Read Kahua 2 MANERAHA 20 Bible Online

2 MANERAHA 20 - Kahua bible

2 MANERAHA 20

¹Igê na matena ngekana nikâ o Hisikia ki maeha ma ki haga ni me. Na poropete o Isaia karena o Amose ki râ ki vatugia, ma ki vi tanga, ki vi: “Na Araha ki obanigo, vigo hagaotogi na ara ni marâ, suria igo ko sugi meme noga. I asa vigu page komaga aporo. Hoi, gu nanê.”

²O Hisikia ki ahoro râ i na apê ma ki nungia na Araha, ki vi:

³“Araha, bâ, inê kê toto surigo tare i mêrihaku hagenani. Inê kê aganarigi tare na marâ go bonasiê renigi.” Ma ki nahuia na enangiha.

⁴O Isaia ki pania na maneraha. Matena i râ suria na beraro na ruma raha iana na maneraha, na Araha ki bonasia, ki vi:

⁵“Gu aporo i pasina o Hisikia, na maneraha iata na kariaku inê, inê na Araha, ma ko vi tanga ko vivi, ‘Inê na Araha God i rahesiê na êvarimu o Tavite, inê kê rongoa na avarasiha iamu ma kê bâsigi na tavoni na maamu. Inê be hagakomagago, ma i murini na tangiani gi oru igo ko page arâ nikâ i ruma ni rotu.

⁶Inê kê naka akê nikâ tangago na harisi tangahuru matare rima. Inê be hagatahigo, igo ma na hinua ikê i Jerusaleme tenia na maneraha i Asiria. Inê be anumasia na hinua ikê, hanana na enoni ke hagarahasiê ma renia na suruha iaku tanga o Tavite na kariaku.”

⁷Memuri o Isaia ki vi tangara na kariana na maneraha, ka aba na mamanuha iana renia na meresini ga tagarahia renigi na guani na fiki, ma ki kahu komaga aporo.

⁸Mo Hisikia na maneraha ki hagatea, ki vi: “Na girarana ta na Araha ki page vateê renia, hanana gê girara, vigê komaga aporo ma kê page arâ nikâ kê rotu?”

⁹O Isaia ki arami, ki vi: “Na Araha ki page vatego renia na girarana, hanana i hagagirarago, vi ngaia ki page hagamonaria na suruha iana tangago. I hega, na tarana ta ko obania matena go tagere tanga na ruma ni rotu? Na nununa na kere matena na apinige ni pepe ni rito ki borahu se i abubu?”

¹⁰O Hisikia ki arami, ki vi: “I borahu ki mataku ma. Hoi, ge abubu hete.”

¹¹O Isaia ki nungia na Araha ma na Araha ki katoa na nununa ki abubu i tara tagere i tagarahia na maneraha o Agasa.

¹²Igê na matena ngekana na maneraha i Babele o Berotaka Balatana karena o Balatana, ngaia ki rongoa, vi na maneraha o Hisikia ki maeha ma ki bani komaga aporo. Tahema ngaia ki hagatorangenira na mane tora tamasinga henigi na leta ma na mahatanga iana tanga.

¹³O Hisikia ki unira banu ma ki hagabâsira renigi na ruruguha iana: na siliva, na golo, na ngêra ma na marâ ga sigini koro ma na tangaruha hato iana. Mareha rârâ ta na marâ igê na ruma iana se vi igê na agua hagenani, vige pe hagabâsira renigi.

¹⁴Ma hemuri na poropete o Isaia ki râ i pasina na maneraha o Hisikia ma ki hagatea, ki vi: “Na mane igê ka râ me tenia i he? Na ta kaniga visigi tangago?” O Hisikia ki arami, ki vi: “Ngaira ka râ me hagatê era, tenia i Babele.”

¹⁵O Isaia ki hagatea nikâ, ki vi: “Na ta kaniga bâsigi i ruma raha iamu?” Ma ngaia ki arami ki vi: “Ngaira ka bâsigi na ara ni marâ hato i ruma iaku. Inê kê hagabâsira renigi na ara ni marâ i ruma iaku, ma igê na kiboru.”

¹⁶Mo Isaia ki vi tanga na maneraha, ki vi: “Na Araha raramohaga hunia ki vi,

¹⁷vi ta na matena i muri me na ai ni Babele ka page henahuraugi na ara ni marâ hato i ruma raha iamu ma na ara ni marâ hato na êvarimu ka bani ruguni me mataro me i ngekê, ma ka page totora râ tanga i pasita i Babele. I asa ngavê vige page hita so ta na marâ.

¹⁸Ngaira ka page torera vê nikâ tani o karemu ma ka page voera, hanana ga tagara i ruma iana na maneraha i Babele.”

¹⁹Na maneraha o Hisikia ki takusia ma, vi na tamasinga ngekê ki vi, vi na marapeha ma na ramana suria na matena iana i tahitahi mênga. Tahema ngaia ki arami, ki vi: “Na tamasinga iana na Araha, go hagarongoê renia, ki koro era.”

²⁰Na tauhana hato getigi na maneraha o Hisikia, na arahanga iana ma manga i he i tagarahia na agua i oga igê na ve henia na hagepu i arâ me igê na ve tanga na hinua, ka bani segegi so igê na buka na sihonga renira na maneraha i Juta.

²¹O Hisikia ki me ma o Manase o karena ki maneraha urusia.