Read Kahua 2 MANERAHA 11 Bible Online

2 MANERAHA 11 - Kahua bible

2 MANERAHA 11

¹Matena ka Atalia kenana na maneraha o Agasia ki rongo, vi o karena ki me, ngaia ki haribona, hanana ga mutera na raraha hato iana na maneraha,

²nga noga ma o Joasi karena o Agasia kani tahi. Matena ga sugi nahuia henira na ani getera, ka Jehoseba ka karena na maneraha o Jehorama ma kesina o Agasia ki hagatahia. Ngaia ki torererua banu ngaia ma na gete i marupea igê na kiboru ni mêru i ruma ni rotu ma ki pinihia igê tenia ka Atalia. Tahema ngaia ki tahi.

³Ka Jehoseba ki marupea surigi na harisi gi ono ma ki pinihia i ruma ni rotu matena ka Atalia ki marungia i Juta.

⁴Igê na pita na harisi o Joiata na mane ni vogasiha ki kasi tamasinga tangara na mane ga bêngenira na mane ni me, ga anumasia na maneraha henia na ruma raha iana, ka râ me i ruma ni rotu. I ngekana ngaia ki naka na suruheri henira ma ki katora ka tohe, viga arâ suria na katoha iana. Ngaia ki hagabâsira renia o Joasi o karena na maneraha o Agasia.

⁵Ngaia ki bonasira, ki vi: “Igê na tangiana ni mamaroha, matena mu arâ me tanga na tagaraha iami mu voasigamu kamu voravora na apaneni me gi oru. Tani ki anumasia na ruma raha. Tani ki anumasia na manipara Sure ni ruma ni rotu,

⁶ma tani ki anumasia na maanipara i murina na ruma iata na mane ni anumasiha ni ruma ni rotu.

⁷Na apaneni me gi rua garu hatohato igê na tangiana ni mamaroha karu anumasia nga na ruma ni rotu, hanana ga ngahisia na maneraha.

⁸Mu taugi nga na tatapa borahu i rimami, hanana mu anumasia na maneraha o Joasi. Ma kamu ngahisia rârâ surigi na ara ni agua i arâ igê. Na anima na enoni i rêra me hagarangigamu, mu nahuia nga ki meme.”

⁹Na mane ga bêngenira na mane ni me, ka râ suria na tamasinga iana o Joiata ma ka merarâ me na me iata tanga: na ani ga hato igê na tagaraha iata igê na tangiana ni mamaroha ma na ani ga urisi nogata.

¹⁰Ngaia ki tonganira na mane ga bêngenira na me ni anumasiha renigi na ora ma na bêata iana o Tavite, ga bani tâtâ i ruma ni rotu.

¹¹Ngaia ki nakara na mane ni anumasiha i metara i maana na ruma ni rotu henigi na tatapa borahu i rimata, hanana ga anumasia na maneraha.

¹²Hemuri o Joiata ki mehura o Joasi, ki naka na tarepuri i bêna ma ki vatea renia na buka na ramata ni arahanga. Ngaira ka monea o Joasi ki maneraha. Na enoni ka hitahita baro ma ka ngerengere, ka vi: “Maneraha ge mêri arihu!”

¹³Na geteraha ka Atalia ki rongora na mane ni anumasiha ma na enoni ga barongo. Vikê ngaia ki tango tanga na ruma ni rotu, na agua ga bani haku igê na enoni.

¹⁴Ngaia ki bâsia na maneraha haoru i ura hagarangia na u i maani ruma ni rotu, manga bani hanana vikana. Na mane ga bêngenira na mane ni anumasiha ma na mane ni uhinga ni ahuri ka ura rihia, ma na enoni hato ka ngerengere vagevage ma ka uhigi na ahuri. Ka Atalia ki hataera ma ki tarisigi na tuguni iana ma ki ngere ki vi: “I pe oto vigamu hatungiê! I pe oto vigamu hatungiê!”

¹⁵O Joiata ki pe obania vige nahuia ke meme ka Atalia igê na agua i oga igê na ruma ni rotu. Tahema ngaia ki bonasira na mane ga bêngenira na mane ni me, ki vi: “Mu torea hura i guputa na mane ni anumasiha ga ura harahara, ma kamu nahuia ki meme na anima na enoni i uhungia vi hagatahia.”

¹⁶Ngaira ka ranguia ma ka torea tanga na ruma raha iana ma ka nahuia i ngekana hagarangia na maanipara iata na hosi.

¹⁷O Joiata na mane ni vogasiha ki katora na maneraha o Joasi ma na enoni, ka suru tanga na Araha, vi ngaira ka na kariana na Araha. Ngaia ki katora nikâ ka suruheri.

¹⁸Hemuri na enoni ka râ tanga na ngêsu iana o Bala ma ka hogea. Ngaira ka nahuia ki me o Matane na mane ni vogasiha iana o Bala igê na maani na bea ni vogasiha. Ngaira ka kumukumugigi na bea ni vogasiha ma na nunuta na ataro. O Joiata ki nakara na mane ni anumasiha, ka anumasia na ruma ni rotu.

¹⁹Hemuri ngaia ma na mane ga bêngenira na mane ni me ma na mane ni anumasiha iana na maneraha ma na me ga anumasia na ruma raha iana na maneraha, ngaira hato ka bâsuria ka merâ na maneraha tenia na ruma ni rotu tanga na ruma raha iana na maneraha. Na enoni hato ka mumurira. O Joasi ki banu igê na maanipara iata na me ni anumasiha ma ki oga so igê na atohana.

²⁰Na enoni hato ka vagevage ngavê ma na hinua ki oga igê na marapeha, suria ga nahuia ki me ka Atalia igê na ruma raha iana na maneraha.

²¹O Joasi ki vora re na maneraha i Juta, matena i tonga na harisi gi pi iana.