Read Kahua 1 MAHERAHA 6 Bible Online

1 MAHERAHA 6 - Kahua bible

1 MAHERAHA 6

¹Igê na 480 na harisi i murina na Isiraelita ga bani hura tenia i Esipito, igê na hete na harisi iana o Salomo i marungia i Isiraele, igê na ruata na hageha, na hageha ni Siwi, o Salomo ki haganega na tagarahiana na ruma ni rotu.

²Na borahusigana na ruma ni rotu ki 30 mita, na aberaberagana ki 10 mita ki akê na 15 mita.

³Na borahusigana na kiboru na bogona hagenago na ruma ni rotu ki 5 mita ma na aberaberagana ki 10 mita manga na aberaberagana na ruma ni rotu.

⁴Na apê na ruma ni rotu ka tonga renigi na mabaha. Na akereniheri ge he na mabaha ka na apinige ma ngaigi na mabaha ka rahisigi.

⁵Igê na tarihaterua hura na apê na ruma ni rotu ma igê na murina hura ka ngatogi me igê na ruma gi oru. Na ara ni hitangini ki tonga renigi na harahara na ruma ga hariabahi. Na ara ni hitangini na harahara na ruma ki akê na 2 mita ma na 50 sentimita.

⁶Na aberaberagani na ara ni kiboru igê na harahara na ruma hagenago i ano ki 2 mita ma na 50 sentimita. Na aberaberagani na ani igê na ruata na harahara na ruma ki 3 mita, ma na aberaberagani na ani igê na oruta na harahara na ruma ki 3 mita ma na 50 sentimita. Ngaigi ka pe hetagenani vikana, suria na apê bêhura na ruma ni rotu ki upupuga i ano ma ki akê, ki kanu sisite na rekena, ki akê vê ma ki kanu sisite râ nga ta rekena, ki akê vê, ma ki kanu ngavê na oruta na rekena. Vikana na bea igê na ruata ma na oruta na harahara na ruma ka matare igê na rekeni hegitigi tonganirerua, suria o Salomo ki pe obania vige tahatahakurigi na apê na ruma ni rotu tange na gogohane.

⁷Na hê ga tagarahia re na ruma ni rotu, ngaira ka ninigi rarirariga vê igê na agua ga papangigi igê na hê, hanana vi siana ka barongo renigi na aiani ga tahurungenigi igê na agua ga tagarahia igê na ruma ni rotu.

⁸Na maani ruma tanga na harahara na ruma hagenago i ano kani igê na otona na ruma ni rotu. Tenia i ngekana na marara ki tagere tanga na ruata na harahara na ruma ma tenia i ngekana ta na marara nikâ tanga na oruta na harahara na ruma.

⁹Matena o Salomo i tagarahia hato na ruma ni rotu, ngaia ki aba na gerina aberabera, ga tagarahia renigi na gogohane ma na bahitani na hata.

¹⁰Na ara ni harahara na ruma igê na ruma i ngatoa na ruma ni rotu, ki akê na 2 mita ma na 50 sentimita ma ki matare igê na rekena na apê na ruma ni rotu renigi na gogohane na hata.

¹¹Na Araha ki vi tanga o Salomo, ki vi:

¹²“Manga vi go arâ surigi na ara ni ramata ma na bonasiha iaku, inê kê page hagamonarigi tangago na suruha iaku tanga o Tavite o vaemamu.

¹³Inê kê page gâga i berarogata na kariaku na Isiraelita i ruma ni rotu go tagarahia ikê, ma ki asa ngavê vi ve page rumakaka renira.”

¹⁴Matena o Salomo i tagarahia hato na ruma ni rotu,

¹⁵ngaia ki abagi na apê i rarona renigi na bahitani na hata, haganega i ano ki akê ki tariha igê na bêna na apê. Ngaia ki aba na ano renigi na bahitani na mararu.

¹⁶Kere banu ngavê i ruma ni rotu ngaia ki tagarahia igê ta na kiboru, ga hêtana vi na kiboru apuna teha ngavê. Na borahusigana ki 10 mita. Ngaia ki naka na apêvoro pusia na apena na ruma ni rotu renigi na bahitani na hata, haganega i ano ki akê ki hato igê na bêna na apê.

¹⁷Na borahusigana na apena na ruma ni rotu i maana na kiboru apuna teha ngavê ki 20 mita.

¹⁸Na bahitani na hata igê na apê ka tahegi igê na takani na mahe, na apinige ma na marâ ga arige. Na rarona hagenani ka aba renigi na bahitani na hata pusigi na apê na hê.

¹⁹Kere banu ngavê i ruma ni rotu ki oga igê na kiboru tanga na bokesi na suruheri.

²⁰Na borahusigana na kiboru ngekana ki 10 mita, na aberaberagana ki 10 mita ma ki akê na 10 mita nikâ. Ga aba na apê hagenani renigi na bahitani na golo taranina. Na bea ni vogasiha i maana na kiboru apuna teha ngavê ga tagarahia renigi na hata ma ka aba renia na golo nikâ.

²¹Ga aba na rarona na ruma ni rotu renia na golo ma na seni na golo ka kuku pusia na maana na kiboru apuna teha ngavê.

²²Ngaia ki aba na apena na ruma ni rotu, na kiboru apuna teha ngavê ma na bea ni vogasiha igê renigi na golo.

²³Ngaia ki tahererua na angero gi rua renia na apinige ni olive ma ki hagêrasirerua i rarona na kiboru apuna teha ngavê. Na borahusigana na ara ni hitangiterua ki 5 mita.

²⁴Na ara ni hitangiterua ki tonga re na gagahana gi rua. Na borahusigani na ara ni gagahaterua ki 2 mita ma na 50 sentimita. Na borahusigana tenia na bogona ta gagahana tanga na bogona ta gagahana ki 5 mita. Ngairerua na angero karu hetagenani ngavê na apeterua.

²⁷Ngaia ki hagêrasirerua na angero i gupuna na kiboru apuna teha ngavê. Ngaia ki gasigi na gagahaterua, hanana na gagahaterua i na apaneterua hegitigi ka purupuru râ igê na apê ma na taretareni na gagahaterua hetanga ka purupuru haku i gupuna na kiboru apuna teha ngavê.

²⁸Ngaia ki taruhirerua na angero ngegana renia na golo.

²⁹Na apê igê na apena na ruma ni rotu ma igê na kiboru apuna teha ngavê ka tahegi igê na angero, na apinige manga na geara ma na takani na mahe.

³⁰Henaka i ano, ngaia ki aba nikâ renia na golo.

³¹Ga tagarahia na maani ruma papa renia na apinige ni olive tanga na maana na kiboru apuna teha ngavê. Na bêna na maani ruma ki masi.

³²Na purupuru na maani ruma ka tahegi na angero, na apinige manga na geara ma na takani na mahe igê ma ka taruhigi na purupuru, na angero, na apinige manga na geara renia na golo.

³³Na una na maani ruma tanga na apena na ruma ni rotu ngaira ka tagarahirerua renia na apinige ni olive.

³⁴Ga tagarahirerua na purupuru papa renia na apinige na mararu

³⁵ma ka tahegi na angero, na apinige manga na geara ma na takani na mahe igê ma ka taruhigi renia na golo.

³⁶Ga apêrihia na mahera i maana na ruma ni rotu renigi na para. Na para ka tonga renigi na harahara gi oru na hê henigi na gogohane na hata i haha igê.

³⁷Ga haganega na angisi ruma na ruma ni rotu igê na ruata na hageha, na hageha na Siwi, igê na heta na harisi o Salomo i maneraha igê.

³⁸Ga hatungia na ruma ni rotu suria na katoha iana o Salomo, igê na varuta na hageha, na hageha na Bulu, igê na tangahuruta matare tage na harisi iana o Salomo i maneraha igê. O Salomo ki torea na harisi gi pi, i tagarahia na ruma ni rotu suria.