Read Kahua 2 MANERAHA 24 Bible Online

2 MANERAHA 24 - Kahua bible

2 MANERAHA 24

¹Matena o Joiakimo ki maneraha, o Nebukanesare na maneraha i Babele ki sugaria i Juta. O Joiakimo ki oga i ruguhana o Nebukanesare surigi na harisi gi oru ma ki kahu hura tenia na ruguhana.

²Na Araha ki nakara na haku na me ni Babilonia, ni Siria, ni Moaba ma ni Amone ka taharia o Joiakimo, hanana ga ruhuruhua i Juta, manga i bani visia na Araha i harata na poropete na kariana.

³Na Araha kani naka nga vikana, hanana i rumakaka renira na ai ni Juta surigi na bagatauhana hato na maneraha o Manase,

⁴ma suria nga hete i mutera rako na enoni ga pe erasia rârâ ta na marâ. Na Araha ki asa vige bonotenia na bagatauhana o Manase ngekana.

⁵Na tauhana hato getigi o Joiakimo ka bani segegi so igê na buka na sihonga renira na maneraha i Juta.

⁶O Joiakimo ki me ma o Joiakino o karena ki maneraha urusia.

⁷Na maneraha i Esipito henira na mane ni me iana ki asa, vige tavo uga hura nikâ tenia i Esipito, suria na maneraha i Babele ki marungigi na apaneni hato ga oga i nago i ruguhana i Esipito, haganega tenia na ve i Uparatesi ki tariha igê na ve na taritarihana i Esipito.

⁸Matena o Joiakino ki tonga na harisi tangahuru matare varu iana, ngaia ki vora re na maneraha i Juta. Ngaia ki oga i Jerusaleme ma ki marungia i Juta surigi na hageha gi oru. Kenana kani ka Negusita ka karena o Elenatane i Jerusaleme.

⁹O Joiakino ki murisigea na Araha, suria i amake surigi na bagatauhana o vaemana.

¹⁰Matena o Joiakino ki maneraha, na mane ni me ni Babele ka tavo uga tanga i Jerusaleme ma ka oga rihia. Na maneraha o Nebukanesare ki mareha vige bêngenira.

¹¹Ngaia marena ki kahu râ me ma tanga i Jerusaleme, matena ga bani oga rihia.

¹²Na maneraha o Joiakino henira kenana, o karena, na mane ga bêngenira na mane ni me iana ma na mane ni hagaotonga i ruma raha iana, ngaira ka nakara mareta i ruguhata na ai ni Babele. Igê na varuta na harisi i maneraha igê o Nebukanesare ngaia ki henahuraua o Joiakino.

¹³Ngaia ki rurugu tanga i Babele na ruruguha hato i ruma ni rotu ma i ruma raha iana na maneraha. Manga i bani visia na Araha, o Nebukanesare ki hasuigi râ na golo hato tenigi na marâ i bani tagarahigi o Salomo na maneraha tanga na hagarahenga i ruma ni rotu.

¹⁴O Nebukanesare ki henahuraura na ai ni Jerusaleme, na mane hato ga bêngenira na mane ni me ma na meraha hato. Ngaira haku ka vora na rehagaro tangahuru gi tage. Ngaia ki henahuraura nikâ na mane hato ga manisingenigi na tagaraha henira na ani ga tagara renigi na aiani. Nga noga ma na enoni purua ma ka matareha ngavê kaniga hita so i Juta.

¹⁵O Nebukanesare ki henahuraura tanga i Babele o Joiakino ma kenana, ngaira kaniana, na mane ni hagaotonga iana ma na meraha i Juta.

¹⁶Ngaia ki henahuraura tanga i Babele na enoni raha hato. Na rehagaro gi pi ngaira hato ma nikâ na rehagaro gi pi na mane ga manisingenigi na tagaraha henira na ani ga tagara renigi na aiani. Ngaira hato ka na mane ramo ma ka arari ni hearihatana.

¹⁷O Nebukanesare ki kasia o Matania o mona o Joiakino ki maneraha i Juta ma ki urusia na atana, ga hêtana vi o Setekia.

¹⁸Matena o Setekia ki tonga na harisi tangahuru gi rua matare tage iana, ngaia ki vora re na maneraha i Juta. Ngaia ki oga i Jerusaleme ma ki marungia i Juta surigi na harisi tangahuru matare tage. Kenana kani ka Gamutale ka karena o Jiremeiahu ni Libina.

¹⁹Na maneraha o Setekia ki murisigea na Araha manga na maneraha o Joiakimo.

²⁰Na Araha ki mangariaga ngavê tangara na ai ni Jerusaleme me Juta. Tahema ngaia ki rumakaka ngavê renira.