Read Kahua 2 MANERAHA 21 Bible Online

2 MANERAHA 21 - Kahua bible

2 MANERAHA 21

¹O Manase ki tonga na tangahuru matarerua na harisi iana, matena i vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru gi rima matara gi rima. Kenana kani ka Gepesipa.

²O Manase ki murisigea na Araha, suria i râ surigi na bagatauhata na enoni ahuroto, na Araha i bani tarigenira hura tenia na agua tarata na kariana.

³Ngaia ki tagarahigi aporo na agua ni vogasiha ni ataro, i bani ruhuruhugi o Hisikia o vaemana. Ngaia ki tagarahigi na bea ni vogasiha tanga o Bala na ataro ma ki tagarahia na nununa ka Asera na ataro, tagenana manga o Agaba na maneraha i Isiraele. O Manase ki rahesigi nikâ na higu.

⁴Ngaia ki tagarahigi na bea ni vogasiha ni ataro i ruma ni rotu, na ruma na Araha i bani naka hete tanga viga rahesia ma igê ngaia.

⁵Igê na beraro gi rua ni ruma ni rotu ngaia ki tagarahigi igê na bea ni vogasiha tangagi na higu.

⁶Ngaia ki susu igê renia o karena. Ngaia ki hagatera na ataro ma ki harikua ma ki hagatera na enoni ni girarasiha ma na nunuta na enoni ga bani me. Ngaia ki tasi ngavê i maana na Araha ma ki hagamangaria.

⁷Ngaia ki hagêrasia na nununa ka Asera na ataro i ruma ni rotu, na ruma na Araha i bani tamasi renia tangarerua o Tavite ma o Salomo o karena, ki vi: “Ikê nga i Jerusaleme, i rarona nga na ruma ni rotu ikê, ngaia nga ka na agua gê bani atea tenigi na apaneni hato iata hehegitig na varo ninuni tangahuru matarerua iana o Isiraele. Ngaia nga ka na agua ga rahesiê igê inê.

⁸Ma ki manga na Isiraelita ma ka marupegi na ramata hato iaku ma na ramata hato o Moise na kariaku i bani vatera renigi, hoi, inê ki asa vi ve page nakara na merongata ke tarigenira hura tenia na agua, gê bani haganahunira na êvarita renia.”

⁹Ma na ai ni Juta ka murisigea na Araha ma o Manase ki hagatasira ka tasi raha ngavê teharira na enoni ahuroto, na Araha i bani tarigenira hura tarata na kariana.

¹⁰Na Araha ki tamasi i harata na poropete na kariana, ki vi:

¹¹“Na maneraha o Manase ki bagaparongana ngavê teharira na Kananita. Ngaia ki hagatasira na ai ni Juta renigi na nunuta na ataro.

¹²Tahema inê na Araha God iata na Isiraelita kê page naka na bagabevoana raha ke tarahurerua i Jerusaleme me Juta, hanana na enoni ga rongorongo tarohana, ka konekone ngavê.

¹³Inê kê page hagaitangia i Jerusaleme tagenana manga i Samaria, tagenana manga o Agaba na maneraha i Isiraele henira na raraha iana. Inê kê page sinoa i Jerusaleme ki matarotaro ngavê renira na enoni igê, ki matarotaro manga na apira ga tanania hato ma ka buhingenia.

¹⁴Inê kê page nakara vê na enoni ga page tahi ma kê page tagarenira tangara na merongata, ga page henahuraura ma ka page rurugua ngavê na apanena iata.

¹⁵Inê kê page katora vikana na kariaku, suria ngaira ka murisigeê ma ka hagamangariê haganega me tenia na matena na êvarita ka hura tenia i Esipito mataro me i ngekê.”

¹⁶O Manase ki mutera rako ngavê na enoni koro ma na gaputa ki tata berabera surigi na tara i Jerusaleme. Na nahunga ninuni ngekê ki hagapuria akê na bêngeniana na ai ni Juta ka rahesira na ataro. Vikana ngaia ki katora na enoni ka murisigea na Araha.

¹⁷Na tauhana hato getigi o Manase henigi na bagatauhana ka bani segegi so igê na buka ni sihonga renira na maneraha i Juta.

¹⁸O Manase ki me ma ka bagia i mu ni hagamahe, na mu iana o Usa, i mataro râ igê na ruma raha iana na maneraha. O Amone o karena ki maneraha urusia.

¹⁹O Amone ki tonga na tangahuru gi rua matarerua na harisi iana, matena i vora re na maneraha i Juta. Ngaia ki oga i Jerusaleme ma ki marungia i Juta surirerua na harisi gi rua. Kenana kani ka Mesulemeti, ka karena o Garusi i hinua i Joteba.

²⁰Ngaia ki murisigea na Araha manga o Manase o vaemana.

²¹Ngaia ki râ surigi na bagatauhana o vaemana ma ki hagarapera na ataro iana o vaemana.

²²Ngaia ki kitenia na Araha God iata na êvarina ma ki aharêngigi na ramata iana na Araha.

²³Na mane ni hagaotonga iana ka harikato renia ma ka nahuia ki me i ruma raha iana.

²⁴Na ai ni Juta ka nahuira ka me na mane ga nahuia ki me o Amone ma ka atea o Josia o karena ki maneraha.

²⁵Na tauhana hato getigi o Amone ka bani segegi so igê na buka ni sihonga renira na maneraha i Juta.

²⁶Ga bagia o Amone igê na matahu i mu ni hagamahe iana o Usa. O Josia o karena ki maneraha urusia.