Read Kahua 2 MANERAHA 7 Bible Online

2 MANERAHA 7 - Kahua bible

2 MANERAHA 7

¹O Elisa ki arami, ki vi: “Gu karinga na tamasinga iana na Araha! I gomaha na matena manga i ngekê igo ko girara, go vurivuri ikê i Samaria na kilo tangahuru gi tage na ani koro na koni se na kilo tangahuru gi rua na raisi renia na maana gi tage na siliva.”

²Na mane ni anumasiha iana na maneraha ki vi tanga o Elisa, ki vi: “I bara ngavê! Henaka ngaia marena na Araha ma ke hagatorangenigi vato ototo râ na koni manga na bagarangi raha, i bara ngavê vigu vuri vikana.” O Elisa ki arami, ki vi: “Hoi, go bâbâ ma, ma tangago igo, igo ki asa vigu ngêgi.”

³Na verehe na mane asiahu ka oga i na apanena hura na maani para ni hinua i Samaria. Ngaira ka hetamatamasi, ka vi: “E, a gâga rârâ ikê ka meme!

⁴Ga bêbanu tanga i hinua tanga na ta? I era ma ka mesi magêha igê! Ma ki manga igia ma ka gâga ikê, igia ka page meme nikâ. Vikê, nika ge râ tanga na tênga iata na ai ni Siria. Manga vi ngaira ma ka nahuigia ka meme, ma ki viga hega! Vari ngaira ki asa vige nahuigia.”

⁵Hoi, matena i bungi me, ngaira ka râ tanga na tênga iata na ai ni Siria. Matena ga ata vê, ngaira ka pe bâsia rârâ ta na me i ngekana.

⁶Na Araha ki katora na ai ni Siria ka rongoa na marâ i rongo manga na tavo uga iata rako era na mane ni me henira na hosi ma na kati ni me. Na ai ni Siria ka takusia ma, vi na maneraha i Isiraele ki vatevatera na maneraha iata na Hitita ma na maneraha ni Esipito henira na mane ni me iata, hanana viga taharira.

⁷Tahema igê na manurahitana ngekana na ai ni Siria ka gava tange na manavata. Ngaira ka panigi na ruma na gahu iata, ma na hosi ma na tonki iata. Ngaira ka pania so na tênga ki oga manga bani hanana.

⁸Matena na verehe ka ata râ igê na ruma na gahu na ani matakere me, ngaira ka banu igê tani, ka ngê ma ka tono na marâ igê, ka tavogi na siliva, na golo ma na gahu, ga tarahugi igê ma ka tora vê ka pinihigi. Hemuri ka aporo râ, ka banu nikâ igê tani na ruma na gahu ma ka kato vikana nikâ.

⁹Ma ngaira ka hetamatamasi, ka vi: “E, igia ka katoa na tarana i pe oto! Igia ka nahunia na rongoha koro. I era ma ka munia so tangagia mareka. Manga igia ma ka pe visia rêrê mataro me i gomaha, ngaira ka page hagaitangigia nge. Nika, ge râ nga ma ke hagarongo i ruma iana na maneraha!”

¹⁰Hoi ngaira ka râ pania na tênga iata na me ni Siria ma ka aporo i Samaria. Ngaira ka ngere râ tangara na me ga anumasigi na manipara ni hinua, ka vi: “Igami kami râ igê na tênga iata na me ni Siria, ma igami kami pe bâsia rârâ, se vigami rongoa rârâ ta na me. Na hosi ma na tonki ka rêra mêngara igê na varo. Na ruma na gahu ga panigi so na ai ni Siria ka oga manga bani hanana.”

¹¹Na mane ni anumasiha ka hagatarêngenia na rongoha ki rârâ ma ki tariha i ruma iana na maneraha.

¹²I bungibungi mênga ma na maneraha ki rite ma ki vi tangara na mane ni hagaotonga iana, ki vi: “Be vi tangagamu, na ai ni Siria ka kato viga hagabekasigia. Ngaira ka bani girara na magêha ikê. Tahema ngaira ka râ tenia na tênga iata ma ka ahi i bemu. Ngaira ka takusia, vi igia ka huhura tenia na hinua, hanana viga garigari ngauha, ma ngaira ka page henahuraugia henia na hinua.”

¹³Na hitangita na mane ni hagaotonga ki vi: “Na enoni i hinua ikê ki asa vige page tahi mangara na ani ga bani me. Tahema naka ke hagatorangenira tani na me henira na hosi gi rima tenira na ani ga hita so, hanana ge tarahua vi manga i he!”

¹⁴Ngaira ka atera tani na mane ma na maneraha ki hagatorangenira igê na kati ni me gi rua, ma ki bonasira, hanana viga arâ ka tarahua, vi na me ni Siria ka manga i he.

¹⁵Na mane ka rârâ ma ka tariha i Jotano. Ngaira ka bâsigi gogogo i tara na gahu ma na tangaruha, na me ni Siria ga kasigi râ, matena ga gava tange na manavata. Hemuri ngaira ka aporo ma ka hagarongoa na maneraha.

¹⁶Na ai ni Samaria ka heasiasi hura, ka rurugua na tênga iata na me ni Siria. Ngaira ka hagavuringenigi na kilo tangahuru gi tage na koni koro se na kilo tangahuru gi rua na raisi renia na maana gi tage na siliva, manga i bani visia na Araha.

¹⁷Na maneraha ki bani naka na mane ni anumasiha iana ki anumasia na maani para ni hinua. Na mane ni anumasiha ngekana ki me i ngekana, suria na enoni ka hetangutanguhi huria, ka puria, manga i bani visia o Elisa, matena na maneraha ki râ i pasina.

¹⁸I na matena ngekana o Elisa ki bani vi tanga na maneraha, ki vi: “I gomaha na matena manga i ngekê, ngaira ka page vurivuri ikê i Samaria na kilo tangahuru gi tage na koni koro se na kilo tangahuru gi rua na raisi renia maana gi tage na siliva.”

¹⁹Ma na mane ni anumasiha ki bani arami, ki vi: “I bara ngavê. Henaka vi ngaia marena na Araha ma ke hagatorangenigi vato ototo râ na koni!” Ma o Elisa ki bani aramia, ki vi: “Hoi, go bâbâ ma, ma tangago igo, igo ki asa vigu ngêgi.”

²⁰Ma ki manga ngekana tanga. Ngaia ki me, suria na enoni ka puria ki me, matena ga hetangohi hura igê na maani para ni hinua.