Read Kahua 1 MAHERAHA 3 Bible Online

1 MAHERAHA 3 - Kahua bible

1 MAHERAHA 3

¹O Salomo ma na maneraha ni Esipito karu suruheri ma o Salomo ki êragia ka karena na maneraha ni Esipito. Ngaia ki merâ ki oga i hinua iana o Tavite mataro me ki tagarahigi na ruma raha iana ma na ruma ni rotu ma na para rihuia i Jerusaleme.

²Na ruma ni rotu ki mamênga vige tagarahia tanga na Araha. Tahema na enoni ka ama ni vogasi nga igê na bea ni vogasiha getigi.

³O Salomo ki takuia na Araha ma ki râ surigi na hagesuringa iana o Tavite o vaemana. Ma ngaia nikâ ki nahuira na sipi ma na marâ vigana ma ki susu renira igê na bea ni vogasiha getigi.

⁴I ta na tangiana ngaia ki râ i Gibeone, hanana i vogasi igê, suria i ngekana ki oga igê na bea ni vogasiha i rongo raha na atana. I nago ngaia ki bani susu noga igê renira na rehagaro na sipi ma na marâ vigana.

⁵Igê na bungiana ngekana na Araha ki vora tanga igê na maruteha ma ki hagatea, ki vi: “Na ta ko obaniê vigê vatego renia?”

⁶O Salomo ki arami, ki vi: “Igo ko takuia bâraha o Tavite o vaemaku na kariamu, suria i hagakoro obamu, ki toto surigo ma ki pe haritohego. Igo ko ama ni takuia bâraha nga tare, suria go haganahunia renia na kare mane, i maneraha i ngekê urusia.

⁷Araha God, igo ko nakê kê maneraha urusia o vaemaku, henaka inê kê karekare ma kê pegirara mênga, hanana vi ve maneraha.

⁸Bâ, inê kê oga i berarogata na enoni go bani atera tangago maremu, na enoni ga gahu teha ngavê. I asa vige tomanira.

⁹Gu hagamataha obaku, hanana ve marungira maninga na kariamu ma hanana ve giraragi na ta ka koro ma na ta ka era. Manga i mareha, inê ki bara tangê vi ve marungira na kariamu ga gahu.”

¹⁰Na Araha ki vagevage, suria o Salomo ki nungia na tarana ngekana.

¹¹Tahema ngaia ki vi tanga, ki vi: “Suria igo ko nungiê renia na takoha mataha ma ki mareha vi renia vigu mauri arihu, se vigu ruruguha, se vige meme na merongamu,

¹²hoi, inê be aganaria na nungiha iamu. Inê be haganahunigo renigi na takoha mataha ma na giraraha teharia na ani mavê na enoni i nago ki râ me ma i hemuri nikâ.

¹³Nikâ inê be haganahunigo renia na marâ go pe nungiê renia. Suria na ogaha hagenani iamu igo ko page ruruguha teharira na ani getera na maneraha ma na enoni ka page hagahigasigo igo teharira.

¹⁴Ma ki manga go têtê viteaku ma ko marupegi na ramata ma na hagesuringa iaku manga o Tavite o vaemamu, hoi, inê kê page katogo ko mauri arihu nikâ.”

¹⁵O Salomo ki rite ma ki tahetara, vi God kani tamasi tanga igê na maruteha. Hoi, ngaia ki aporo i Jerusaleme ma ki râ ki ura i maana na Bokesi na Suruheri iana na Araha ma ki susu igê tanga na Araha ma ki vogasia igê renigi na ngêra ni ngê haku. Hemuri ngaia ki magoto tangara na kariana, ma na mane ni hagaotonga iana.

¹⁶I ta na tangiana na êrâ gi rua karu râ karu bâsia na maneraha o Salomo.

¹⁷Na hitangiterua ki vi: “Maneraha, ka ani ikê menê kamuru oga i ruma gi tage. Inê kê apara na kare mane i ruma ngekana, matena ngaia ki oga i ngekana.

¹⁸Matena gê apara ki hato na tangiani gi rua, ngaia ki apara na kare mane nogana. Igamirua getegamirua ma kani muru oga i ruma ngekana. I mareha rârâ ta na enoni nikâ henigamirua.

¹⁹Hoi, i ta na bungiana ngaia ki ahoro ki piringihunia o karena.

²⁰Ngaia ki rite igê na bungiana ma ki ragea teniê o kareku, matena gê mêru bore. Ngaia ki torea râ i bea iana ma ki urusia me tangê renia o karena i me.

²¹Ki tangi me matena gê rite, inê kê obania vigê susu o kareku, ma kê bâsia ma i bani me. Inê kê hahariria ma ki pe bâ manga vi o kareku.”

²²Hoi, ma tani ki vi: “I asa vê! Na ani i mauri na kare ka na aniku inê, ma na ani i me ka na animu igo!” Na gete i tamasi hagenago ki arami, ki vi: “I asa vê! Na kare i me ka na animu maremu igo ma na ani i mauri ka na aniku inê!” Ngairerua karu hetuguri vikana i maana na maneraha.

²³Hoi, na maneraha o Salomo ki vi: “Na hitangimurua ki vi, na kare i tahitahi ka na anina, ma na ani i me ki mareha.”

²⁴Ngaia ki vi tanga na kariana ki merâ me na tatapa borahu. Matena i merâ me,

²⁵o Salomo ki vi: “Gu rete vagaria i gupu na ani i mauri na kare, hanana ngairerua na gete karu tongani na apaneni.”

²⁶Kenana monari ki mesia ngavê o karena ma ki vi tanga na maneraha, ki vi: “Siana maneraha! Siana ki nahuhunia o kareku! Gu vatea ka ani akana!” Ma na gete akana ki vi: “Siana ko vatea na hitangimurua. Gu rete vagaria nga i gupu hete.”

²⁷Hoi, o Salomo ki vi tanga na kariana ki vi: “Siana ko nahuhunia na kare. Gu vatea na ani ikê na gete, suria ngaia kani kenana monari.”

²⁸Matena na Isiraelita ka rongoa na hagaotonga iana o Salomo, ngaira ka hagahigasia ngavê, suria ngaira ka tahetara, vi God ki hagamataha obana, hanana i surigi na berarogata na enoni igê na otoha.