Read Kahua 2 MANERAHA 6 Bible Online

2 MANERAHA 6 - Kahua bible

2 MANERAHA 6

¹I ta na tangiana na poropete, o Elisa i bâsurira, ngaira ka hagagege tanga, ka vi: “Bâ, na ruma mi oga igê ki sisite bâraha!

²Gu nakagami kami râ i Jotano, kami tapigi na apinige, hanana mi tagarahia na ruma haoru renigi.” O Elisa ki arami, ki vi: “I koro ma!”

³Ta na hitangita ki nungia bâraha, vi arâ henira. Ngaia ki agana.

⁴Ngaira ka tavoraha tagenata. Matena ga ata râ i Jotano, ngaira ka haganega ka tagara.

⁵Ta na hitangita ki tapia na apinige. Ki parama na bêna na akesi ma ki vota so i ve. Ngaia ki ngiria o Elisa, ki vi: “Poropete gê katoa marata? Ngaia ki na akesi gê torea noga tenia ta na mane ngekana!”

⁶O Elisa ki hagate, ki vi: “I vota i he?” Na mane ki hagabâsia renia na agua i vota igê. O Elisa ki retea na apinige, ki kasia so i ve ma ki katoa na bêna na akesi ki tare.

⁷Ngaia ki bonasia na mane ki vi: “Gu tavoa akê.” Ma na mane ki maroro so ki tavoa akê.

⁸Na maneraha i Siria ki meraheariha na Isiraelita. Ngaia ki hagatera na mane ga bêngenira na mane ni me iana, vi i he kaniga taunga igê, ma ngaia ki atea na agua.

⁹Ma o Elisa ki kasi tamasinga tanga na maneraha i Isiraele ma ki haganunua, vi siana ki arâ hagarangia na agua ngekana, suria na me ni Siria ka ahihekarigi i ngekana.

¹⁰Vikê na maneraha i Isiraele ki haganunura na me iana ga oga i ngekana, hanana ga hagatogo surira mareta. Na tarana ngekana ki akê me haritamani.

¹¹Na maneraha i Siria ki obaera ngavê. Ngaia ki unira me na mane ga bêngenira na mane ni me iana, ma ki hagatera, ki vi: “Ti kana hitangimi i pane henia na maneraha i Isiraele?”

¹²Ta na hitangita ki arami, ki vi: “Maneraha, i mareha rârâ tani. Ngaia nga na poropete o Elisa kani hagarongoa na maneraha i Isiraele renigi na tamasinga iamu igê na kiboru go mauru igê.”

¹³Na maneraha ki haribona, ki vi: “Mu garia i he kani gâga igê hanana ve hagatotongoa.” Matena na maneraha ki rongo vi o Elisa ki gâga i hinua i Totane,

¹⁴ngaia ki hagatorangenira râ i ngekana rako na mane ni me henira na hosi ma na kati ni me. Ngaira ka ata râ i hinua ngekana igê na bungiana ma ka ogarihia.

¹⁵Igê na mahogotana i tangi me, na kariana o Elisa ki rite. Ngaia ki hura i metara ma ki bâsira na mane ni me ni Siria henigi na hosi iata ma na kati ni me iata, ga oga rihia na hinua. Ngaia ki aporo banu i ruma ma ki tamasi raha tanga o Elisa, ki vi: “Poropete, i hato iaka! Na ta ke katoa?”

¹⁶O Elisa ki arami, ki vi: “Siana ko magu! Igê na apanena iaka igia ka teharira ngaira.”

¹⁷Vikê o Elisa ki avarasia na Araha, ki vi: “Araha, gu mavesia na aitangihana, hanana ge bâbâ bâkoro!” Na Araha ki aganaria na avarasiha iana, ma na kariana o Elisa ki bâ ahaha râ, ma ki bâsira râ na hosi ma na kati ni gi, ga manasia na tarihana na hungana rihia o Elisa.

¹⁸Matena na me ni Siria ka taharia na hinua, o Elisa ki nunginungi, ki vi: “Araha, gu katora na me ngegana ke guru na maata!” Na Araha ki aganaria ma ki katora ki guru na maata.

¹⁹Hemuri o Elisa ki râ i pasita ma ki vi tangara, ki vi: “Igamu kamu hagatasia na tara. Mareha vi na hinua mu tabea kani ikê. Mu takuê ma be hagarigigamu renia na mane mu garia.” Ma ngaia ki bêngenira tanga i Samaria.

²⁰Matena ga banu hato i hinua, o Elisa ki nunginungi nikâ, ki vi: “Araha, gu hagamaravagi aporo na maata.” Na Araha ki aganaria na nunginungi iana, ma ki hagamaravagi na maata, ma ngaira ka bâsia, vi ngaira ka oga i rarona na hinua i Samaria.

²¹Matena na maneraha i Isiraele ki bâsira na me ni Siria, ngaia ki hagatea o Elisa, ki vi: “Poropete, i hega, gê mutera? Gê mutera iê?”

²²O Elisa ki arami, ki vi: “Mareha! Manga na me go henahuraura, ki hega go mutera? Gu vatera ke ngê ma ke tono ma ku nakara vê ka aporo i pasina na maneraha iata.”

²³Hoi, na maneraha i Isiraele ki magoto tangara. Matena ga ngê ma ka tono hato, ngaia ki nakara vê ka aporo i pasina na maneraha i Siria. Haganega me tenia na matena ngekana na me ni Siria ki kahu hato vige rurugu nikâ igê na apanena iata na Isiraelita.

²⁴I ta na matena i muri o Benehatata na maneraha i Siria ki bêngenira na mane ni me hato iana ka meraheariha na Isiraelita. Ngaira ka ogarihia na hinua i Samaria.

²⁵Suria i oga arihu na tarana ngekana, na ngêra i hinua ki abubu ngavê. Na mena na bêna na tonki ki na 80 na maani na siliva ma na apapana gi tage na kilo na aeta na kuvê ki na maani gi rima na siliva.

²⁶Matena na maneraha i Isiraele ki arârâ igê na para ni hinua, ta na gete ki ngiria, ki vi: “Maneraha, tamaniê!”

²⁷Na maneraha ki arami, ki vi: “Manga na Araha ma ki pe tamanigo, manga i he kani vigê girara gê tamanigo inê? I hega, inê kê nahunigi na koni se na vaini?

²⁸Na ta ko tako bâraha renia? Visia me!” Na gete ki arami, ki vi: “I ta na tangiana ki hato, kani ikê ki vi, vi igamirua kamuru ngaua o kareku, ma igê na ruata na tangiana kamuru ngaua nogana o karena ngaia.

²⁹Hoi, igamirua kamuru hagamakoa o kareku ma kamuru ngêa. Na ruata na tangiana inê kê vi tanga, vi igamirua kamuru ngaua nogana o karena, ma ngaia ki pinihia!”

³⁰Matena na maneraha ki rongo vikana, ngaia ki tarisia na tuguni iana na ani i metara, suria i hataera ngavê. Ma na enoni ga oga hagarangia na para ka bâsia na ani i banu i nago na gahu iana ki kakaga.

³¹Na maneraha ki tamasi raha, ki vi: “God ke hagamagahuruê manga viga pe retea râ na bêna o Elisa ma ki kahu bungibungi.”

³²Ngaia ki hagatorangenia ta na mane tora tamasinga ki râ ki merâ me o Elisa. I na matena ngekana o Elisa ki oga i ruma iana. Tani na meraha ni hinua ka oga i pasina. I nago tarana i ata me na mane tora tamasinga iana na maneraha, o Elisa ki vi tangara na meraha, ki vi: “Na manero ngekana ki hagatorangenia ta na mane, hanana vi nahuiê kê meme. Hoi, matena i atata me ikê, mu purusia na maani ruma, ma kamu rêra pusia hura. Inê kê girara, vi na maneraha ngaia marena ki page mumuria ototo me.”

³³Pusiana ma i tamasi hato râ vikana, ma na maneraha ki ata me, ki vi: “Na Araha kani katoa na eraha ngekê ki tarahugia. Na ta nikâ kê naasia tenia na Araha hanana vi katoa?”