Read Kahua 2 MANERAHA 5 Bible Online

2 MANERAHA 5 - Kahua bible

2 MANERAHA 5

¹O Namane ki na mane i bêngenira na mane ni me i Siria. Na enoni ka hagahigasia ma na maneraha i Siria ki hanetasia nogana nikâ, suria renia o Namane na Araha ki katora na mane ni me i Siria ka teha igê na hearihatana. O Namane ka na mane ni me ramo. Ma ngaia ki asiahu.

²Na matena ga rurugu nikâ tenira na Isiraelita, na me ni Siria ka henahuraua na kere gete na Isiraelita. Ngaia ki vora re na hitangita na kare rakuraku iana kaniana o Namane.

³Ta na tangiana na kere gete ki vi tanga ka avanuna, ki vi: “Manga vi na avanuku ma ke râ i pasina na poropete i oga i Samaria, vikê ke koro. Ngaia ki girara i hagamavoa.”

⁴Matena o Namane ki rongo vikana, ngaia ki râ i pasina na maneraha ma ki hagarongoa renia na tamasinga iana na kere gete.

⁵Na maneraha ki vi: “Gu râ i pasina na maneraha i Isiraele ma ku torea na leta ikê tanga.” Hoi, o Namane ki tavoraha ki râ. Ngaia ki migirâ na 30,000 na maani na siliva, na 6,000 na maani na golo, ma na tangahuru gi tage na tuguni bâkoro.

⁶Na leta i torea ki vi vikê: “Renia na leta ikê inê kê hagagirarago igo renia o Namane, na mane i bêngenira na mane ni me iaku. Inê kê obanigo, vigo hagamavoa.”

⁷Matena na maneraha i Isiraele ki tomania na leta, ngaia ki tarisigi na tuguni iana marena, suria i bagatatako renia. Ngaia ki vi: “Tanu hega na maneraha i Siria kani takusia vi inê kanigê hagamavoa na mane ikê? Ngaia ki takusia vari, vi God kani inê ma kê nahunia na ramoha tangarerua na mêriha ma na mera? Ngaia ki rapasia vi meêheariha. Kahu tahetara!”

⁸Matena na poropete o Elisa ki rongo vikana, ngaia ki kasi tamasinga tanga na maneraha, ki vi: “Tanu hega go hataera? Tanu hega ko tarisia na tuguni iamu? Gu kasia me tangê inê, ma inê kê page hagagirara, vi na poropete kani i Isiraele.”

⁹Vikê o Namane ki râ henira na hosi ga okea igê na kati iana. Ngaia ki ura so i maana na maani ruma na ruma iana o Elisa.

¹⁰O Elisa ki hagatorangenia hura ta na mane tora tamasinga, ki vi: “Gu râ ma ku mamanu hagepi i ve i Jotano hanana go page mavomavo ngavê.”

¹¹Ma o Namane ki mangariaga ma ki râ, ki vi: “Inê kê takusia ma, vi ngaia ki huhura me tangê, ki avarasia na Araha God iana, hananan i hataria na asiahu ma ki hagamavoê!

¹²Tanga na ve i Jotano, ki hega, ngaia ki koro teharirerua vari i Abana ma Parepare, na ve i Tamasiko? I arari ma vi ve manu igê, hanana ve mavo!”

¹³Na kariana ka râ i pasina ma ka vi: “Bâ, manga na poropete ma ki hagatorago renia ta na marâ i raha, go katoa nga. Tanu hega kanigo pe manu manga i vi tangago, hanana gu mavo?”

¹⁴Vikê o Namane ki so i ve, ki su hagepi manga i bani visia o Elisa tanga, ma ngaia ki kahu mavo ngavê. Na apena ki masike ma ki apekoro manga na apena na kare.

¹⁵Ngaia ki aporo henira na me iana i pasina o Elisa ma ki vi: “I ngekê inê kê kahu tahetara, vi ngaia getea ma God iata na Isiraelita ka na God monari. Hoi poropete, gu aganaria na mahatanga iaku.”

¹⁶O Elisa ki arami, ki vi: “Inê kê tohe renia na Araha mamauri, gê toto suria, vi inê ki asa be aganaria na mahatanga.” O Namane ki pengenia, vi o Elisa ke aganaria, ma o Elisa ki usi.

¹⁷Tahema o Namane ki vi: “Manga go pe aganaria na mahatanga iaku, hoi, gu nakê be rutangirerua na tonki gi rua renia na mako ma kê totora tanga i pasiku, suria haganega tenia i ngekê inê be vogasia ma be susu tanga ma na Araha, mareha vi na ataro.

¹⁸Na Araha ke bonoteniê gê tasi, suria gê râ henia na maneraha igê na ngêsu iana o Rimone na ataro i Siria ma kamuru vogasia. Inê kê tako togo, vi na Araha ki bonotenia na tarana ngekana, suria i mareha vi inê mareku kani ve katoa.”

¹⁹O Elisa ki vi: “Siana ko tako bâraha. I koro ma.” Ma o Namane ki râ. Matena o Namane ki râ ki arege râ,

²⁰o Gegasi na kariana o Elisa ki tako, ki vi: “O Elisa ki naka mavê o Namane ki râ ma ki pe aganaria rârâ na mahatanga tenia. I pe koro! I tuguhia vi aganaria hete na mahatanga, na mane ni Siria i obania vi vatea renia. Inê kê tohe renia na Araha mamauri, vi inê kê mumuria, hanana gê tavoa ta na marâ tenia.”

²¹Hoi, ngaia ki mumuria o Namane. Matena o Namane ki bâsia na mane i tango me i murina, ngaia ki vato tenia na kati iana, ki râ, ki hagatea, ki vi: “E, na tarana ta kani pe koro?”

²²O Gegasi ki arami, ki vi: “Mareha. O Elisa na poropete ki hagatorangeniê, kê hagarongogo, vi na vererua tenia na haku na poropete ga oga igê na hungani i Eparaimi, karu kahu ata me. Ngaia ki obania vigo vatererua na 3,000 na maani na siliva ma na tuguni bâkoro gi rua.”

²³O Namane ki arami, ki vi: “Gu nakê be vatego na 6,000 na maani na siliva.” Ngaia ki migitogeaga ma ki arivusugi na siliva igê na anga gi rua. Ngaia ki hagatorangenirerua na kariana gi rua, karu toregi na maani na siliva ma na tuguni bâkoro gi rua ma karu nanago tarana o Gegasi.

²⁴Matena ngairerua karu ata vê igê na hungana i pasina o Elisa, o Gegasi ki tavorerua na anga gi rua tenirerua ma ki migibanu i ruma. Hemuri ngaia ki hagatorangenirerua aporo na kariana o Namane.

²⁵Ngaia ki aporo banu i ruma ma o Elisa ki hagatea, ki vi: “I he kanigo râ igê?” O Gegasi ki arami, ki vi: “O, inê kê pe râ i tagua.”

²⁶Ma o Elisa ki vi: “I hega, inê kê pe oga vari i ngekana, matena i vato o Namane tenia na kati iana ki râ vê tangago? I ngekê ki mareha vi na matena tanga vige taugi igê na haga, hanana vige vurivuri re na gahu, na pariki ni olive ma na mu ni vaini, na sipi ma na puruka se na kare vurivuri!

²⁷Tahema na maeha i tarahua o Namane ke page tarêhigamu igo ma na raraha iamu tare ki bê ki arâ. Matena o Gegasi ki râ, ma na maeha ki bani tarahua. Na apena ki orerega ki siki ngavê.