Read Kahua 2 MANERAHA 22 Bible Online

2 MANERAHA 22 - Kahua bible

2 MANERAHA 22

¹O Josia ki tonga na harisi ge varu iana, matena i vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru gi oru matare tage. Kenana kani ka Jetita ka karena o Ataia i hinua i Bosakate.

²O Josia ki hagakoro obana na Araha. Ngaia ki amake suria na maneraha o Tavite na êvarina ma ki marupegi maninga na ramata hato iana God.

³Matena o Josia ki maneraha noga surigi na harisi tangahuru matare varu, ngaia ki hagatorangenia o Sapane na mane ni segesegeha iana, karena o Asaliahu ma o vesina o Mesulama, ki râ i ruma ni rotu.

⁴Ngaia ki bonasia, ki vi: “Go arâ i pasina o Gilikia na mane ni vogasiha i teha ma ko tarahua tenia, vi na haga gi hita kaniga tavogi na mane ni vogasiha ga tagara i maana na ruma ni rotu, tenira na enoni.

⁵Go vi tanga, ki vatera na haga na mane ga basuria na surungiana ni ruma ni rotu. Ngaira ki tuguhira viga vurira re,

⁶na mane totora ruma, na mane ga bâsurigi na tagaraha ni ruma, ma na mane ga pangapanga na apê renigi na hê, ma ka vurivuri re na apinige ma na hê tanga na surungiana.

⁷Na mane ga bâsuria na tagaraha, ka bâsurigi maninga ngavê na haga, hanana i pe araria vige bâbâ igê, manga i he ki huhura na haga.”

⁸O Sapane ki torea na tamasinga iana na maneraha tanga o Gilikia. O Gilikia ki hagarongoa, vi ngaia ki tarahua na buka na ramata i ruma ni rotu. O Gilikia ki vatea o Sapane na buka ma o Sapane ki tomania.

⁹Hemuri ngaia ki aporo i pasina na maneraha ma ki hagarongoa, ki vi: “Na kariamu ka bani tavogi na haga i ruma ni rotu ma ka bani vatera na mane ga bâsuria na surungiha.”

¹⁰Hemuri ngaia ki vi: “O Gilikia ki vateê na buka. Ngaia kani ikê.” Ma ngaia ki tomania raha tanga na maneraha.

¹¹Matena na maneraha ki rongoa hato na tomatomaha igê na buka, ngaia ki tarisigi na tuguni iana, suria i anumanuma.

¹²Ngaia ki bonasira o Gilikia na mane ni hagarahenga o Agikama karena o Sapane, o Akabore karena o Mikaia, o Sapane na mane ni segesegeha iana ma o Asaia na kariana, ki vi:

¹³“Mu arâ kamu hagate surigia i pasina na Araha inê ma na enoni hato i Juta, renigi na hagesuringa i na buka ikê. Na Araha ki mangariaga tangagia, suria na êvarika ka pe marupegi na ramata i na buka ngekê.”

¹⁴O Gilikia, o Agikama, o Akabore o Sapane ma o Asaia ka râ ka hagatea ka Guluta na poropete, i oga i na apanena haoru na hinua i Jerusaleme. O vaniana ka no Salumu karena o Tikiva ma o vesina o Garagasi. O Salumu ki bâsurigi na gahu tanga na hagarahenga i ruma ni rotu. Ngaira ka hagarongoa ka Guluta renigi na tarani i vora me.

¹⁵Ngaia ki vi tangara, ki vi: “Mu aporo i pasina na maneraha,

¹⁶ma kamu hagarongoa renia na tamasinga iana na Araha, i vi, ‘Inê kê page hagaitangia i Jerusaleme ma na enoni hato igê, manga i bani visia na buka i tomania na maneraha.

¹⁷Ngaira ka kiteniê ma ka vogasira ma na ataro. Tahema ngaira ka hagamangariê renigi na bagatauhata. Na mangariaganiha iaku ki tâ nga tanga i Jerusaleme.

¹⁸Tanga na maneraha, inê na Araha God iata na Isiraelita, inê kê vi vikê: Igo ko bani rongogi na tamasinga igê na buka

¹⁹ma ko bani urisi parongamu ma ko ruhigo maremu i maaku, matena go tarisia na tuguni iamu ma ko angi, suria go rongoa, vi manga i he kê haganunu, vigê hagaitangia i Jerusaleme ma na enoni igê. Inê kê page katoa ki bâbâ mamagutaga. Ngaira ka page hearange renia na atana. Ma inê kê bani aganaria na nunginungiha iamu.

²⁰Na hagaitangiha gê bani naka tanga i Jerusaleme ki page voravora me i murina go meme igo. Igo ko page meme bâkoro.’” Hoi, na mane ka meaporo na tamasinga ngekê tanga na maneraha o Josia.