Read Kahua 2 MANERAHA 15 Bible Online

2 MANERAHA 15 - Kahua bible

2 MANERAHA 15

¹Matena o Jerobeama na ruata ki maneraha surigi noga na harisi tangahuru gi rua matare pi, o Usia karena o Amasia ki vora re na maneraha i Juta,

²matena i tonga na harisi tangahuru matare ono iana. Ngaia ki oga i Jerusaleme ma ki marungia i Juta surigi na harisi tangahuru gi rima matare rima. Kenana kani ka Jekolia ni Jerusaleme.

³O Usia ki hagakoro obana na Araha manga o vaemana.

⁴Ma na agua ni vogasiha ni ataro ka pe magahuru ma na enoni ka ama ni vogasi nga ma ka susu igê.

⁵Na Araha ki katoa o Usia, ki asiahu rârâ mataro me ki me. Ngaia ki oga getea râ i ta na ruma. Ngaia ki nakagi vê na tagaraha iana ma o Jotama o karena hete kani marungia i Juta urusia.

⁶Na tauhana hato getigi o Usia ka bani segegi so igê na buka na sihonga renira na maneraha i Juta.

⁷O Usia ki me ma ka bagia igê na matahuta na maneraha i hinua iana o Tavite. O Jotama o karena ki maneraha urusia.

⁸Matena o Usia ki maneraha i Juta surigi noga na harisi tangahuru gi oru matare varu, o Sekaria karena o Jerobeama na ruata ki vora re na maneraha i Isiraele. Ngaia ki oga i Samaria ma ki marungia i Isiraele surigi na hageha ge ono.

⁹Ngaia ki murisigea na Araha mangara na maneraha i nago tarana. Ngaia ki râ surigi na bagatauhana na maneraha o Jerobeama karena o Nebata i hagatasira na Isiraelita.

¹⁰O Salumi karena o Jabesi ki harikato renia na maneraha o Sekaria ma ki nahuia ki me i Ibeleama ma ki maneraha urusia.

¹¹Na tauhana hato getigi o Sekaria ka bani segegi igê na buka na sihonga renira na maneraha i Isiraele.

¹²Vikana na Araha ki hagamonaria na bani suruha iana tanga na maneraha o Jehu, i vi: “Na raraha iamu ka page heheuri ka maneraha i Isiraele rârâ ma ki tariha igê na heta na apaparaha.”

¹³Matena o Usia ki maneraha i Juta surigi noga na harisi tangahuru gi oru matare siva, o Salumi karena o Jabesi ki vora re na maneraha i Isiraele. Ngaia ki oga i Samaria ma ki marungia i Isiraele suria na hageha gi tage.

¹⁴O Menageme karena o Gati ki tavoraha i Tirisa tanga i Samaria, ki nahuia ki me o Salumi ma ki maneraha urusia.

¹⁵Na tauhana hato getigi o Salumi ma na harikatoha iana ka bani segegi so igê na buka na sihonga renira na maneraha i Isiraele.

¹⁶Igê na raoha iana o Menageme tenia i Tirisa, ngaia ki tariha i hinua i Tipisaga, ma na ai ni Tipisaga ka urapusia. Tahema ngaia ki ruhuruhugi na hinua ma na agua rihia, ma ki mutera na enoni igê. Ngaia ki tatahura na gete hato ga obara.

¹⁷Matena o Usia ki maneraha i Juta surigi noga na harisi tangahuru gi oru matare siva, o Menageme karena o Gati ki vora re na maneraha i Isiraele. Ngaia ki oga i Samaria ma ki marungia i Isiraele surigi na harisi tangahuru gi tage.

¹⁸Ngaia ki murisigea na Araha ma ki amake suria na bagatauhana na maneraha o Jerobeama karena o Nebata i hagatasira tare na Isiraelita mataro me na tangiana i me igê.

¹⁹O Pule na maneraha i Asiria ki sugaria i Isiraele. O Menageme ki vatea renigi na 30,000 kilo na siliva, hanana i tamania ki hagagatagatania na arahanga iana o Menageme i Isiraele.

²⁰O Menageme ki tavogi na haga tenira na enoni ruruguha i Isiraele, suria i tuguhira na ara ni hitangita vi mahatangenigi na maani tangahuru gi rima na siliva. Vikana o Pule ki aporo i pasina i Asiria.

²¹Na tauhana hato getigi o Menageme ka bani segegi so igê na buka na sihonga renira na maneraha i Isiraele.

²²Ngaia ki me ma ka bagia ma o Pekagia o karena ki maneraha urusia.

²³Matena o Usia ki maneraha i Juta surigi noga na harisi tangahuru gi rima, o Pekagia karena o Menageme ki vora re na maneraha i Isiraele. Ngaia ki oga i Samaria ma ki marungia i Isiraele surirerua na harisi gi rua.

²⁴Ngaia ki murisigea na Araha ma ki amake surigi na bagatauhana na maneraha o Jerobeama karena o Nebata, i hagatasira na Isiraelita.

²⁵O Pekaga karena o Remaliahu i bêngenira na mane ni me iana o Pekagia ma na tangahuru gi rima na me ni Gileata ka harikato renia o Pekagia. O Pekaga ki nahuia ki me o Pekagia i rarona na kiboru nganganihaga igê na ruma raha iana na maneraha i Samaria, ma ki maneraha urusia.

²⁶Na tauhana hato getigi o Pekagia ka bani segegi so igê na buka na sihonga renira na maneraha i Isiraele.

²⁷Matena o Usia ki maneraha i Juta surigi noga na harisi tangahuru gi rima matare rua, o Pekaga karena o Remaliahu ki vora re na maneraha i Isiraele. Ngaia ki oga i Samaria ma ki marungia i Isiraele surigi na harisi tangahuru gi rua.

²⁸Ngaia ki murisigea na Araha ma ki amake surigi na bagatauhana na maneraha o Jerobeama karena o Nebata i hagatasira na Isiraelita.

²⁹Matena o Pekaga ki maneraha, o Tigilata Pilesere na maneraha i Asiria ki henahuraugi na hinua i Ijone, i Abele-Bete-Maka, i Janoaga, i Ketesi me Hasore henigi na apaneni i Gileata, i Galilea me Napatali, ma ki henahuraura na enoni tanga i Asiria.

³⁰Matena o Jotama karena o Usia ki maneraha i Juta surigi noga na harisi tangahuru gi rua, o Hosea karena o Ela ki harikato renia na maneraha o Pekaga ma ki nahuia ki me ma ki maneraha urusia.

³¹Na tauhana hato getigi o Pekaga ka bani segegi so igê na buka na sihonga renira na maneraha i Isiraele.

³²Igê na matena igê na ruata na harisi o Pekaga karena o Remaliahu ki maneraha i Isiraele, o Jotama karena o Usia ki vora re na maneraha i Juta.

³³Ngaia ki tonga na tangahuru gi rua matare rima na harisi iana. Ngaia ki oga i Jerusaleme ma ki marungia i Juta surigi na harisi tangahuru matara ge ono. Kenana kani ka Jerusa ka karena o Satoke.

³⁴O Jotama ki hagakoro obana na Araha, suria i amake suria o Usia o vaemana.

³⁵Ma ngaia ki pe hagamagahurugi na agua ni vogasiha ni ataro, ma na enoni ka ama ni vogasi nga ma ka susu igê. O Jotama ngekê kani tagarahia na tarâto na ruma ni rotu i na apanena akê.

³⁶Na tauhana hato getigi o Jotama ka bani segegi so igê na buka na sihonga renira na maneraha i Juta.

³⁷Matena ngaia ki maneraha, na Araha ki nakarerua moramora o Resini na maneraha i Siria ma o Pekaga na maneraha i Isiraele, karu sugaria i Juta.

³⁸O Jotama ki me ma ka bagia igê na matahuta na maneraha i Hinua iana o Tavite, ma o Agasa o karena ki maneraha urusia.