Read Kahua 2 MANERAHA 4 Bible Online

2 MANERAHA 4 - Kahua bible

2 MANERAHA 4

¹Na nâna na hitangita na poropete ki râ i pasina o Elisa ma ki vi: “Poropete, o vaniaku ki me. Igo ko bani girara, vi ngaia ki toto suria God. Ma ta na mane, ngaia o vaniaku ki bani hagaba tenia, ngaia ki râ me, hanana vi torererua o kareku gi rua, karu voravora re na kare rakuraku iana baruna na hagaba iana o vaniaku.”

²O Elisa ki hagatea, ki vi: “Na tarana ta kani vigê girara gê tamanigo renia? Visia me, na ta kani gâga mênga i ruma iamu.” Na gete ki arami, ki vi: “Mareha râra ta na marâ, nga noga ma na kere pi na hê ni oile ni olive.”

³O Elisa ki vi tanga, ki vi: “Go arâhira na enoni hagarangigo ma ko toregi nga tenira na baguruni na ara ni pi hato i pasita.

⁴Hemuri igo ma o karemu kamu bêbanu i ruma, kamu purusia na maani ruma ma kamu kahu karangia na oile surigi na pi. Na ani i vunuvunu na pi mu naka râ getea.”

⁵Hoita, na gete ki banu i ruma iana henirerua o karena, ki purusia na maani ruma, ki tavoa na kere pi ni oile ni olive ma ki karangia na oile surigi na pi o karena karu toregi me.

⁶Matena i hagavunusigi hato na ara ni pi, ngaia ki hagate, ki vi: “Tani nikâ?” Na hitangiterua o karena ki arami, ki vi: “Na hagahatungini kani ikê!” Ma na oile ni olive ki kahu pe gogo nikâ.

⁷Ngaia ki aporo tanga o Elisa. Na poropete ki vi tanga, ki vi: “Gu hagavuringenigi na oile ni olive ma ko barubaru re na hagaba hato iamu, ma na haga na ani i page hitahita râ ki page ararigamu igo mo karemu, hanana vigamu mauri re.”

⁸I ta na tangiana o Elisa ki râ i Suneme. Na gete ruruguha kani gâga i ngekana. Na gete ki unia banu ki ngê. Haganega tenia ngekana, na ara ni mateni o Elisa ki arâ i Suneme, ngaia ki ngêngê tare i pasina na gete ngekana.

⁹Na gete ki vi tanga o vaniana, ki vi: “Inê kê girara, vi na mane i arâ me tare ikê, ngaia ki na mane i hagakoro obana God.

¹⁰Ge tagarahia na kere kiboru igê na gerina aberabera na ruma, ka nakagi igê na bea ni mêru, na bea ni ngêra, na agâgâ ma na laiti. Vikana ngaia ki girara i gâga igê i na ara ni matena i vatugigerua me.”

¹¹I ta na tangiana o Elisa ki râ nikâ i Suneme, ma ki akê igê na kiboru iana ki mamaro.

¹²Ngaia ki vi tanga o Gegasi na kariana, ki râ ki unia me na gete. Matena ki râ me na gete akana,

¹³o Elisa ki vi tanga o Gegasi, ki vi: “Go hagatea, vi na ta kani araria, vige vatea meni na tagaraha hato iana renigerua, suria i bâsurigerua. Vari ngaia ki obaniê, vigê arâ i pasina na maneraha, se vi i pasina na mane i bêngenira na mane ni me, hanana vigê nungia ki mahata tanga.” Na gete ki arami, ki vi: “Inê ki tongasiê na ara ni marâ. Manga gê obania ta na marâ, na kariaku mareku vige tamaniê.”

¹⁴O Elisa ki hagatea o Gegasi, ki vi: “Na ta so ma be vatea renia?” O Gegasi ki arami, ki vi: “Bâ, ngaia ki pe apara na kare mane ma o vaniana ki merahaga bâraha.”

¹⁵O Elisa ki bonasia o Gegasi, ki vi: “Vi tanga ke râ me.” Na gete ki râ me ma ki ura i maani ruma.

¹⁶O Elisa ki vi tanga, ki vi: “Igê na harisi hemuri matena manga i ngekê, igo ko page topea na kare mane.” Na gete ki mamana, ki vi: “Aige! Poropete, siana ko hagaparuê. Na poropete iana God kanigo.”

¹⁷Ma bâ, igê na ararina na matena ngekana i na harisi me na gete ki apara na kare mane, manga i bani visia o Elisa.

¹⁸I murini tani na harisi, matena ga mêa na mu, na kere mane ki hura ki râ i mu i pasina o vaemana, i oga henira na enoni, ga rurugi na ngêra i mêa. Na mavoraro ngekana.

¹⁹Na kere mane ki parama ma ki avaravara tanga o vaemana, ki vi: “Na bêku! Na bêku! I hara.” O vaemana ki vi tanga ta na kariana, ki vi: “Torea aporo na kere mane tanga kenana.”

²⁰Na kariana ki torea aporo na kere mane tanga kenana. Kenana ki topea ki meoga mataro me na ritovagana, i me igê o karena.

²¹Ngaia ki metagere tanga na kiboru iana o Elisa, ki hagatâhia i bea, ki râ pania ma ki hura ki purusia na maani ruma.

²²Hemuri ngaia ki unia me o vaniana ma ki vi tanga, ki vi: “Vi tanga ta na kariamu, ke râ me ikê henia na tonki. Be râ nga i pasina na poropete o Elisa. Inê kê aporo me ototo râ, manga vi pe hagabarasiê ta na marâ.

²³O vaniana ki hagatea, ki vi: “Tanu hega kanigo obania vigo arâ nga i ngekê? I ngekê ki mareha vi na tangiana ni mamaroha, se vi na tangiana raha na hageha haoru!” Na gete ki arami, ki vi: “Mako!”

²⁴Na kariana ki hagarêa na tonki tanga. Ngaia ki bonasia na kariana, ki vi: “Go hagasua na tonki ki arâ rêrê, ma siana ki arâ haritagi mataro me kê vivi tangago.”

²⁵Vikê ngaia ki tavoraha ma ki râ i hungana i Karamele i pasina o Elisa. O Elisa ki bâsia râ i arâ me hagatê ma ki vi tanga o Gegasi na kariana, ki vi: “Bâ, na gete i Suneme kani arâ me ikana.

²⁶Tango vurusia ma ko tarahua tenia, vi na ara ni marâ ka koro ma tangara ngaia, o vaniana ma o karena.” Na gete ki hagarongoa o Gegasi, vi na ara ni marâ i koro ma.

²⁷Matena i ata me i pasina o Elisa, ngaia ki tubê so tanga, ma ki têgi râ na êgana. O Gegasi ki haga ni purisia râ, ma o Elisa ki vi: “Naka so! Go pe bâsia kani i rugu bâraha na aitangihana ma na Araha ki pe hagarongoê rârâ renia!”

²⁸Na gete ki vi tanga o Elisa, ki vi: “Poropete, i hega inê kanigê nungigo renia na kare mane? I hega, inê kê pe bani vi tangago, vi siana ko hagaparuê?”

²⁹O Elisa ki vi tanga o Gegasi, ki vi: “Garigari! Torea na vatuku ku râ! Siana ko rêra, matena go tarahua i tara ta na enoni. Ma ki manga na enoni ma ka megotamasi, siana. Go ototo râ nga i ruma ma ko tagarenia râ na vatuku i avorana na kere mane.”

³⁰Na gete ki vi tanga o Elisa, ki vi: “Inê kê tohe renia na Araha mamauri ma renigo igo, gê toto surigamurua tare, vi manga inê geteê ki asa be aporo! Vikê o Elisa ki aharaga ma ki râ henia.

³¹O Gegasi ki nanago ma ki tagarenia râ na vato iana o Elisa i avorana na kare, ma na kare ki ama ni manamanapuaga ngavê nga ma ki pe mêri aporo rârâ. Vikê ngaia ki aporo vurusia o Elisa, ma ki vi: “Na kere mane ki pe rite aporo.”

³²Matena i ata me o Elisa, ngaia ki banu getea igê na kiboru ma ki bâsia na kere mane i bani me, ki tâtâ i bea.

³³Ngaia ki purusia na maani ruma ma ki avarasia na Araha.

³⁴Hemuri ngaia ki tâ kê ototo i apena na kere mane. Na harana, na maana ma na rimana i harana, i maana ma i rimana na kere mane. Matena i tâ kê ototo i apena na kere mane, na apena na kere mane ki haganega ki mahana aporo.

³⁵O Elisa ki aharaga, ki rârâ igê na kiboru, ma ki kahu aporo nikâ ki tâ kê i apena na kere mane. Na kere mane ki ramesi hagepi ma ki kahu ehasi na maana.

³⁶O Elisa ki unia me o Gegasi ma ki vi tanga, vi unia me kenana na kere mane. Matena i banu me na gete, o Elisa ki vi tanga, ki vi: “O karemu ikê. Torea!”

³⁷Na gete ki susure ki tubê so i ano i maana o Elisa. Hemuri ki ragea o karena ma ki mehura.

³⁸Matena na magêha raha ki ramo suria na apanena hagenani, o Elisa ki oga nikâ i Gilegale. Matena i hagesurira na poropete i ngekana, ngaia ki vi tanga na kariana, ki hagâgasia na kuki raha igê na gi ma ki hagamako na ngêra tangara.

³⁹Na hitangita na poropete ngegana ki râ i mu, hanana vi totora na marâ i toraria henia na ngauha. Ngaia ki tarahua na varo i bemu ma ki husigi na guani mataro me ki vunu ngavê na tuguni iana. Ngaia ki migiaporo ma ki ninigi akê igê na ngêra i rarona na kuki. Ma ngaia ki pe girara vi na ta ngekana.

⁴⁰Na ngêra ka ape tangara na mane ka ngê. Matena ga namigi amaki, ngaira ka gasuga, ka vi tanga o Elisa, ka vi: “E, ga mesia!” Ngaira ka usi vige ngê.

⁴¹O Elisa ki vi: “Me tani na ngangani na koni.” Ngaia ki kasigi akê igê na kuki ma ki vi: “Ape nikâ tani na ngêra tangara na mane.” Ma na ngêra ki kahu koro.

⁴²Ta na tangiana nikâ ta na mane ki râ me tenia i Bala Salisa. Ngaia ki migirâ me tanga o Elisa na guani na bereti na koni tangahuru gi rua, na nagoni na mu igê na harisi ngekana, ma tani na guani haoru na koni. O Elisa ki vi tanga na kariana, vi hagangêra na poropete ngegana renigi.

⁴³Na kariana ki arami, ki vi: “Go takusia vari, vi ngaigi ki ararira na mane tangarê gi tage?” O Elisa ki arami, ki vi: “Vatera ke ngê, suria na Araha ki vi, vi ngaira ka page ngêngê masu ma ka page hagahitagi.”

⁴⁴Vikê na kariana ki hagangêra. Ngaira ka ngê ma ka hagahitagi, manga i bania visia na Araha.