na maneraha.” Vikê na maneraha i Isiraele ki atani tuguni mavê matena i râ tanga na hearihatana.

³¹Na maneraha i Siria ki bani bonasira na mane tangahuru gi oru matara gi rua ga bêngenira na mane ni me igê na kati ni me, hanana ga taharia na maneraha i Isiraele, mareha rârâ vi tani getea râ nikâ.

³²Vikê matena ga bâsia na maneraha o Josapata, ngaira hato ka takusia ma, vi ngaia ki na maneraha i Isiraele ma ngaira ka ahoro tanga ka taharia. Ma na matena i ngere,

³³ngaira ka kahu girara, vi ngaia ki mareha vi na maneraha i Isiraele, ma ka naka vê ma, ma ka pe taharia.

³⁴Ma ki akê me, ngaia na mane ni me ni Siria ki hanatenia na mage. Na mage ki tarabanu igê na berarogani na ênahina na tuguni ni hearihatana iana o Agaba na maneraha ma ki hagamamaria. O Agaba ki vi tanga na mane i torea na kati ni me iana, ki vi: “Inê kê mamari! Gu kariarigu! Toreê hura tenia na hearihatana!”

³⁵Matena i akê me bâraha ngavê na hearihatana na maneraha o Agaba ki têa ki ura igê na kati ni me iana, ki maatira na ai ni Siria. Na gapuna ki gogo tenia na mamariha iana, ki so ki gahuia na rarona na kati. Ngaia ki me igê na manurahitagana.

³⁶Matena i susu noga na arito, na tamasinga ki râhigi na harahara hato na Isiraelita, ki vi: “Mu aporo i pasimi, igamu hato!”

³⁷Nga hanana i me na maneraha o Agaba ngekana. Na gahuana ka torea râ i Samaria ma ka bagia igê.

³⁸Na kati ni me iana ka tanania igê na nonganonga i Samaria. Na o ka namigi na gapuna ma na êrâ ka mamanu igê, manga i bani visia na Araha.

³⁹Na tauhana hato getigi o Agaba na maneraha henigi na sihonga renia manga i he kani hagamahea na ruma raha iana renigi na marâ ga bâkoro ma henigi na sihonga renigi na hinua hato i tagarahigi, ngaigi ka bani segegi so igê na buka na sihonga renira na maneraha i Isiraele.

⁴⁰Matena i me, o Agasia o karena ki maneraha urusia.

⁴¹Matena na maneraha o Agaba ki bani marungia i Isiraele surigi na harisi ge he, o Josapata karena o Asa ki vora re na maneraha i Juta,

⁴²matena i tangahuru gi oru matare rima na harisi iana. Ngaia ki oga i Jerusaleme ma ki marungia i Juta surigi na harisi tangahuru gi rua matare rima. Kenana kani ka Asuba ka karena o Siligi.

⁴³Tagenana manga o Asa o vaemana, ngaia nogana ki katogi na tarani ga oto i maana na Araha. Ma na agua ni vogasiha ahuroto ka pe hagamagahurugi ma na enoni ka ama ni vogasi ma ka susu nga igê.

⁴⁴O Josapata ki mehekorokoro na maneraha i Isiraele.

⁴⁵Na tauhana hato getigi o Josapata ma na togeaganiha hato iana igê na hearihatana ka bani segegi so igê na buka na sihonga renira na maneraha i Juta.

⁴⁶Ngaia ki hagamagahurura na êrâ hato, na mane ma na gete, ga tagara igê na agua ga oga igê na bea ni vogasiha ahuroto, na ani ga hita râ igê na matena iana o Asa o vaemana.

⁴⁷I Etome ki mareha rârâ na maneraha. Na maneraha i Juta ki atea na mane i marungia i Etome urusia.

⁴⁸Na maneraha o Josapata ki tagarahigi na haka ni rârâha hagatê, hanana ga arâ tanga i Opiri tangagi na golo. Ma na haka ka abotabota i Esione Gebere ma ki mareha vige râ.

⁴⁹Hemuri o Agasia na maneraha i Isiraele ki meherongorongo o Josapata, vi na kariaterua ngairerua hato ka toregi na haka, ma o Josapata ki usi.

⁵⁰O Josapata ki me ma ka bagia igê na matahuta na maneraha i Hinua iana o Tavite, ma o Jehorama o karena ki maneraha urusia.

⁵¹Matena o Josapata ki bani maneraha i Juta surigi na harisi tangahuru gi tage matare pi, o Agasia karena o Agaba ki vora re na maneraha i Isiraele. Ngaia ki oga i Samaria ma ki marungia i Isiraele surirerua na harisi gi rua.

⁵²Ngaia ki murisigea na Araha. Ngaia ki râ surigi na bagatauhata o Agaba o vaemana, ka Isebele kenana ma o Jerobeama na maneraha ga hagatasira na Isiraelita.

⁵³Ngaia ki vogasia ma ki hagarapea o Bala tagenana manga o vaemana ma ki hagamangaria na Araha God iata na Isiraelita.