Read Kahua 2 MANERAHA 9 Bible Online

2 MANERAHA 9 - Kahua bible

2 MANERAHA 9

¹Hoita, o Elisa na poropete ki unia me na hitangita na haku na poropete ma ki vi tanga, ki vi: “Gu nanê hanana go arâ i Ramote i Gileata. Go torea henigo na pi ni oile ikê.

²Matena go atata vê i ngekana, go bâbâ renia o Jehu o karena o Josapata ma o vesina o Nimisi. Go mebanu igê ta na kiboru tenira na tamana.

³Go karangia na oile ikê i bêna ma ko vivi: “Na Araha ki vi, ‘Inê kê monego ko maneraha i Isiraele.’ Hemuri ko hatani pania rêrê nga i ngekana.”

⁴Vikê na poropete na gapu haoru ngekê ki râ tanga i Ramote.

⁵I ngekana ngaia ki tarahura igê, vi na mane ga bêngenira na mane ni me ka oga igê na hekarigiana. Ngaia ki vi: “Inê kê merâ me na rongoha tangago.” O Jehu ki hagatea, ki vi: “Ti na hitangimami kanigo obania vigo metamasi?” Ngaia ki arami, ki vi: “Kani igo!”

⁶Vikê ngairerua karu banu i ruma ma na poropete na gapu haoru ngekê ki karangia na oile ni olive i bêna o Jehu, ma ki vi tanga, ki vi: “Na Araha God iata na Isiraelita ki vi, ‘Inê kê monego ko maneraha iata na Isiraelita na kariaku.

⁷Go nahuia nga ki meme na maneraha iamu na eragani nuni o karena o Agaba, hanana inê be hagaitangia ka Isebele, suria i mutera na poropete iaku ma na kariaku getera.

⁸Na ahemata hagenani ma na raraha hato iana o Agaba ki tuguhira viga meme. Inê be hagamagahurura na ara ni mane hato igê na ahemata iana, naka ma na kare se na gemêa.

⁹Inê kê page katora na ahemata iana manga gê bani katora na ahemata iana o Jerobeama na maneraha i Isiraele ma iana o Basa na maneraha i Isiraele.

¹⁰Ka Isebele ki asa vige bagia. Na o kaniga page ngaua na gahuana i na apanena i Jeserele.’” Matena i tamasi hato vikana, na poropete na gapu haoru ki hura pania na ruma ma ki gava.

¹¹O Jehu ki aporo tangara na tamana na mane ga bêngenira na mane ni me. Ngaira ka hagatea, ka vi: “I hega, na ara ni marâ ki koro ma? Na ta kani obania tenigo na beka ngekana?” O Jehu ki arami, ki vi: “Mu bani girara na tauhana!”

¹²Ngaira ka arami, ka vi: “Mareha! Siana ko pinihia. Gu visia nga!” O Jehu ki vi: “Ngaia ki hagarongoê, vi na Araha ki vi, ‘Inê kê monego ko maneraha i Isiraele.’”

¹³Na tamana o Jehu ka tasigi ototo râ na aruhata ma ka vatarangenigi huria na tara tagere tanga na ruma. Ngaira ka uhigi na ahuri ma ka ngerengere, ka vivi: “O Jehu ki maneraha!”

¹⁴Hoi, o Jehu o karena o Josapata ma o vesina o Nimisi ki harikato renia na maneraha o Jorama. O Jorama henira na Isiraelita hato ka bani ura barasia i Ramote i Gileata pusia o Hasaele na maneraha i Siria. O Jorama ki oga i Jeserele tanga i mavomavo noga na mamariha iana, i mamari igê na hearihatana. Tahema o Jehu ki vi tangara na tamana na mane ga bêngenira na mane ni me, ki vi: “Manga mu panepane heniê, mu girara siana ta na enoni ki gavagava hura tenia i Ramote, hanana vi hagarongora na ai i Jeserele renia na tarana i akê me ikê.”

¹⁶Hemuri ngaia ki tage igê na kati ni me iana ma ki râ tanga i Jeserele. O Jorama ki mamênga vige mavomavo. O Agasia na maneraha i Juta ki oga henia, suria i vatugia ki bâsia.

¹⁷Na mane ni anumasiha igê na bebetehe i Jeserele ki bâsira râ o Jehu ma na me iana, ga arâ me. Ngaia ki ngere, ki vi: “Inê kê bâsira tani na me igê na kati, ga tabegia me.” O Jorama ki arami, ki vi: “Hagatorangenia na mane igê na hosi, hanana ge tarahua, vi nga na tamaka ngegana se na merongaka.”

¹⁸Na mane igê na hosi ki tage ki râ tanga o Jehu ma ki vi tanga, ki vi: “Na maneraha ki obania i girara, vi manga igo ma ko râ me igê na koroha se mareha.” O Jehu ki arami, ki vi: “I mareha vi na tagaraha iamu. Gu mumuriê!” Na mane ni anumasiha igê na bebetehe ki hagarongo, vi na mane tora tamasinga ki bani mataruhira râ na me ngegana ma ki pe aporo me.

¹⁹Ta na mane tora tamasinga ki râ nogana ma ki hagatea o Jehu manga na mane i nanago. O Jehu ki arami nikâ, ki vi: “Mareha vi na tagaraha iamu. Gu mumuriê!

²⁰Nikâ na mane ni anumasiha ki hagarongo ki vi: “Na mane tora tamasinga ki bani mataruhira râ na me ngegana ma ki pe aporo me. Ma na mane i bêngenira na me ngegana ki torea na kati iana ma ki hagatanguhia rêrê era i manga na mane i beka. O Jehu ma kani girara i torea vikana na kati!”

²¹O Jorama na maneraha ki haribona, ki vi: “Hagarêa na kati iaku.” Ngaira ka hagarêa. Ngaia ma na maneraha o Agasia karu tagirigi na kati iaterua hegitigi, karu râ vurusia o Jehu. Ngairerua karu mehetarahu igê na mako iana i nago o Nabote.

²²O Jorama ki hagatea o Jehu, ki vi: “I hega, igo ko râ me igê na koroha se i mareha?” O Jehu ki arami, ki vi: “Tanu hega kani vi na marapeha, suria ga gâga mêngagi na girarasiha ma na vogasiha ni ataro, i bani haganegagi kenamu ka Isebele?”

²³O Jorama ki ngiria o Agasia, ki vi: “Agasia, na harikatoha!” Ngaia ki pariria bê aporo na kati iana ma ki gava.

²⁴O Jehu ki okea raramohaga renia na epage ma ki hanatenia na mage ki hita i gerina o Jorama ma ki kumu igê na bunaniana. O Jorama ki me ma ki vota igê na kati iana.

²⁵O Jehu ki vi tanga o Bitikare na kariana, ki vi: “Torea na gahuana ma ko kasia igê na mako iana i nago o Nabote. Go takusia aporo na matena igerua karu tage haku karu mumuria o Agaba o vaemana na maneraha o Jorama. I ngekana na Araha ki tamasi tanga o Agaba, ki vi:

²⁶‘I nanora inê kê bâsia na gaputa o Nabote mo karena i tata berabera i ano. Inê kê tohe, vigê page hagaitangigo igê nga na mako ikê.’” Vikê o Jehu ki bonasia na kariana ki vi: “Torea na gahuana o Jorama ma ko kasia igê na mako iana i nago o Nabote, hanana ge hagamonaria na tohenga iana na Araha.”

²⁷Na maneraha o Agasia ki bâsia na tarana ngekana. Tahema ngaia ki gava igê na kati iana tanga na hinua i Bete Hagani. O Jehu ki tarigenia. O Jehu ki bonasira na mane ni me iana, ki vi: “Nahuia nogana!” Ngaira ka hagamamaria, matena i torea na kati iana ki tagere suria na tara tanga i Gure, hagarangia na hinua i Ibeliama. Henaka i mamari, ma ngaia ki ama ni râ nga mataro me ki ata i hinua i Megito ma ki me igê.

²⁸Na mane ni hagaotonga iana ka torea aporo na gahuana tanga i Jerusaleme igê na kati ma ka bagia i Hinua iana o Tavite igê na matahuta na maneraha.

²⁹O Agasia ki vora re na maneraha i Juta, matena o Jorama o karena o Agaba ki maneraha i Isiraele surigi noga na tangahuru matare tage na harisi.

³⁰O Jehu ki ata i Jeserele. Ka Isebele ki bani girara na tarana i bani akê me. Ngaia ki pupunigi na maana, ki maningaigi na varehuna ma ki ura hagarangia na mabaha i ruma raha ki bâbâ vato i tara.

³¹Matena i banu me o Jehu igê na manipara, ka Isebele ki ngiria, ki vi: “Simiri kanigo!” Nahu maneraha! Go râ me tanga na ta?”

³²O Jehu ki sira akê ma ki ngere tagere, ki vi: “Ti ki panepane heniê?” Na vererua se na veraoru na mane ni hagaotonga igê na ruma raha ka bâsia vato igê na mabaha.

³³O Jehu ki vi tangara, ki vi: “Mu kasia vato me!” Ngaira ka kasia vato ma na gupuna ki pisiria râ na apê na ruma ma ki pisirira râ nikâ na hosi. O Jehu ki torera na hosi ma na kati iana ka tango ka akêhia na gahuana.

³⁴Ngaia ki banu i ruma ki ngê ma ki kahu vi: “Torea vê na eragani gete ma kamu bagia. Henaka i manga ngekana, ma ngaia nga kani ka karena na maneraha.”

³⁵Ma na mane ga hura ka bagia, ngaira ka tarahugi ma na ratana bêna ma na suri ni rimana ma ni êgana.

³⁶Matena ga hagarongoa vikana o Jehu, o Jehu ki vi: “Nga na tarana na Araha ki bani visia, vi page voravora me ngekana, matena i tamasi i harana o Elia na kariana, ki vi, ‘Na o kaniga page ngaua na gahuana ka Isebele i na apanena i Jeserele.

³⁷Na ameameagani na gahuana ka page tâtâ totoko mangagi na ae, hanana i asa ta na enoni vige bâbâgiraragi.’”