Read Kahua 1 MAHERAHA 5 Bible Online

1 MAHERAHA 5 - Kahua bible

1 MAHERAHA 5

¹O Girama na maneraha i Taire ki tarisuria tare o Tavite. Matena i rongo, vi o Salomo ki maneraha urusia o Tavite o vaemana, ngaia ki hagatorangenira tani na mane tora tamasinga tanga o Salomo.

²I hemuri o Salomo ki kasi tamasinga bê aporo tanga o Girama, ki vi:

³Igo ko bani girara, vi o Tavite o vaemaku ki meraheariha tare na merongana igê na agua hato rihia. Tahema ki bara tanga vige tagarahia na ruma ni rotu ni hagarahenga tanga na Araha God iana, mataro me na Araha ki katoa ki teharira na merongana hato.

⁴Ma i ngekê na Araha God iaku ki katoê, kê oga igê na marapeha tenigi na agua hato getigi. I mareha rârâ na merongaku ge takusia vige tahariê.

⁵Na Araha ki suru tanga o Tavite o vaemaku, ki vi: “O karemu gê page naka ki maneraha urusigo, ngaia ki page tagarahia na ruma ni rotu tangê. Hoi, i ngekê inê kê kato, vigê tagarahia na ruma ni rotu ni hagarahenga ngekana tanga na Araha God iaku.

⁶Gu vi tangara na kariamu, ke râ i Libanone, hanana ge tapigi na u tangê. Na kariaku ka page tagara henira, ma inê kê page vurira na kariamu manga hanana go bani vurira. Igo ko bani girara, vi na kariaku ka pe girara vige tapigi na u mangara na kariamu.”

⁷O Girama ki vagevagesia ngavê na tamasinga iana o Salomo ma ki vi: “Ge hagahigasia na Araha, suria i haganahunia o Tavite renia na kare mane i tako mataha ngavê ma ki katoa ki maneraha urusia ki marungia na apanena na enoni, i rongo raha na atana!”

⁸Vikê o Girama ki kasi tamasinga vikê tanga o Salomo, ki vi: “Na tamasinga iamu ki tarahuê ma inê kê aganaria na tamasinga iamu. Inê be mahatangenigi na u ma na apinige tangago.

⁹Na kariaku ka page toregi vato na apinige tenia i Libanone tanga na asi. Ngaira ka page hugusigi haku manga na paparagê, hanana ga hagataregi ka miginiha tanga na agua go takusia. I ngekana na kariaku ka page rupasigi igê ma ka page panigi so i rimata na kariamu igo. Ma tangago igo, inê kê obania, vi igo kanigo hagangêra na kariaku.”

¹⁰Vikê o Girama ki vatea o Salomo renigi na u ma na apinige i obanigi.

¹¹Ma o Salomo ki hagangêra na kariana o Girama renigi na 90,000 na paike na koni ma na 9,000 lita na oile koro ni olive i na ara ni harisi.

¹²Na Araha ki hagamataha obana o Salomo manga i bani surua. Na marapeha ki oga i berarogaterua o Girama mo Salomo, ma ngairerua karu suruheri, vigaru gâga igê na hekomaniha.

¹³Na maneraha o Salomo ki tugurira na 30,000 na mane suria i Isiraele hagenani ka tagara.

¹⁴Ngaia ki kasia o Atonirama ki bâsurira. Ngaia ki voasira ka vora na apaneni me gi oru. Na ara ni apaneni me ki na 10,000 na mane. Na ara ni apaneni me ka heheuri ka tagara i Libanone suria na hageha gi tage ma ka gâga i pasita surirerua na hageha gi rua.

¹⁵O Salomo ki nahunira nikâ na 80,000 na mane igê na agua huhunganiga, ga ninigi na hê, ma na 70,000 na mane tanga ga toratora.

¹⁶Ngaia ki nakara na 3,300 na mane ka bâbâsurira igê na tagaraha iata.

¹⁷Suria na bonasiha iana na maneraha o Salomo ngaira ka ninigi na parisihê ka rarirariga tanga na angisiruma na ruma ni rotu.

¹⁸Na mane tagara iaterua o Salomo ma o Girama ma na mane ni Gebale ka hagâhugi na hê ma na apinige tanga na tagarahiana na ruma ni rotu.