Read Kahua 1 SIHONGA 10 Bible Online

1 SIHONGA 10 - Kahua bible

1 SIHONGA 10

¹Na Pilisitina ka meraheariha na Isiraelita igê na hungana i Giliboa. Na Isiraelita rako ka me ma na ani ga tahi râ henira na maneraha o Saulo ma o karena, ngaira ka gava.

²Ma na Pilisitina ka tarigenira ma ka nahuira ka me o karena gi oru o Saulo: o Jonatane, o Abinataba ma o Malakisua.

³Na hearihatana ki ama ni akê bâraha nga tanga o Saulo. Na mage iata na merongana ka takea ki mamari ngavê.

⁴Ngaia ki vi tanga na mane haoru i toregi na tangaruha iana, ki vi: “Gu amuria na tatapa borahu iamu ma ku nahuiê be me, i era ma na ahuroto na Pilisitina ka hagamamasiagê. Ma na kariana ki magu vige kato vikana. Vikê o Saulo ki têa na tatapa borahu iana marena ma ki suta marena igê.

⁵Na kariana ki bâsia vi o Saulo ki me. Vikê ngaia nogana ki suta marena igê na tatapa borahu iana.

⁶O Saulo mo karena gi oru ka me vikana. Ma ki mareha rârâ vi ta na hitangita na apaparaha iana vige maneraha.

⁷Matena ga rongo na Isiraelita ga oga igê na maruguna i Jeserele, vi na mane ni me na Isiraelita ka bani gava ma o Saulo mo karena ka bani me, ngaira ka gava panigi na hinua iata. Hemuri na Pilisitina ka râ me ka ogasigi ngaira.

⁸Na tangiana i murina na hearihatana na Pilisitina ka râ ka rurugu tenigi na gahuata na Isiraelita. Ngaira ka tarahugi na gahuata o Saulo mo karena, ga tâtâ igê na hungana i Giliboa.

⁹Ngaira ka retenguria na bêna o Saulo, ka tasigi na tuguni ni hearihatana iana ma ka hagatorangenira na mane tora tamasinga henigi suria i Pilisitia hagenani, hanana ga tarohenia igê na rongoha koro tangara na ataro iata ma tangara na enoni.

¹⁰Hemuri ngaira ka nakagi na tangaruha iana o Saulo igê ta na hitangini na ngêsu iata na ataro ma ka kuharenia na bêna o Saulo igê na ngêsu iana o Tagone na ataro iata.

¹¹Matena na ai ni Jabesi i Giliata ka rongoa na tarana ga katoa na Pilisitina tanga o Saulo,

¹²na mane ni me ramo ka râ ka toregi na gahuata o Saulo mo karena ma ka migiaporo tanga i Jabesi. Ngaira ka bagira i mamarugana na apinige raha ma ka hari surigi na tangiani gi pi.

¹³O Saulo ki me, suria i pe toto suria na Araha. Ngaia ki pe marupegi na ramata iana na Araha. Ngaia ki hagate tarana i pasita na atarota na enoni ga bani me,

¹⁴ma ki pe hagatea hete na Araha. Tahema na Araha ki hagamesia, ma ki naka o Tavite karena o Jese ki maneraha urusia.