Read Kahua 2 MANERAHA 16 Bible Online

2 MANERAHA 16 - Kahua bible

2 MANERAHA 16

¹Matena o Pekaga karena o Remaliahu ki maneraha i Isiraele surigi noga na harisi tangahuru gi tage matare pi, o Agasa karena o Jotama ki vora re na maneraha i Juta.

²Ngaia ki tonga na harisi tangahuru gi rua iana. Ngaia ki oga i Jerusaleme ma ki marungia i Juta surigi na harisi tangahuru gi tage matare ge ono. Ngaia ki pe amake suria na tauhana koro na maneraha o Tavite na êvarina. Ngaia ki hagaera obana hete na Araha God iana.

³Ngaia ki amake surigi na bagatauhata na maneraha i Isiraele. Ngaia ki susu tangara na ataro renia o karena marena. Igê na tarana ngekana ngaia ki râ suria na tauha i erataga ngavê iata na enoni, na Araha i bani tarigenira hura tenia na agua, matena na Isiraelita ka sugarira.

⁴Surigi na agua ni vogasiha ni ataro ma surigi na hungani ma i ruguhani na apinige ga arubebe, o Agasa ki vogasi ma ki sungigi igê na marâ i sigini koro.

⁵O Resini na maneraha i Siria ma o Pekaga na maneraha i Isiraele karu taharia i Jerusaleme ma karu oga rihia, ma ki bara vigaru teharia o Agasa.

⁶Igê na matena ngekana na maneraha i Etome ki henahuraua aporo na hinua i Elata ma ki tarigenira hura na ai ni Juta ga oga i ngekana. Na ai ni Etome ka oga nga i Elata ma ka gâga mêngara igê.

⁷O Agasa ki hagatorangenira na mane tora tamasinga tanga o Tigilata Pilesere na maneraha i Asiria, ki vi: “Inê ka na kariamu. Râ me ku hagatahiê tenirerua na maneraha i Siria ma na maneraha i Isiraele, garu tahariê.”

⁸O Agasa ki tavogi na siliva ma na golo tenia na kiboru ni haga i ruma raha iana ma tenia na ruma ni rotu, ma ki mahatangenigi tanga na maneraha i Asiria.

⁹O Tigilata Pilesere ki aganaria na avarasiha iana o Agasa ma ki tavo uga henira na mane ni me iana, hanana i taharia i Tamasiko. Ngaia ki henahuraua ma ki nahuia ki me na maneraha o Resini ma ki henahuraura na enoni igê tanga i Kire.

¹⁰Matena na maneraha o Agasa ki râ tanga i Tamasiko, hanana i bâsia na maneraha o Tigilata Pilesere, ngaia ki bâsia na bea ni vogasiha i ngekana. Ngaia ki hagatorangenia na nununa nga na bea ni vogasiha manga hanana i bâ tanga o Uria na mane ni hagarahenga ki bâsia.

¹¹Vikê o Uria ki tagarahia na bea ni vogasiha ki bâ manga ngavê vikana. Ngaia ki hagâhua ma ki kahu aporo me o Agasa.

¹²Matena o Agasa ki aporo me tenia i Tamasiko, ngaia ki bâsia na bea ni vogasiha i bani uhu.

¹³Vikê ngaia ki susu igê ma ki vogasi igê renigi na koni, ma ki karangigi igê na vaini ma na gaputa na ganiani tanga na ngêra haku.

¹⁴Na bea na kapa higa ni vogasiha tanga na Araha ki oga i berarogaterua na bea ni vogasiha haoru ma na ruma ni rotu, ma o Agasa ki gurua râ ki tâ i na apanena akê na bea ni vogasiha haoru.

¹⁵Hemuri ngaia ki bonasia o Uria, ki vi: “Igê ma na ani raha na bea ni vogasiha iaku ikê go susu igê i na ara ni mavoraro ma ko vogasi igê renigi na koni i na ara ni manurahi. Go susu igê nikâ renigi na ganiani ma ko vogasi igê renigi na koni ga râ me tenira na maneraha ma na enoni. Go karangigi igê na vaini ga râ me tenira na enoni ma na gaputa na ganiani ni vogasiha. Ma na bea na kapa higa ni vogasiha ko naka tangê inê, hanana gê hagatea na Araha God igê.”

¹⁶O Uria ki tê viteana na maneraha.

¹⁷Na maneraha o Agasa ki tasitasigi na kati na kapa higa tanga na vogasiha i ruma ni rotu ma ki tavogi râ na apira tenigi. Ngaia ki tavoa râ nikâ na maraguhu raha na kapa higa ni ve tenigi na gerita na puruka mane na kapa higa tangahuru matarerua ma ki naka so igê na bea na hê.

¹⁸Nikâ o Agasa ki tavoa râ tenia na ruma ni rotu na bea tanga na atohana na maneraha ma ki purusia na maani ruma iata na maneraha ga girara ga bêbanu igê na ruma ni rotu, suria ngaia ki magutenia na maneraha i Asiria.

¹⁹Na tauhana hato getigi na maneraha o Agasa ka bani segegi so igê na buka na sihonga renira na maneraha i Juta.

²⁰O Agasa ki me ma ka bagia igê na matahuta na maneraha i hinua iana o Tavite, ma o Hisikia o karena ki maneraha urusia.