Read Kahua 2 MANERAHA 8 Bible Online

2 MANERAHA 8 - Kahua bible

2 MANERAHA 8

¹Hoi, o Elisa ki bani hagamêria aporo o karena na gete i oga i Suneme. I na matena ngekana o Elisa ki bani vi tanga na gete, ki vi: “Gu merâ na ahemata iamu pania ikê ma ko arâ i tagua, suria na Araha ki page naka na magêha, ki tarahua na agua ikê. Na magêha ngekê ki page gâga surigi na harisi gi pi.”

²Na gete ki kato vikana ma ki merâ na ahemata iana, ka oga i Pilisitia surigi na harisi gi pi.

³I murina na harisi gi pi na gete ki aporo i Isiraele ma ki râ i pasina na maneraha ma ki nungia, hanana vi taugi aporo na ruma ma na mako iana.

⁴Matena i râ vê, na maneraha i metamasi o Gegasi na kariana o Elisa, suria na maneraha ki obania vi giraragi na mena i katogi o Elisa.

⁵Matena o Gegasi ki hagarongoa na maneraha manga hanana o Elisa ki hagamauria aporo na enoni i me, na gete ki nungia na maneraha. O Gegasi ki vi tanga na maneraha, ki vi: “Maneraha, na gete akini ma o karena kani ikê o Elisa ki hagamauria aporo.”

⁶Na maneraha ki hagatea na gete, vi i monari se i mareha. Na gete ki vi: “I monari!” Vikê na maneraha ki unia me ta na mane ni hagaotonga ma ki vi tanga, ki vi: “Go girara nga, hanana vi na gete ki taugi aporo na ara ni nahuninga iana henigi na meni na ngêra i mu iana, surigi na harisi gi pi i râ ki oga vê surigi.

⁷O Elisa ki râ i Tamasiko, matena o Benehatata na maneraha i Siria ki maeha. Matena na maneraha ki rongo, vi o Elisa ki râ me i ngekana,

⁸ngaia ki vi tanga o Hasaele na hitangita na mane ni hagaotonga iana, ki vi: “Gu merâ na mahatanga tanga na poropete ma ko nungia, ki hagatea na Araha, hanana i tarahua, vi inê kê page komaga se mareha.”

⁹Vikê o Hasaele ki hagarutangira na kamelo tangahuru ge he renigi na ani mavê na marâ koro i Tamasiko, ma ki râ i pasina o Elisa. Matena o Hasaele ki mehetarahu, ngaia ki vi: “Na maneraha o Benehatata na kariamu ki hagatorangeniê me, hanana gê hagatego, manga vi ngaia ma ki page komaga se i mareha.”

¹⁰O Elisa ki arami, ki vi: “Na Araha ki bani hagagirarê, vi na maneraha ki page meme. Ma ko arâ ko hagarongoa, vi ngaia ki page komaga aporo.”

¹¹Na maana o Elisa ki hagamamagutaga ma ki boretenia o Hasaele. Ma o Hasaele ki hataera. O Elisa ki parama ma ki pangia na ringena ki angi.

¹²O Hasaele ki hagatea, ki vi: “Poropete, tanu hega go angi?” O Elisa ki arami, ki vi: “Suria inê kê girara, vi igo ko page hagamamasiagara ngavê na ai ni Isiraele. Igo ko page hagamakakagi na hinua nganganihaga iata. Igo ko page mutera na mane na gapu haoru iata ma ko page rahutenira ka meme na kareta ma ko page tatahura na gete ga obara.”

¹³O Hasaele ki hagatea, ki vi: “Manga i he kani vigê girara vigê katokato vikana? Na enoni purua ma kani inê!” O Elisa ki arami, ki vi: “Na Araha ki bani hagagirarê, vi igo ko page maneraha i Siria.”

¹⁴O Hasaele ki aporo ma o Benehatata ki hagatea, ki vi: “Na ta kani visia vê o Elisa?” O Hasaele ki arami, ki vi: “Ngaia ki hagarongoê, vi igo ko page komaga aporo.”

¹⁵Ki tangi me ma o Hasaele ki torea na aruha, ki anumia igê na ve ma ki tê pusirerua na harana ma na barisuna na maneraha ki me. O Hasaele ki maneraha i Siria urusia o Benehatata.

¹⁶Matena o Jorama karena o Agaba ki maneraha i Isiraele surigi noga na harisi gi rima, o Jehorama o karena o Josapata ki vora re na maneraha i Juta,

¹⁷matena i tonga na harisi tangahuru gi oru matare rua iana. Ngaia ki oga i Jerusaleme ma ki marungia i Juta surigi na harisi ge varu.

¹⁸Kaniana kani ka karena o Agaba. O Jehorama ki râ surigi na bagatauhata na maneraha i Isiraele tagenana manga na ahemata iana o Agaba. Ngaia ki murisigea na Araha.

¹⁹Ma na Araha ki pe obania vige mutera na ai ni Juta, suria ngaia ki bani surua tanga o Tavite na kariana, vi na raraha iana ka heheuri tare ka maneraha.

²⁰Matena o Jehorama ki maneraha, i Etome ki ura getea tenia i Juta ma ki atea na maneraha iana marena.

²¹Vikê o Jehorama henira na mane ni me hato iana igê na kati ni me ka râ tanga i Saire. I ngekana na mane ni me ni Etome ka ogarihira. Igê na bungiana o Jehorama ma na mane ga bêngenira na mane ni me igê na kati ni me ka toratorangira na Etomita ma ka gava ma na me ni Etome ka tango tangagi i pasita.

²²Henaka, ma i Etome ki ura marena tenia i Juta haganega me tenia na matena ngekana mataro i ngekê. Igê nga na matena ngekana na hinua i Libina ki ura nogana.

²³Na ara ni tauhana hato getigi o Jehorama ka bani segegi so igê na buka ni sihonga renira na maneraha i Juta.

²⁴O Jehorama ki me ma ka bagia i Hinua iana o Tavite igê na matahuta na maneraha, ma o Agasia o karena ki urusia ki maneraha.

²⁵Matena o Jorama karena o Agaba ki maneraha i Isiraele surigi noga na harisi tangahuru matarerua, o Agasia karena o Jehorama ki vora re na maneraha i Juta.

²⁶Ngaia ki tonga na harisi tangahuru gi rua matarerua iana ma ki oga i Jerusaleme ma ki marungia i Juta suria na harisi gi tage. Kenana kani ka Atalia ka karena o Agaba na maneraha ma kesina o Omiri na maneraha i Isiraele.

²⁷Suria o Agasia ki na ahariana na maneraha o Agaba, ngaia ki murisigea na Araha tagenana manga na ahemata iana o Agaba.

²⁸Na maneraha o Agasia ki tamania o Jorama na maneraha i Isiraele igê na hearihatana henia o Hasaele na maneraha i Siria. Na mane ni me iaterua ka meraheariha i Ramote i Gileata. O Jorama ki mamari igê na hearihatana.

²⁹Ngaia ki aporo i hinua i Jeserele tanga i mavomavo noga na mamariha iana. Ma o Agasia ki râ ki vatugia i ngekana.