Read Kahua 2 MANERAHA 23 Bible Online

2 MANERAHA 23 - Kahua bible

2 MANERAHA 23

¹Na maneraha o Josia ki bonasira na meraha hato i Juta me Jerusaleme ka râ me.

²Ngaira hato ka râ tanga na ruma ni rotu henira na mane ni vogasiha ma na poropete ma na enoni hato getera, na enoni raha ma na enoni purua. Ngaia ki tomania raha i maata ngaira hato na enoni raha na buka hagenani ni suruheri ga bani tarahua i ruma ni rotu.

³Ngaia ki ura igê na u na atohani maneraha ma ki suru igê tanga na Araha, hanana vi têtê viteana na Araha, ki marupegi na ramata ma na hagesuringa iana i mêrihana hagenani ma ki arâ surigi maninga na ramata ni suruheri manga i visigi na buka. Na enoni hato ka suru, viga marupea na suruheri.

⁴Hemuri o Josia ki bonasira o Gilikia na mane ni vogasiha i teha ma na mane ni vogasiha na tamana, ma na mane ga anumasia na maani ruma ni rotu, hanana ga toregi hura tenia na ruma ni rotu na ara ni marâ hato tanga ga rahesia igê o Bala, tanga ga rahesia igê ka Asera na ataro ma tangagi na higu. Na maneraha ki hagamakakagi na marâ hato ngegana i metara i hinua, hagarangia na maruguna i Kiterone, ma ki haribona ka tora râ na rahugani tanga i Betele.

⁵Ngaia ki hatungira na mane ni vogasiha, na maneraha i Juta ga bani hagapura, hanana viga vogasi igê na bea ni vogasiha ni ataro surigi na hinua i Juta ma surigi na agua harangia i Jerusaleme. Ngaira ngegana ka na mane ni vogasiha ga vogasi tanga o Bala ma tangagi na arito, na hageha ma na higu ma na marâ hato i vavearo.

⁶Ngaia ki tavoa hura tenia na ruma ni rotu na nununa ka Asera na ataro, ma ki mehura tenia na hinua tanga na maruguna i Kiterone, ki sungia ma ki putagia na rahugana ki maramomoga ma ki kuhuigi na matahuta na enoni renigi.

⁷I ruma ni rotu ngaia ki hogegi igê na kiboru iata na êrâ, na mane ma na gete, ma nikâ na kiboru iata na gete ga hêhê igê na tuguni ni hagarahenga tanga ka Asera.

⁸Ngaia ki torera tanga i Jerusaleme na mane ni vogasiha surigi na hinua i Juta, ma ki hagaerasigi na bea ni vogasiha tangara na ataro na gete. Na bea ni vogasiha ngegana ka oga hagarangia na maani para i tagarahia o Josua i bâsuria na hinua. Na maani para ngekê ki oga i na apanena na mahana na maani para raha, matena ga bêbanu i hinua.

⁹Na mane ni vogasiha ngegana ki apu tangara, vige tagara i ruma ni rotu ma ki ararira ma, ga ngaugi na bereti ga pe ahunga iata na tamata na mane ni vogasiha.

¹⁰Na maneraha o Josia ki hagaerasia nikâ i Topete, na agua ni vogasiha ni ataro igê na maruguna i Hinome, hanana siana na enoni ka susu nikâ igê renira o kareta se ka kareta tanga o Moleki na ataro.

¹¹Nikâ ngaia ki torera vê na hosi, na maneraha i Juta ga bani nakara hanana ga rahesia na arito renira. Ngaira ka oga igê na maani ruma ni rotu, igê na beraro ma hagarangia na kiboru iana o Natane Meleki na mane ni hagaotonga. Ngaia ki hagamakaka na kati ni arito tanga na hagarahenga ngekana.

¹²Na maneraha o Josia ki hogegi na bea ni vogasiha ga tagarahigi na maneraha i Juta i gerina na ruma iana na maneraha, i avorana na kiboru iana na maneraha o Agasa. Nikâ ngaia ki hogegi na bea ni vogasiha i tagarahigi na maneraha o Manase igê na beraro gi rua i maana na ruma ni rotu. Ngaia ki kumukumugi na bea ni vogasiha ma ki kasigi na ameamegani igê na maruguna i Kiterone.

¹³O Josia ki hagaerasigi na bea ni vogasiha i tagarahigi na maneraha o Salomo i na apanena bêkê i Jerusaleme hagarangia na hungana ni olive. Na maneraha o Salomo ki tagarahigi tanga ga rahesira igê na ataro era: ka Asitareta na ataro iata na ai ni Sitone ma o Kemose na ataro iata na Moabita ma o Moleki na ataro iata na Amonita.

¹⁴Na maneraha o Josia ki menamenarigi na u apuna na hê, ma ki tapi barugigi na nununa ka Asera na ataro ma ki kasi na sururita na enoni igê na agua ga ura igê.

¹⁵O Josia ki hogea nikâ na agua ni vogasiha i Betele, na agua i tagarahia na maneraha o Jerobeama karena o Nebata i hagatasira na Isiraelita. O Josia ki hogea na bea ni vogasiha, ki menamenarigi na hê na bea ni vogasiha ma ki kumukumugi ki maramomoga. Nikâ ngaia ki hagamakaka na nununa ka Asera.

¹⁶Hemuri o Josia ki sira rârâ ma ki bâsigi tani na matahu igê na hungana. Ngaia ki haribona ka ruguni hura na surita na enoni ma ka sungigi igê na bea ni vogasiha. Suria vikana ngaia ki hagaerasia na bea ni vogasiha. Ma ngekana ngaia ki hagamonaria na tamasinga i bani visia na poropete i kerevê noga igê na tangiana ni rotu, matena na maneraha o Jerobeama i ura hagarangia na bea ni vogasiha. Na maneraha o Josia ki sira rârâ ma ki bâsia na matiku iana na poropete i hinaru vikana.

¹⁷O Josia ki hagate, ki vi: “Ti ka na matiku iana?” Na ai ni Betele ka arami, ka vi: “Na matiku iana na poropete ni Juta, i hinarugi na tauhamu renia na bea ni vogasiha ikê.”

¹⁸O Josia ki haribona, ki vi: “Naka vê. Siana mu tavotavo râ na surina.” Vikê na surina ka oga mavê, ma nikâ na surina nogana na poropete ni Samaria.

¹⁹Surigi na ara ni hinua hato i Isiraele na maneraha o Josia ki hogegi na ara ni bea ni vogasiha hato ni ataro, ga tagarahigi na maneraha i Isiraele, ga hagamangaria na Araha renigi. Ngaia ki hagaerasigi na bea ni vogasiha ngegana manga i Betele.

²⁰Ngaia ki mutera na ara ni mane ni vogasiha ni ataro igê na bea ni vogasiha ga susu igê, ma ki sungigi na surita na enoni igê na ara ni hitangini na bea ni vogasiha. Hemuri ngaia ki aporo i Jerusaleme.

²¹Na maneraha o Josia ki bonasira na enoni ka hagahigasia na paseka, hanana ga hagarahasia na Araha God iata, manga i bani oga igê na buka ni suruheri.

²²I mareha rârâ ta na hitangita na maneraha i Isiraele se vi i Juta, vige hagarahasia na paseka manga ngekê, i bani haganega me i pasita na mane ni hagaotonga iata na Isiraelita.

²³Matena o Josia ki maneraha surigi noga na harisi tangahuru matare varu, hoi, ngekana ka kahu hagarahasia moramora igê na Paseka i Jerusaleme.

²⁴Na maneraha o Josia ki hagaharagasira tenia i Jerusaleme ma tenia i Juta hagenani na enoni ni matuha ma na enoni ni girarasiha, ma na harasi ni ruma, na nunuta na ataro ma na marâ hato getigi ni vogasiha ni ataro. Ngaia ki kato vikana, hanana na enoni ka arâ surigi nga na ramata igê na buka i tarahua i ruma ni rotu o Gilikia na mane ni vogasiha i teha.

²⁵Haganega me tenia i nago kerevê noga ki mareha rârâ ta na maneraha, vige maratorana na maneraha o Josia. Ngaia ki tê viteana na Araha i mêrihana hagenani ma ki marupegi na ramata hato iana o Moise. Ma i murina ngaia, ki mareha rârâ ta na maneraha vige maratorana vikana.

²⁶Ma na mangariaganiha raha iana na Araha ki tâ tanga i Juta renigi na bagatauhana na maneraha o Manase.

²⁷Na Araha ki vi: “Inê kê page katoa i Juta manga gê katoa noga i Isiraele. Inê kê page rumakaka ngavê renira na ai ni Juta. Inê kê page kasikasi renia i Jerusaleme na hinua gê bani atea. Inê kê page kasikasi renia na ruma ni rotu, na agua gê bani naka tanga viga rahesiê igê.”

²⁸Na tauhana hato getigi na maneraha o Josia ka bani segegi so igê na buka na sihonga renira na maneraha i Juta.

²⁹Matena o Josia ki maneraha, o Neko na maneraha i Esipito ki bêngenira na mane ni me tanga na ve i Uparatesi, hanana ga tamania na maneraha i Asiria. Na maneraha o Josia ki uhungia vi rêra pusira na mane ni me ni Esipito i Megito, ma ngaia ki me igê na hearihatana.

³⁰Na mane ni hagaotonga iana ka hagarutangia na gahuana igê na kati ni me ma ka aporo i Jerusaleme ma ka bagia igê na matahuta na maneraha. Na ai ni Juta ka atea o Joagasi karena o Josia ma ka monea ki maneraha.

³¹Matena o Joagasi ki tonga na harisi tangahuru gi rua matare oru, ngaia ki vora re na maneraha i Juta. Ngaia ki oga i Jerusaleme ma ki marungia i Juta surigi na hageha ge ono. Kenana kani ka Gamutale ka karena o Jiremeiahu ni Libina.

³²Ngaia ki murisigea na Araha, suria i amaka surigi na bagatauhata na êvarina.

³³Ngaia ki hato vige maneraha, suria o Neko na maneraha i Esipito ki henahuraua i Ribila i na apanena i Hamata. Ngaia ki katoa i Juta ki vuri re na 3000 kilo na siliva ma na 30 kilo na golo.

³⁴Na maneraha o Neko ki kasia o Eliakimo karena o Josia ki maneraha urusia o Josia, ma ki urusia na atana, ga hêtana vi o Joiakimo. Na maneraha o Neko ki torea o Joagasi tanga i Esipito, ma o Joagasi ki me i ngekana.

³⁵Na maneraha o Joiakimo ki tavo takesi tenira na enoni hagararigi na nahuninga iata, hanana i garia na haga tanga i vuria renia na takesi i nungia na maneraha i Esipito.

³⁶O Joiakimo ki tonga na harisi tangahuru gi rua matare rima iana, matena i vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru matare tage. Kenana kani ka Sebuta ka karena o Petaia na mane i hinua i Ruma.

³⁷O Joiakimo ki murisigea na Araha, suria i amaka surigi na bagatauhata na êvarina.