Read Kahua 2 MANERAHA 12 Bible Online

2 MANERAHA 12 - Kahua bible

2 MANERAHA 12

¹Matena o Jehu ki maneraha i Isiraele surigi noga na harisi gi pi, o Joasi ki vora re na maneraha i Juta. Ngaia ki marungia i Juta surigi na harisi tangahuru ge he ma ki oga i Jerusaleme. Kenana kani ka Sibia ni Bereseba.

²Igê na ogaha iana hagenani o Joasi ki hagakoro obana God, suria o Joiata na mane ni vogasiha ki hagesuria.

³Henaka, ma na agua ni vogasiha ni ataro ka pe ruhuruhugi ma na enoni ka ama ni vogasi nga igê ma ka sungigi igê na marâ i sigini koro.

⁴O Joasi ki hagahakura na mane ni vogasiha ma ki bonasira, hanana ga nakanaka râ na haga ga vurigi re na vogasiha i ruma ni rotu, i vi, vi na meni na vogasiha i na ara ni tangiani, ma na haga ga mahatangenigi na enoni.

⁵Na ara ni hitangita na mane ni vogasiha ki bâbâsurigi na haga i arâ me tenira na enoni ga arâ me i pasina. Na haga ki tâtâ tanga na surungiana na ruma ni rotu, na agua i aera.

⁶Ki rârâ, matena o Joasi ki maneraha surigi na harisi tangahuru gi rua matare oru, na mane ni vogasiha ka pe surungia rârâ na ruma ni rotu.

⁷Vikê o Joasi ki unira me o Joiata ma na mane ni vogasiha getera ma ki hagatera, ki vi: “Tanu hega kanimu pe surungia rârâ na ruma ni rotu? Haganega tenia i ngekê igamu ki hato vigamu page bâsurigi nikâ na haga. Mu tagarenigi nga tanga na surungiha.”

⁸Na mane ni vogasiha ka aganaria ma ka agana nikâ vi ngaira ka surungia na ruma ni rotu.

⁹Hoi, o Joiata ki tavoa na bokesi, i makuru na bubuhina ma ki naka hagarangia na bea ni vogasiha i na apanena i otona na ruma ni rotu, matena na enoni ka bêbanu igê. Na mane ni vogasiha ga tagara i maani ruma ni rotu ka tuguni igê na bokesi na haga hato ga tagarenigi na enoni, ga arâ me tanga na hagarahenga.

¹⁰Matena i sugi vunuvunu na bokesi, na mane segesege iana na maneraha ma na mane ni vogasiha i teha karu arâ me, karu tomatoma na haga ma karu okokogi.

¹¹Matena garu segea so vi gi hita nga na haga, ngairerua karu tagarenia na haga tangara na mane ga bâbâsuria na surungiha ni ruma ni rotu, hanana ga vurira re na mane ga tora ruma, na mane ga bâsurigi na tagaraha ni ruma,

¹²Na mane ga pangapanga na apê na hê, na mane ga reterete na hê, ma ka vurivuri re na apinige ma na hê ma na marâ getigi ga obanigi tanga na surungiha.

¹³Na haga ki mareha vige vurigi re na kâkâ na siliva, se vi na apira, se vi na ahuri se vi na marâ tangagi na laite se vi na marâ getigi na siliva se vi na golo.

¹⁴Na haga ki tanga ma ga vurira re na mane tagara ma na marâ tanga na surungiha.

¹⁵Na mane ga bâsuria na tagaraha, ka bâsurigi maninga ngavê na haga, hanana i pe araria vige bâbâ igê manga i he ki huhura na haga.

¹⁶Na haga tangagi na vogasiha meni na hagakorokoroha se na haga tangagi na vogasiha meni na bonoteniha ni tasi, ka pe nakagi i rarona na bokesi, suria ngaigi ka na anita na mane ni vogasiha.

¹⁷I na matena ngekana o Hasaele na maneraha i Siria ki taharia na hinua i Gata ma ki henahuraua. Hemuri ngaia ki kato vi taharia i Jerusaleme.

¹⁸O Joasi na maneraha i Juta ki toregi hato na votovoto iata o Josapata, o Jehorama mo Agasia na maneraha i nago tarana ga bani nakagi tanga na Araha henigi na votovoto iana marena ma henigi na golo hato surigi na kiboru ni haga i ruma ni rotu, ma ki mahatangenigi hato tanga na maneraha o Hasaele. Vikana o Hasaele ki mera aporo na mane ni me iana tenia i Jerusaleme.

¹⁹Na tauhana hato getigi na maneraha o Joasi ka bani segegi so igê na buka na sihonga renira na maneraha i Juta.

²⁰Na mane ni hagaotonga iana na maneraha o Joasi ka harikato renia ma ka nahuia ki me hagarangia na ruma igê na agua ga bani ahunia ki hatara kerekê i Jerusaleme, matena i so tanga i Sila.

²²Na mane garu nahuia kani igê: o Josapata karena o Simata, mo Jehosabata karena o Somere. O Joasi ka bagia igê na matahuta na maneraha i hinua iana o Tavite. O Amasia o karena ki maneraha urusia.