Read Kahua 2 MANERAHA 3 Bible Online

2 MANERAHA 3 - Kahua bible

2 MANERAHA 3

¹Matena o Josapata ki bani maneraha i Juta surigi na tangahuri harisi matare varu, o Jorama karena o Agaba ki vora re na maneraha i Isiraele, ma ki marungia i Samaria surigi na harisi tangahuru matare rua.

²Ngaia ki haritohea na Araha ma ki pe era ngavê manga o vaemana se ka Isebele kenana. Ngaia ki barubarugia na nununa o Bala, o vaemana i bani hagêrasia tanga viga vogasia.

³Henaka, ma ngaia ki hagatasira na Isiraelita manga na maneraha o Jerobeama karena o Nebata i nago. Ngaia ki ama ni hagatasira nga.

⁴O Mesa na maneraha i Moaba ki togoha renira na sipi. I na ara ni harisi ngaia ki vuria na takesi tanga na maneraha i Isiraele renira na 100,000 na kareta na sipi ma renigi na varehuta na 100,000 na sipi.

⁵Ma na matena i me igê o Agaba na maneraha i Isiraele, o Mesa ki usi ma ki merongasia na maneraha i Isiraele.

⁶Na maneraha o Jorama ki pania ototo râ i Samaria ma ki hagahakura na mane ni me hato iana.

⁷Ngaia ki kasi tamasinga tanga o Josapata na maneraha i Juta, ki vi: “Na maneraha i Moaba ki merongasiê. I hega, go page tamaniê, karu meheariha?” Na maneraha o Josapata ki arami, ki vi: “Mako. Inê kê nanê ma ka nanê nogata na mane ni me iaku ma na hosi iaku.

⁸Na ani ta na tara kaniga arâ igê, hanana ga taharia?” O Jorama ki arami, ki vi: “Ga arâ igê na ani i borahu na tara, i aharêvoro igê na bagamasusu raha i Etome.”

⁹Hoi, na maneraha o Jorama ki tavo uga henirerua na maneraha i Juta me Etome. I murina ga tavo uga surigi na tangiani gi pi, ngaira ki hato na ve tenira. Ki mareha ngavê na ve tangara na mane ni me se vi tangara na tonki ma na marâ vigana ga toregi na toraha.

¹⁰Na maneraha o Jorama ki vi: “Ga hato!” Na ta ka garia? Na Araha ki tagarenigia igia gi oru tanga na maneraha i Moaba!”

¹¹Na maneraha o Josapata ki hagate, ki vi: “I hega, ta na poropete ki oga ikê, hanana i hagatea na Araha tangagia?” Ta na mane i bêngenira na mane ni me iana o Jorama na maneraha, ki arami, ki vi: “O Elisa karena o Sapata ngaia kani gâga. Ngaia kani tamana o Elia.”

¹²Na maneraha o Josapata ki vi: “Na poropete monari ngekana.” Vikê na maneraha gi oru ka râ i pasina o Elisa.

¹³O Elisa ki vi tanga na maneraha i Isiraele, ki vi: “Tanu hega kani vigê tamanigo inê? Gu râ ku hagatera na poropete ngegana manga o vaemamu ma kenamu garu bani hagatera tare.” O Jorama ki arami, ki vi: “Mareha. Na Araha ngaia kani tagarenigami tanga na maneraha i Moaba.”

¹⁴O Elisa ki arami, ki vi: “Inê kê tohe renia na Araha mamauri, gê tagara tanga. Inê kê tohe, vi pe marâ na apeku renigo, manga vi inê ma kê pe hagahigasia na tamamu o Josapata na maneraha i Juta.

¹⁵Hoi, ge râ me ta na mane ni tarugiha ni gita.” Matena na mane ki tarugigi na varo, na raramohana na Araha ki angaria o Elisa.

¹⁶O Elisa ki vi: “Na Araha ki tamasi vikê: ‘Oparigi na tarana rugu rârâ suria na marave ikê.

¹⁷Henaka mu pe bâsia na rangi se vi na roga, ma na marave ikê ki page vunuvunu renia na ve, ma igamu ma na togoha iami ma na tonki ma na marâ vigana ga toregi na toraha, ki page aharêsigamu na ve kamu totono.’”

¹⁸Mo Elisa ki tamasi nikâ, ki vi: “Na tarana ngekê ki mataku ma tanga na Araha. Ma nikâ ngaia ki page katogamu, kamu teharira na Moabita.

¹⁹Igamu kamu page henahuraugi na hinua bâkoro ga nganganihaga ngavê iata. Igamu kamu page tapigi so na apinige hato ni ngauha iata. Igamu kamu page hagamamatarigi na ve banga iata ma kamu page erasigi na mako ni ngêra iata, suria mu tokorenigi na hê hurigi.”

²⁰Ki tangi me igê na matena ni vogasiha i mavoraro, na ve ki râ me tenia na apanena i Etome ma ki anuia na agua ga oga igê.

²¹Matena na ai ni Moaba ka rongo, vi na maneraha gi oru ka bani râ me, hanana viga taharira, ngaira ka hagahakura na ara ni mane hato ga arari ni hearihatana, naka ma ga meraha se na mane haoru, ma ka kasira ka ogasia na pereperegana na apanena iata.

²²Matena ga rite me i mavoraro, na arito ki takiria na ve ma ki katoa na ve ki memera manga na gapu.

²³Ngaira ka gasuga, ka vi: “E, na gapu! Na merongaka na mane ni me iata na maneraha gi oru ka heariha so mareta ma ka nahuiraheri ka me nge! Ge râ ke rurugu igê na tênga iata!”

²⁴Hoi, matena ga tariha vê igê na tênga, na Isiraelita ka taharira ma ka sugarira bê aporo. Na Isiraelita ka ama ni tarigenira nga na ai ni Moaba, ka mutera,

²⁵ma ka ruhuruhugi na hinua iata. I na ara ni matena ga riri igê na mako ni ngêra, na ara ni Isiraelita hato ka kasikasi na hê igê. Vikana na hê ka ahunigi ngavê na ara ni mako ni ngêra. Nikâ ngaira ka hagamamatarigi na vebanga ma ka tapigi so na apinige ni ngauha. Ki rârâ nga noga ma na hinua raha i Kire Gareseti kani hita. Na mane ni hêsigogo ka oga rihia ma ka taharia.

²⁶Matena na maneraha i Moaba ki girara, vi ngaia ki so igê na hearihatana, ngaia ki merarâ na tangarê gi pi na mane henigi na tatapa borahu iata, hanana i uhungia vi taratara râ i guputa na merongana, hanana i gavagava tanga na maneraha i Siria. Ma ki bara tanga.

²⁷Vikê ngaia ki merâ o karena na kare bêbê iana vi urusia ki maneraha, ma ki vogasia na ataro i Moaba renia igê na para ni hinua. Na Isiraelita ka bubununuga, ka suga bê aporo tenia na hinua ma ka aporo i pasita.