Read Kahua 1 MAHERAHA 4 Bible Online

1 MAHERAHA 4 - Kahua bible

1 MAHERAHA 4

¹O Salomo na maneraha ki marungia i Isiraele hagenani.

²Na enoni raha igê na gavumane iana kani igê: na mane ni vogasiha ka no Asaria karena o Satoke;

³na mane ni segesegeha kani ngairerua o Eligorepe mo Agia. Ngairerua ka no karena o Sisa; na mane i bâsurigi na pepa na gavumane ka no Josapata, karena o Agiluti;

⁴na mane i raha tangara na ara ni mane ni me hato ka no Benaia karena o Joiata; na mane ni vogasiha kani ngairerua o Satoke mo Abiatare;

⁵na mane i raha tangara na mane ga bâsurigi na apaneni hehegitigi i Isiraele me Juta ka no Asaria karena o Natane; na mane ni hagaotonga iana na maneraha ka no Sabuti Karena o Natane;

⁶na mane i bâsurira na enoni ga tagara igê na ruma raha iana na maneraha ka no Agisare; na mane i rêrâ i murita na enoni tagara ka no Atonirama karena o Abata.

⁷O Salomo ki atera na mane tangahuru matarerua, hanana ga bâsurigi hehegitigi na apaneni i Isiraele me Juta. Ki tuguhira viga kasikasi ngêra tangara na maneraha ma na ruma iana. Ngaira ka tonganigi na hageha, hanana viga kasikasi ngêra igê: na hageha gi tage tanga na vere tage.

⁸Igê nga ka na atata na mane ngegana henigi na agua ga bâsurigi hehegitigi. O karena o Gure, i bâsuria na apanena huhunganiga i Eparaimi;

⁹O karena o Tekere, i bâsurigi na hinua raha i Makasi, i Salabimi, i Bete Semesi, i Elone me Bete Ganane;

¹⁰O karena o Gesete, i bâsurigi na hinua raha i Arubote, i Soko ma na apanena hagenani i Gepere;

¹¹O karena o Abinataba, i bâsuria na apanena huhunganiga hagenani i Tore; ngaia ki êragia ka Tapata ka karena o Salomo;

¹²O Bana karena o Agiluti, i bâsurigi na hinua raha i Tanaka, i Megito, ma na apanena hagenani i Bete Seane hagarangia na hinua i Jeserele ki râ ki tariha i hinua i Abele Megola me Jokomeama;

¹³O karena o Gebere, i bâsurigi na hinua raha i Ramote i Gileata, ma ngaigi na hinua i Gileata iata na hagosi ninuni iana o Jaire tenia na varo ninuni iana o Manase, ma nikâ na apanena i Aragobo i Basani; ngaigi hato haku na hinua raha ngegana ka 60; ngaigi ka tonga renigi na para ma na manipara henigi na aioni na raburini;

¹⁴o Aginataba karena o Ito i bâsuria na apanena i Maganaimi;

¹⁵o Agimasa, i bâsuria na apanena iana o Napatali; ngaia ki êragia ka Basemata tani ka karena o Salomo;

¹⁶o Bana karena o Gusai i bâsurirerua na apanena i Asere ma na hinua i Alote;

¹⁷o Josapata karena o Paruaga, i bâsuria na apanena iana o Isakare;

¹⁸o Simi karena o Ela, i bâsuria na apanena iana o Benamino;

¹⁹o Gebere karena o Uri, i bâsuria na apanena i Gileata, o Sigone na maneraha iata na Amorita mo Ogo na maneraha i Basani garu bani marungia i nago. Na ani getea râ nikâ na mane ki bâsurirerua i Isiraele me Juta hagenani.

²⁰Na enoni i Juta me Isiraele ka gahu ngavê mangagi na one i one. Ngaira ka ngêngê, ka totono ma ka vagevage.

²¹Na maneraha o Salomo ki marungira na enoni hato, haganega i ve i Uparatesi ki râ ki tariha i Pilisitia ma ki tariha râ igê na pereperegana i bêhetanga henia i Esipito. Ngaira ka vurivuri takesi tanga ma ka oga rârâ i ruguhana mataro me ki me.

²²I na ara ni tangiani o Salomo ki obanigi na ngêra igê: na 135 na paike na koni, na 270 na paike na palaua,

²³na 10 na puruka ga hagangêra ma i ruma, na 20 na puruka ga ngêngê i bena ni go, ma na 100 na sipi henigi na ganiani getigi mangara na goti ma na marâ vasiga ga bâ vigana ma na manu hato ga manata.

²⁴Ngaia ki marungia na agua hagenani i na apanena bêso na ve i Uparatesi, haganega i Tipisaga i papana i Uparatesi ki so ki tariha igê na hinua raha i Gasa. Na maneraha hato igê ka oga i marungana. Na marapeha ki aharêsia na agua i marungia. Nikâ ngaia ki komanira na ani ga oga i na agua getigi râ.

²⁵Suria na ogaha hagenani iana o Salomo na ara ni enoni hato i Juta me Isiraele, haganega i Tane ki râ ki tariha i Bereseba, ka oga suri parongata ma ka vagevagesigi na pariki ni vaini ma ni fiki.

²⁶O Salomo ki nahunigi na 40, 000 na ruma tangara na hosi tangagi na kati ni me ma ki nahunira nikâ na 12, 000 na hosi tangara na mane ni me.

²⁷Na 12 na mane ga bâsurigi hehegitigi na apaneni, ngaira ka kasikasi ngêra tangara na maneraha o Salomo ma na ruma iana, ga obanigi. Na ara ni hitangita ki kasikasi ngêra igê na hageha ga atea tanga. Ngaira ki bara vige koke.

²⁸Nikâ na ara ni hitangita ki kasikasi ngêra ma na go maria tangara na hosi, na ani tangagi na kati ni me ma na ani tangara na mane ni me.

²⁹God ki haganahunia ngavê o Salomo renigi na takoha mataha, na aitangisiha ma na giraraha, i bara vige hagararingenigi.

³⁰O Salomo ki tako mataha ngavê teharira na mane ni takoha mataha i kerekê se i Esipito.

³¹Ngaia ki tako mataha ngavê teharira na mane hato ni takoha mataha ma nikâ teharia o Etane na Eseragita, ma teharira nikâ o karena o Magole: o Hemane, o Kalakole, mo Tarata. Na atana ki rongo raha surira na enoni hato getera râ.

³²Ngaia ki segegi na 3, 000 na maramarêrava ma na rehagaro na ki ma ki asiba.

³³Ngaia ki segegi na vivita renigi na ani mavê na marâ: renigi na apinige ma na rauga, renigi na apinige raha i Libanone ma renigi na kere apinige sisite na hisope ga ba igê na para, renira na manu, renira na ma na marâ ga angoango, ma renira na siare.

³⁴Na maneraha suria na maveta hagenani ka rongo tarohana na takoha mataha iana ma ka hagatorangenira na enoni ka râ ka karinga.