Read Kahua 2 MANERAHA 18 Bible Online

2 MANERAHA 18 - Kahua bible

2 MANERAHA 18

¹Matena o Hosea karena o Ela ki maneraha i Isiraele surigi noga na harisi gi oru, o Hisikia karena o Agasa ki vora re na maneraha i Juta.

²Ngaia ki tonga na harisi tangahuru gi rua matara gi rima iana. Ngaia ki oga i Jerusaleme ma ki marungia i Juta surigi na harisi tangahuru gi rua matara gi siva. Kenana kani ka Abi ka karena o Sekaria.

³O Hisikia ki hagakoro obana na Araha, suria i amake suria na tauhana na maneraha o Tavite na êvarina.

⁴Ngaia ki hagamagahurugi na agua ni vogasiha ni ataro, ki kumukumugigi na u apuna na hê ma ki tapigi so na nununa ka Asera na ataro. Ngaia ki barubarugia na ma na kapa higa o Moise ki bani tagarahia ma ka hêtana vi Nagusitane. Tariha me igê na matena ngekana na Isiraelita ka sungigi na marâ i sigini koro tanga hanana ga hagahigasia.

⁵O Hisikia ki hagêguritogo renia na Araha God o Isiraele i rahesia. I Juta ki pe nahunia rârâ ta na maneraha koro vige maratorana o Hisikia, henaka vi i nago tarana se i murina.

⁶Ngaia ki toto suria na Araha ma ki tê viteana ngavê. Ngaia ki marupegi maninga na hagesuringa hato, na Araha i bani vatea o Moise renigi.

⁷Tahema na Araha ki ngahisia ma ka tavoraha bâkoro na tagaraha hato iana. Ngaia ki obania vi rêra getea tenia na maneraha i Asiria ma ki usi vige oga nikâ i ruguhana.

⁸Ngaia ki teharira na Pilisitia ma ki ruhuruhugi na hinua iata, na ani raha ma na ani sisite henia i Gasa ma na apaneni rihia.

⁹Igê na heta na harisi iana o Hisikia i maneraha suria, matena o Hosea ki bani maneraha i Isiraele surigi noga na harisi gi pi, o Salamanasare na maneraha i Asiria ki sugaria i Isiraele ma ki oga rihia i Samaria.

¹⁰Ngaia ki oga rihia i Samaria surigi na harisi gi oru ma ki kahu vota i Samaria. Ngaia ka na matena na onota na harisi iana o Hisikia i maneraha surigi ma ki na sivata na harisi o Hosea i maneraha surigi.

¹¹Na maneraha i Asiria ki henahuraura na Isiraelita tanga i Asiria ma ki kasira tani ka oga i hinua i Galaga, ma tani ka oga hagarangia na ve i Gabore i na apanena i Gosane ma tani ka ogasigi na hinua i Metia.

¹²I Samaria ki vota, suria na Isiraelita ka pe tê viteana hete na Araha God iata ma ka aharêngia ma na suruheri i bani naka henira. Ngaira ka aharêngigi na ramata hato, o Moise na kariana na Araha i vatera renigi. Ngaira ka guguruga ma ka pe tê vita.

¹³Matena o Hisikia ki maneraha noga i Juta surigi na harisi tangahuru matare he, o Saneribi na maneraha i Asiria ki taharigi na hinua nganganihaga i Juta ma ki henahuraugi.

¹⁴O Hisikia ki hagatorangenia na mane tora tamasinga tanga o Saneribi, i oga i Lakisi, ki vi: “Inê kê aharê! Inê kê nungigo ke hato vê vigu tahariê. Inê be vatego na anima na marâ go obanigi.” Na maneraha i Asiria ki arami, ki vi, vi o Hisikia ki hagatorangenigi nga na 9,000 kilo na siliva ma na 900 kilo na golo.

¹⁵O Hisikia ki hagatorangenigi tanga na siliva hato ga oga igê na kiboru ni haga i ruma ni rotu ma i ruma raha iana.

¹⁶Nikâ ngaia ki tarisigi râ na golo surigi na maani ruma ni rotu henigi na golo i baraigi ngaia marena renigi na uni na maani ruma. Ngaia ki hagatorangenigi ngaigi hato tanga o Saneribi.

¹⁷Na maneraha i Asiria ki hagatorangenira na mane ni me gahu tenia i Lakisi, hanana ga taharia o Hisikia i Jerusaleme. Na vera oru na mane ni hagaotonga iana, na ani ga teha, ka bêngenira na mane ni me iana. Matena ga ata vê i Jerusaleme, ngaira ka ura hekarigi i tara igê na agua ga hagamatarotarogi igê na gahu, hagarangia na hagepu, i râ me tenia na nonganonga i kere tagere.

¹⁸Ngaira ka kasi tamasinga tanga na maneraha o Hisikia ki râ me. Na mane ni hagaotonga gi oru iana o Hisikia ka râ tangara. Ngaira ka no Eliakimo karena o Gilikia, i bâsuria na ruma raha iana na maneraha, ma o Sebena na mane segesege igê na hagatamasiha, ma o Joa karena o Asapa na mane segesege iana na gavumane.

¹⁹Na hitangita na mane ni hagaotonga ni Asiria ki hagarongora, ki vi: “Na maneraha i Asiria ki obania i girara, vi tanu hega na maneraha o Hisikia kani togeaga.

²⁰Igamu kamu takusia vari, vigamu page tehateha renigi na guruni ma na tamasinga, ma mareha vi renigi na katoha ni hearihatana ma na raramohata na mane ni me? O ti kanimu takusia, vi page tamanigamu, kamu rêra pusia i Asiria?

²¹Igamu kamu takusia vi Esipito. Ma i Esipito ki manga na vato na ate i bagababaro ma ki surigi na rimami. Na maneraha ni Esipito ki manga ngekana tanga na anima na enoni i hagêguritogo renia.”

²²Na mane ni hagaotonga ni Asiria ki tamasi nikâ, ki vi: “Mu vi vari, vi igamu kamu hagêguritogo renia na Araha God iami? Ma o Hisikia kani hatungigi na ngêsu ma na bea ni vogasiha tanga na Araha, matena i bonasira na ai ni Juta me Jerusaleme, ka vogasi ma igê na bea ni vogasiha i Jerusaleme.

²³Inê, na urusina na maneraha i Asiria, inê be hagatagetagegamu. Inê be vategamu na rehagaro gi rua na hosi ni me, manga vigamu ma kamu nahunira na rehagaro gi rua na mane ni me tangara na hosi ngegana.

²⁴Ma igamu kamu marusi era! Bâ, na ani i ruguhaku ki râ me ki taharigamu, ma igamu kamu pe teharia. Henaka, ma igamu kamu ama ni takusia nga, vi na ai ni Esipito kaniga page tamanigamu vari renira na mane ni me igê na hosi ma na kati ni me iata.

²⁵Igamu kamu takusia vari, vi inê be girara ve taharia na apanena iami ma be hagasuhia, manga vi na Araha ma ke pe tamaniê? Ngaia nga na Araha kani bonasiê, kê sugaria ma kê hagasuhia.”

²⁶Ma o Eliakimo mo Sebena mo Joa ka vi tanga na mane ni hagaotonga ni Asiria, ka vi: “Gu tamasi igê na tamasinga iamu. Igami kami girara. Siana ko tamasi igê na tamasinga iamami, suria na enoni hato ga oga igê na para ni hinua ngaira ka karinga me.”

²⁷Ngaia ki aramira, ki vi: “Mu takusia vari, vi na maneraha teha i Asiria ki hagatorangeniê me, kê tamasi tangagamu ma, igamu ma na maneraha iami? Mareha vê! Inê kê tamasi tangara nikâ na enoni ga oga igê na para ni hinua. Ngaira ka page ngêngê na aeta ma ka page totono na mimita, ma igamu nogami!”

²⁸Na mane ni hagaotonga i Asiria ki aharaga ma ki ngere raha igê na tamasinga iata na ai ni Juta, ki vi: “Mu rongoa na tamasinga iana na maneraha i marungia i Asiria.

²⁹Ngaia ki vi tangagamu, vi, ‘Siana kamu hagamarumungenia o Hisikia, ki hagahagaparugamu. I asa iana, vige hagatahigamu.

³⁰Siana kamu naka o Hisikia ki katogamu, kamu hagêguritogo renia na Araha. Siana kamu tongesuria, matena i vivi, ‘Na Araha ki page hagatahigia nga. Na maneraha i Asiria ki asa, vige henahuraua na hinua ikê.’

³¹Siana kamu tê viteana o Hisikia. Na maneraha i Asiria ki bonasigamu, vigamu têtê viteana hete. Mu huhura me tenia na hinua ma kamu nakagamu maremi i ruguhana. Vikana igamu kamu girara mu ngêngê na guani na vaini iami maremi ma na guani na apinige na fiki iami maremi, ma kamu totono na ve igê na vekaru iami maremi.

³²Na maneraha i Asiria ki hagamarumu tangagamu vikana, mataro me ki toregamu vê ki arâ ki kasigamu igê na agua i tagenana ma manga na animi maremi. I ngekana nikâ ka oga igê na pariki ni vaini ma na mu ni ngêra. Ngaia ki na agua ni pariki ni olive ma ni oile ni olive ma ni pirui. Manga mu têtê viteana, igamu ki asa, vigamu page me, ma kamu page mauri hete. Siana kamu naka o Hisikia, ki hagabekasigamu, kamu takusia, vi na Araha ki page hagatahigamu.

³³Na ataro iata na enoni igê na agua getigi, ka hega, ga hagatahira vari na enoni igê tenia na maneraha i Asiria?

³⁴I he ngaira nga na ataro i Hamata ma i Arapata? I he ngaira nga na ataro i Separavaimi, i Hena ma i Iva? Ta na ataro ki hagatahia i Samaria vari?

³⁵Mu bâsia vari ta na hitangita na ataro ngegê i hagatahia ta na agua tenia na maneraha iamami? Tanu hega mu takusia, vi na Araha kani girara i hagatahia i Jerusaleme?”

³⁶Na enoni ka muni ma, suria na maneraha o Hisikia ki hagapêpura. Ngaira ka pe ruhasigi rârâ na harata.

³⁷Ma o Eliakimo mo Sebena mo Joa ka tarisigi na tuguni iata mareta, suria i era na obata renigi na tamasinga ngegana. Ngaira ka râ ka hagarongoa na maneraha renigi na tamasinga iana na mane ni hagaotonga ni Asiria.