Read Kahua 2 MANERAHA 14 Bible Online

2 MANERAHA 14 - Kahua bible

2 MANERAHA 14

¹Matena o Joasi karena o Joagasi ki maneraha i Isiraele surirerua noga na harisi gi rua, o Amasia karena o Joasi ki vora re na maneraha i Juta,

²matena i tonga na tangahuru gi rua matare rima na harisi iana. Ngaia ki oga i Jerusaleme ma ki marungia i Juta surigi na harisi tangahuru gi rua matare siva. Kenana kani ka Jehoatana ni Jerusaleme.

³O Amasia ki hagakoro obana na Araha ma ki pe maratorana na maneraha o Tavite na êvarina. Ngaia ki amake suria hete o Joasi o vaemana.

⁴Ngaia ki pe hagamagahurugi na agua ni vogasiha ni ataro, ma na enoni ka ama ni vogasi nga ma ka susu igê.

⁵Matena o Amasia ki ura gatagata, ngaia ki mutera na mane ni hagaotonga, ga bani nahuia ki me na maneraha o vaemana.

⁶Ngaia ki pe mutera na kareta, ma ki râ suria hete na ramata iana na Araha igê na buka ni ramata iana o Moise, ki vi: “Siana kamu mutera na enani kare renigi na bagatauhata na kareta, ma siana kamu mutera na kare renigi na bagatauhata na enata. Mu nahuia ki meme na enoni renigi na bagatauhana so marena.”

⁷O Amasia ki mutera na 10,000 na mane ni me ni Etome i maruguna Marasiga. Ngaia ki henahuraua na hinua i Sela ma ki hêtana vi Jokotele. Na atana ngekana ki goga mênga i ngekê.

⁸Hemuri o Amasia ki hagatorangenia na mane tora tamasinga tanga o Joasi na maneraha i Isiraele, ki nungia vigaru heariha.

⁹Ma na maneraha o Joasi ki kasi tamasinga aporo, ki vi: “I ta na matena na tone i hungana i Libanone ki kasi tamasinga tanga na apinige raha i bagora, ki vi, ‘Gu hagauragingenia ka karemu henia o kareku.’ Na marâ vasiga ki ri igê na tone ma ki puria.

¹⁰Hoita o Amasia, igo ko bani teharira na ai ni Etome ma ko parunigo ngavê. Hoi, igo ki rongo raha na atamu. I uhu tangago. Gu oga tonge i pasimu. Tanu hega ko hagaratemi igo ma na kariamu ka tarahugamu na bagabevoani?”

¹¹Ma o Amasia ki pe tê ringena. Tahema na maneraha o Joasi ki meratavo uga na mane ni me iana ma ka meheariha o Amasia i Bete Semesi i Juta.

¹²Na me iana o Amasia ka so renira ma ngaira hato ka tango tange i pasita.

¹³O Joasi ki henahuraua o Amasia, ki tavo uga ki râ i Jerusaleme ma ki hogea na para ni hinua haganega igê na maani para Eparaimi tariha igê na maani para Arirugana. I berarogaterua ki vora na 200 mita.

¹⁴Ngaia ki toregi na siliva ma na golo hato i tarahugi ma na ara ni marâ i ruma ni rotu ma igê na kiboru ni haga i ruma raha iana na maneraha, ma ki migiaporo i Samaria. Ngaia ki meraaporo nikâ na enoni, hanana vi ngahingahi renira.

¹⁵Na tauhana hato getigi o Joasi ma na hearihatana henia o Amasia na maneraha i Juta ka bani segegi so igê na buka na sihonga renira na maneraha i Isiraele.

¹⁶O Joasi ki me ma ka bagia igê na matahuta na maneraha i Samaria ma o Jerobeama o karena ki maneraha urusia. Ngaia ki no Jerobeama na ruata.

¹⁷I murina i me o Joasi na maneraha i Isiraele, o Amasia na maneraha i Juta ki oga surigi nikâ na tangahuri harisi gi tage matare rima.

¹⁸Na tauhana hato getigi o Amasia ka bani segegi so igê na buka na sihonga renira na maneraha i Juta.

¹⁹Ngaira ka harikato i Jerusaleme, hanana viga nahuia ki meme o Amasia. Tahema ngaia ki gava tanga na hinua i Lakisi. Na merongana ka râ suria ma ka nahuia ki me i ngekana.

²⁰Na gahuana ka hagarutangia igê na hosi ma ka meaporo i Jerusaleme ma ka bagia igê na matahuta na maneraha i hinua iana o Tavite.

²¹Na ai ni Juta ka atea o Usia o karena ki maneraha. Ngaia ki tonga na tangahuru matare ono na harisi iana.

²²O Usia ki henahuraua aporo ma ki tagarahia aporo i Elate i murina i me o vaemana.

²³Matena o Amasia karena o Joasi ki maneraha i Juta surigi noga na harisi tangahuru matare rima, o Jerobeama karena o Joasi ki vora re na maneraha i Isiraele. Ngaia ki oga i Samaria ma ki marungia i Isiraele surigi na harisi tangahuru ge he matare tage.

²⁴Ngaia ki murisigea na Araha ma ki amake suria na bagatauhana o Jerobeama karena o Nebata, i maneraha i nago tarana ma ki hagatasira na Isiraelita.

²⁵Ngaia ki henahuraua aporo na apanena hagenani iata na Isiraelita, haganega i Hamata na teha tanga i Siria, ki tariha igê na Asime i Negeve. Na tarana ngekana na Araha God iata na Isiraelita ki bani surua, matena i tamasi i harana o Jona na poropete iana karena o Amitai ni Gate Hagepere.

²⁶Na Araha ki bâsira na Isiraelita ga mamasiaga ngavê. I mareha ngavê vi ta na hetamaniha tangara.

²⁷Ma na Araha ki pe kato, vige mutera ngavê. Tahema ngaia ki katoa na maneraha o Jerobeama na ruata ki hagatahira.

²⁸Na tauhana hato getigi o Jerobeama na ruata, na hearihatani iana ma manga i he ki henahuraurerua aporo i Tamasiko me Hamata tangara na Isiraelita, na tarani hato ngegana ka bani segegi so igê na buka na sihonga renira na maneraha i Isiraele.

²⁹O Jerobeama ki me ma ka bagia igê na matahuta na maneraha. O Sekaria o karena ki maneraha urusia.