Read Kahua 2 MANERAHA 17 Bible Online

2 MANERAHA 17 - Kahua bible

2 MANERAHA 17

¹Matena o Agasa ki maneraha i Juta surigi noga na harisi tangahuru matarerua, o Hosea karena o Ela ki vora re na maneraha i Isiraele. Ngaia ki oga i Samaria ma ki marungia i Isiraele surigi na harisi gi siva.

²Ngaia ki murisigea na Araha, ma ngaia ki pe bagaparongana raha mangara na maneraha ga marungia i Isiraele hagenago tarana.

³O Salamanasare na maneraha i Asiria ki maneraha teha. O Hosea ki naka marena i ruguhana o Salamanasare ma ki vuria na takesi tanga i na ara ni harisi.

⁴Ma i ta na harisi o Hosea ki hagatorangenira na mane tora tamasinga tanga o So na maneraha i Esipito, ma ki avarasia ma ki naka vê vige vuria nikâ na takesi tanga na maneraha i Asiria. Matena o Salamanasare ki girara vikana, ngaia ki rakua o Hosea ma ki kasia i ruma ni hagaitangiha.

⁵Hoita, o Salamanasare ki taharia i Isiraele ma ki oga rihia na hinua i Samaria surigi na harisi gi oru.

⁶Igê na matena o Hosea ki maneraha noga surigi na harisi gi siva, na maneraha i Asiria ki henahuraua i Samaria. Ngaia ki henahuraura na Isiraelita tanga i Asiria. Ngaia ki kasira tani ka oga i hinua i Galaga ma tani ka oga hagarangia na ve i Gabore i na apanena i Gosane, ma tani ka oga surigi na hinua i Metia.

⁷I Samaria ki vota, suria na Isiraelita ka murisigea na Araha God iata, i bani hagatahira tenia na maneraha i Esipito ma ki bani bêngenira hura tenia i Esipito. Ngaira ka vogasira na ataro,

⁸ka râ surigi na tauhata na enoni na Araha i bani kasira hura tarata na kariana, ma ka marupegi na ramata ga nakagi na maneraha i Isiraele.

⁹Na Isiraelita ka katogi na tarani na Araha God iata i ngaritenigi. Ngaira ka tagarahigi na agua ni vogasiha ni ataro surigi na hinua iata, na ani raha ma na ani sisite.

¹⁰Ngaira ka hagêrasigi na u na hê ma na nununa ka Asera na ataro surigi na hungani hato ma i ruguhani na apinige ga arubebe.

¹¹Ngaira ka sungigi na marâ ga sigini koro surigi na bea ni vogasiha ni ataro, suria ngaira ka râ surigi na tauhata na enoni, na Araha i bani kasira hura tenia na agua. Ngaira ka hagamangaria na Araha renigi na bagaparongata hato.

¹²Ngaira ka aharê igê na ramata iana na Araha, i vi, ‘Siana kamu rahesira na ataro.’

¹³Na Araha ki bani hagatorangenira na mane tora tamasinga ma na poropete, hanana ga kanukanura na Isiraelita ma na ai ni Juta, ki vi: “Mu kasigi râ na bagatauhami ma kamu marupegi hete na ramata iaku ga oga igê na buka ni ramata, gê bani vatera na êvarimi renigi ma na poropete na kariaku ka bani hagatarêngenigi tangagamu.”

¹⁴Ma ngaira ka pe tê viteana. Ngaira ka guguruga mangara na êvarita, ga pe hagêguritogo renia na Araha God iata.

¹⁵Ngaira ka usi vige râ surigi na hagesuringa iana tangara. Ngaira ka pe marupea na suruheri i bani naka henira na êvarita, ma ngaira ka pe botage renia na kanukanuha iana. Ngaira ka rahesira na ataro na marâ purua ma. Tahema ngaira ka vora na enoni purua ma nogata. Ngaira ka râ surigi na tauhata na enoni igê na agua rihira. Vikana ngaira ka haritohea na Araha, i vi, ‘Siana kamu amake surira.’

¹⁶Ngaira ka aharêngigi na ramata hato iana na Araha God iata ma ka tagarahirerua na kareterua na puruka mane renia na kapa higa ma ka rahesirerua. Nikâ ngaira ka tagarahia na nununa ka Asera na ataro, ka rahesigi na higu ma ka vogasia o Bala na ataro.

¹⁷Ngaira ka susu tangara na ataro iata na ahuroto renira o kareta ma ka kareta. Ngaira ka hagatera na enoni ga matu ma na enoni ni girarasiha. Ngaira ka togeaga ngavê ka katogi na tarani ga pe koro i maana na Araha. Tahema ngaira ka hagamangaria renigi.

¹⁸Na Araha ki mangariaga tangara na Isiraelita ma ki rumakaka vê renira, nga noga ma i Juta.

¹⁹Ngaira nogata na ai ni Juta ka pe marupegi na ramata iana na Araha God iata. Ngaira ka râ surigi na tauhata na Isiraelita, ga amake surigi na bagatauhata na enoni getera.

²⁰Na Araha ki kitenira na Isiraelita hato, ki hagaitangira ma ki tagarenira tangara na merongata, ga hagamamasiagara. Ki rârâ ma na Araha ki rumakaka ngavê renira.

²¹Matena na Araha ki bani voasia i Isiraele tenia i Juta, na Isiraelita ka naka o Jerobeama karena o Nebata ki maneraha iata. O Jerobeama ki hagatasira ngavê ka murisigea na Araha.

²²Ngaira ka amake suria o Jerobeama ma ka ama ni râ surigi nga na bagatauhana.

²³Ki rârâ ma na Araha ki rumakaka ngavê renira, manga i bani visia i harata na poropete na kariana. Vikê na ai ni Asiria ka henahuraura na Isiraelita tanga i pasita. Ma ngaira kaniga gâga mêngara i ngekana.

²⁴Na maneraha i Asiria ki torera hura tani na enoni tenigi na hinua i Babele, i Kuta, i Ava, i Hamata me Separavaimi ma ki kasira ka ogasigi na hinua i Samaria urusira na Isiraelita i bani henahuraura. Ngaira ka oga parênigi na hinua ngegana.

²⁵Matena ga oga moramora i ngekana, ngaira ka pe rahesia rârâ na Araha. Tahema na Araha ki nakara na laione ka garahunira na hitangita.

²⁶Tani na enoni ka hagarongoa na maneraha i Asiria, ka vi: “Na enoni go bani kasira ka ogasigi na hinua i Samaria, ngaira ka pe girara, vi manga i he kani tuguhira viga rahesia na ataro i ngekana. Tahema na ataro ki nakara na laione ka garahunira na hitangita.”

²⁷Vikê na maneraha ki haribona, ki vi: “Mu hagatorangenira aporo na hitangita na mane ni vogasiha, ga bani henahuraura me igia. Naka ke aporo ma ke oga i ngekana, hanana i hagagirarara ka rahesia maninga na ataro i na agua ngekana.”

²⁸Vikê ta na mane ni vogasiha na Isiraelita, ga bani henahuraua tenia i Samaria, ki aporo ma ki oga i Betele. I ngekana ngaia ki hagesurira igê na enoni manga hanana ga rahesia maninga na Araha.

²⁹Ma na enoni ga oga parênia i Samaria ka ama ni tagarahigi nga na nunuta na ataro iata mareta ma ka nakara igê na ngêsu iata na Isiraelita, ga bani henahuraura tenigi. Na ara ni hakuta ninuni ki tagarahigi na nunuta na ataro surigi na hinua hegitigi ga ogasigi.

³⁰Na ai ni Babele ka tagarahigi na nununa na ataro Sukote Benote. Na ai ni Kuta ka tagarahigi na nununa na ataro Neregale. Na ai ni Hamata ka tagarahigi na nununa na ataro Asima.

³¹Na ai ni Ava ka tagarahigi na nunuterua na ataro Nibigasa ma Tarataka. Na ai ni Separavaimi ka susu tangarerua Atarameleki ma Anameleki na ataro iata renira na kareta.

³²Ngaira na enoni ngegana ka rahesia nikâ na Araha ma ka atera so i berarogata mareta na ani mavê na enoni, ka vora re na mane ni vogasiha igê na agua ni vogasiha ni ataro ma ka vogasi urusira.

³³Vikê ngaira ka rahesia na Araha ma ka rahesira nikâ na ataro iata mareta surigi na tauhata na enoni i pasita ga râ me tenigi.

³⁴Mataro me i ngekê ngaira ka arâ surigi mênga na bani tauhata i nago. Ngaira ka pe rahesia na Araha ma ka pe marupegi na ramata ma na hagesuringa na Araha i bani nakagi tangara na raraha iana o Jakobo, i hêtana vi o Isiraele.

³⁵Na Araha ki bani naka na suruheri henira na Isiraelita ma ki bani bonasira ki vi: “Siana kamu rahesira na ataro. Siana kamu bêtuhira, se vigamu hagarapera, se vigamu vogasira.

³⁶Mu rahesiê inê hete, inê na Araha, gê bani toregamu hura tenia i Esipito renia na raramohaku raha. Mu bêtuhiê ma inê ma kamu vogasiê inê.

³⁷Mu marupegi nga na ramata ma na hagesuringa, gê bani segegi ki tâ tangagamu. Siana kamu hagarapera na ataro.

³⁸Siana kamu aharêngia na suruheri gê bani naka henigamu.

³⁹Mu rahesiê nga inê na Araha God iami, ma inê kê page hagatahigamu tenira na merongami.”

⁴⁰Ma na enoni ngegana ka pe tê viteana hete ma ka ama ni râ surigi ma na bani tauhata i nago.

⁴¹Vikê na enoni ngegana ka rahesia na Araha ma ka hagarapera nikâ na ataro iata. Ma ki mataro me i ngekê na raraha iata ka ama ni katokato nga vikana.