Read Kahua 1 SIHONGA 11 Bible Online

1 SIHONGA 11 - Kahua bible

1 SIHONGA 11

¹Na Isiraelita hato ka râ i Heberone i pasina o Tavite ma ka vi tanga, ka vi: “Igo ma igami ka na gapu mavoro.

²I nago, matena i maneraha mênga tangagia o Saulo, igo ko bêngenira na Isiraelita tanga na hearihatana. Ma na Araha God iamu ki surua tangago, vi igo ko page bêngenira na kariana ma ko page marungira.”

³Tahema na enoni raha hato i Isiraele ka râ me i Heberone i pasina na maneraha o Tavite. Ngaia ki katoa na heaganariha henira i maana na Araha. Ngaira ka monea ki maneraha i Isiraele, manga i bani visia na Araha i harana o Samuele.

⁴Na maneraha o Tavite ma na Isiraelita hato ka tavo uga tanga ga taharia i Jerusaleme. I nago ka visia vi Jebusi, ma na Jebusita na bamarari ka gâga mêngara.

⁵Na Jebusita ka vi tanga o Tavite, vi ngaia ki asa vige banu i hinua iata, ma o Tavite ki henahuraua i Sione, na apanena nganganihaga na hinua iata. Ma hemuri ka visia vi ‘Hinua iana o Tavite’.

⁶O Tavite ki vi: “Na mane ni me i hagenago ki nahuia ki meme na Jebusita, ngaia ki page bêngenira na mane ni me.” O Joaba karena ka Seruia i bêngenia na tahariha ki vora re na mane i bêngenira na mane ni me.

⁷Suria o Tavite ki oga igê na apanena nganganihaga na hinua, tahema ga hêtana vi ‘Hinua iana o Tavite’.

⁸Ngaia ki tagarahia aporo na hinua, i haganega igê na agua ga opahunia i na apanena bêkê na hungana, ma o Joaba ki tagara hagahatungia na hinua.

⁹Ki rârâ ma o Tavite ki raramohaga ngavê, suria na Araha raramohaga hunia ki ngahisia.

¹⁰Igê nga ka na atata na mane ni me ramo iana o Tavite, i rongo raha na atata. Ngaira ma na Isiraelita hato nikâ ka tamania o Tavite, ki vora re na maneraha, manga na Araha i bani surua, ma ka hagagatagatania na arahanga iana.

¹¹Na ani hagenago ka no Jasobama ni Gakamone. Ngaia ki na hitangita na vera oru i rongo raha na atata. Ngaia ki bêngenira oru. Ngaia ki meraheariha na 300 na mane ni me renia na ora iana ma ki mutera hato ngavê igê na hearihatana gi tage.

¹²Na ruata na vera oru ngegana ka no Elasare karena o Toto tenia na hagosi ninuni iana o Agoaga.

¹³Ngaia ki ngahisia o Tavite, matena i meraheariha na Pilisitina igê na hearihatana i Pasa Tamimi. Ngaia ki oga i mu ni koni i ngekana, matena na Isiraelita ka haganega ka gava.

¹⁴Ngaia ma na me iana ka ura gatagata so hete i gupuna na mu ni koni ma ka meraheariha igê na Pilisitina. Vikana na Araha ki katora ka teha igê na hearihatana.

¹⁵Na vera oru me nikâ na mane ni me ramo. Ngaira ka na hitangita na 30 na mane ni me i rongo raha na atata. Ngaira ka râ tanga na botena hagarangia na vaba i Atulama i oga igê o Tavite, henaka vi na Pilisitina ka tênga igê na maruguna i Repaimi.

¹⁶I na matena ngekana o Tavite ki oga igê na agua ga parahia igê na hungana ma na apanena na mane ni me na Pilisitina ka oga i Beteleheme.

¹⁷O Tavite ki maehasi takoha aporo i pasina i Beteleheme ma ki vi: “E, inê kê obania bâraha vi ta na enoni ki torea me na ve tenigi na vekaru hagarangia na maanipara i Beteleheme, hanana ve tono.”

¹⁸Hoi, na vera oru na mane ni me ramo ngegana ka taha tarata ka banu tararua na tênga iata na Pilisitina, ka ti na ve igê na vekaru ma ka migia aporo tanga o Tavite. Ma ngaia ki usi vige tono ma ki karangia so ma i ano manga na vogasiha tanga na Araha.

¹⁹Ngaia ki vi: “Araha, i bara tangê vi ve tono. Manga gê totono ki manga vigê tunumigi na gaputa na mane ngegê ga kasi manavata.” Vikana ngaia ki usi vige tono. Nga hanana na tauhata na vera oru na mane ni me ramo ngegana ngekana.

²⁰O Abisai o vesina o Joaba kani raha renira na 30 na mane ni me ramo. Ngaia ki meraheariha na 300 na merongana renia na ora iana ma ki mutera hato. Vikana ngaia ki rongo raha na atana i berarogata na 30 na mane ni me ramo ngegana.

²¹Ngaia ki rongo raha ngavê na atana i berarogata. Tahema ngaia ki raha renira na 30 na mane ni me ramo ngegana. Ma ki mareha vige rongo raha na atana mangara oru hagenago.

²²O Benaia karena o Jehoiata ni Kabasele ki na mane ni me ramo nikâ i rongo raha na atana. Ngaia ki rongo raha na atana igê na hearihatana. Ngaia ki nahuirerua na mane ni me ramo ngavê ni Moaba. I ta na tangiana matena na rogaroga anumaga ngavê, ngaia ki so igê na kiru ma ki nahuia ki me igê na laione.

²³Nikâ ngaia ki nahuia ki me na mane ni Esipito i borahu ngavê na 2 mita ma na 15 sentimita ma ki tangaru renia na apena na bagaora raha ngavê. O Benaia ki taharia renia na tarure, ki tahura na ora tenia na mane ni me ni Esipito ma ki ahura renia ki me.

²⁴Ngaigi nga ka na tauhana raha o Benaia, na hitangita na 30 na mane ni me ramo ngegana.

²⁵Na atana ki rongo raha teharigi na atata na 30 na tamana ma ki mareha vige rongo raha mangara oru hagenago. O Tavite ki atea ki raha tangara na mane ni me ni anumasiha iana marena.

²⁶Igê nga tani nikâ na mane ni me, ga rongo raha na atata: o Asaele o vesina o Joaba, o Eleganana karena o Toto ni Beteleheme, o Samote ni Harore, o Gelesi ni Bete Peleti, o Ira karena o Ikesi ni Tekoa, o Abiesere ni Anatote, o Sibekai ni Gusa, o Ilai ni Agoaga, o Maharai ni Netopa, o Geleti karena o Bana ni Netopa, o Itai karena o Ribai ni Gibea igê na apanena iata na raraha iana o Benamino, o Benaia ni Piratone o Gurai ni Nagale Gasa, o Abiele ni Araba, o Asamavete ni Bagurimi, o Eliagaba ni Salabimi, o Haseme ni Gisone, o Jonatane karena o Sage ni Harare, o Agiama karena o Sakare ni Harare, o Elipala karena o Ure, o Gepere ni Mekera, o Agia ni Bete Peleti, o Gesero ni Karamele o Narai karena o Esebai o Joele o vesina o Natane, o Mibigare karena o Hagari, o Seleke ni Amone, o Nagarai ni Berote i toregi na tanga(...)