Read Kahua 1 MAHERAHA 9 Bible Online

1 MAHERAHA 9 - Kahua bible

1 MAHERAHA 9

¹Matena na maneraha o Salomo ki tagarahigi hato na ruma ni rotu ma na ruma raha iana ma na ruma getigi hato i obania vi tagarahigi,

²na Araha ki vora me nikâ tanga, tagenana manga i nago i Gibeone.

³Na Araha ki vi tanga, ki vi: “Inê kê rongoa na nunginungiha iamu. Inê kê hagapua na ruma ni rotu go tagarahia, na agua i tuguhira na enoni viga rahesiê igê tare ki bê ki arâ. Inê be ngahisia ma be anumasia tare.

⁴Manga vi igo ma ko tototo suriê monari ma maninga manga o vaemamu o Tavite, ma ko marupegi na ramata iaku ma ko tê viteaku tare,

⁵hoi, inê be hagamonaria na suruha iaku tanga o Tavite o vaemamu, matena gê suru tanga vi na raraha iana ka page marungia tare i Isiraele.

⁶Ma ki manga igo se vi na raraha iamu ma kamu pe tototo suriê ma kamu pe marupegi na ramata ma na hagesuringa iaku tangagamu ma kamu hagarapera na ataro,

⁷hoi, inê kê kasira hura na kariaku na Isiraelita tenia na agua gê bani haganahunira renia. Inê be pania nikâ na ruma ni rotu ikê, gê bani hagapunaria, hanana viga rahesiê igê. Vikana na enoni i maveta ka page rurusira na Isiraelita ma ka page ruhira.

⁸Na ruma ni rotu ngekê ki page aruhuruhu ma na enoni ga riri igê ka page gasuga ma ka page konekone renia. Ngaira ka page hagate, ka vivi, ‘Tanu hega na Araha ki kato vikana tangarerua na agua ma na ruma ni rotu ngekê?’

⁹Na enoni ka page arami ka vivi, ‘Suria ngaira ka murisigea na Araha God iata, i bani bêngenira hura na êvarita tenia i Esipito. Ngaira ka hagarapera ma na ataro ma ka vogasira. Tahema na Araha ki naka na bagabevoana ki tarahura.’”

¹⁰Surigi na harisi tangahuru gi rua o Salomo ki tagarahirerua igê na ruma ni rotu ma na ruma raha iana.

¹¹O Girama na maneraha i Taire ki tamania renigi na ara ni u ma na apinige ma na golo i obanigi tanga na tagaraha ngekana. Matena i hato na tagaraha, o Salomo na maneraha ki haganahunia o Girama renigi na tangahuru gi rua na hinua i na apanena i Galilea.

¹²O Girama ki râ ki bâsigi ma ka pe râ me i parongana.

¹³Vikê ngaia ki vi tanga o Salomo, ki vi: “Bamane, nga vi na hinua kanigo vateê renigi nge?” Tahema ka hêtana na apanena ngekana vi Kabulu, i vi Purua.

¹⁴O Girama ki bani vatea o Salomo renigi na 3600 kilo na golo.

¹⁵Na maneraha o Salomo ki tugurira na enoni ka tagarahirerua na ruma ni rotu ma na ruma raha iana, ka ahunia ki hatara na apanena bêkê na hinua ma ka tagarahia na para ni hinua. Ngaia ki tugurira nikâ ka tagarahigi aporo na hinua i Gasore, i Migito me Gesere.

¹⁶Na maneraha i Esipito ki bani taharia i Gesere, ki henahuraua, ki mutera na enoni igê ma ki hagamakaka na hinua. Hemuri ngaia ki mahatangenia tanga ka karena, matena i êragia o Salomo.

¹⁷Ma o Salomo ki tagarahia aporo na hinua. O Salomo ki tugurira nikâ ka tagarahigi aporo na bironi i Bete Gorone,

¹⁸i Balata ma i Tamare i Negeve i Juta.

¹⁹Ngaia ki tugurira nikâ ka tagarahigi na hinua ni ngêra, na hinua tangara na hosi ma na kati ni me ma na ani mavê na marâ i takusigi vi tagarahigi i Jerusaleme, i Libanone se i na agua mavê igê i marungia.

²⁰Na enoni o Salomo ki tugurira ka tagara tanga, ka na raraha iata na ai ni Kanani na ani na Isiraelita ka pe mutera, matena ga henahuraua na apanena iata. Ngaira ka na Amorita, na Hitita, na Perisita, na Givita ma na Jebusita. Na raraha iata ka ami ni voravora re nga na kare rakuraku mataro me i ngekê.

²²O Salomo ki pe katora na Isiraelita ka vora re na kare rakuraku. Ngaira ka na mane ni me iana, na gavumane iana ma na mane ga bêngenira na mane ni me iana, na ani ga tavo uga ma na ani igê na kati ni me ma na ani igê na hosi.

²³Na 550 na mane ka ura i murita na enoni o Salomo i tugurira ka tagarahigi na hinua.

²⁴O Salomo ki ahunia ki hatara na apanena bêkê na hinua, i murina kaniana ka karena na maneraha i Esipito ki aharaga pania na hinua iana o Tavite tanga na ruma raha o Salomo i tagarahia tanga.

²⁵Hageoru i na ara ni harisi o Salomo ki susu tanga na Araha ma ki vogasia renigi na ngêra ni ngêhaku igê na bea ni vogasiha, i bani tagarahia tanga na Araha. Ngaia ki sungigi nikâ na marâ i sigini koro tanga na Araha. Vikana ngaia ki hatungia na tagaraha renia na ruma ni rotu.

²⁶Na maneraha o Salomo ki tagarahigi nikâ na haka rako i Esionegebere hagarangia i Elata igê na kâna i Akaba i na apanena i Etome.

²⁷Na maneraha o Girama ki hagatorangenira tani na kariana ga manisingenia na asi, hanana ga hagesurira na mane igê na haka iana o Salomo.

²⁸Ngaira ka toregi na haka tanga i Opire ma ka migiaporo me na 12,600 kilo na golo tanga o Salomo.