Read Kahua 1 SIHONGA 12 Bible Online

1 SIHONGA 12 - Kahua bible

1 SIHONGA 12

¹O Tavite ki oga i Sikilaga. Ngaia ki bani gava tanga i ngekana, hanana i tahitahi tenia na maneraha o Saulo karena o Kisi. Rako na mane ni me ramo ga manisingenia na hearihatana ka hakunia i ngekana.

²Ngaira ka na me tenia na varo ninuni iana o Benamino manga o Saulo. Ngaira ka tangaru renigi na epage, na mage ma na hêsigogo. Ngaira ka girara ga ariha se ga hanana renigi na otota ma na mahata.

³Na atata kani igê: o Agiesere mo Joasa ni Gibea. Ngairerua ka no karena o Sema. O Agiesere ki bêngenira; o Jesiele ma o Peleti. Ngairerua ka no karena o Asamavete; o Beraka ma o Jehu ni Anatote; o Jisimaia ni Gibeone. Ngaia ki na mane ni me ramo i rongo raha na atana ma ki na hitangita na mane ni me ga bêngenira na 30 na mane ni me ramo ga rongo raha na atata. O Jirimeia, o Jagasiele, o Joganana ma o Josabata ni Getera; o Elusai, o Jerimote, o Bealia, o Semaria ma o Sepatia ni Garipi; o Elekana, o Jisia, o Asarele, o Joesere ma o Jasobama tenia na hagosi ninuni iana o Koraga; o Joela ma o Sebatia ni Getore. Ngairerua ka no karena o Jerogama.

⁸Matena o Tavite ki oga igê na bagamasusu raha igê na agua ga pararihia, tani na mane ni me ramo tenia na varo ninuni iana o Gata ka hakunia i ngekana. Ngaira ka manisingenia na hearihatana renigi na bêata ma na ora. Ngaira ka bâ hagamamakuku mangara na laione ga mangariaga ma ka asihura rârâ mangara na goti vasiga igê na hungani.

⁹Igênga nga na atata ga râ hesurisuri surigi na rongohani hehegitigi na atata: o Esere, o Obatia, o Eliaba, o Misimana, o Jirimeia, o Atai, o Eliele, o Joganana, o Elesabata, o Jirimeia ma o Makabanai.

¹⁴Na mane ni me ngegana kani tenia na varo ninuni iana o Gata. Tani ka bêngenira na rehagaro gi tage na mane ni me ma tani ka bêngenira na tangarê gi tage na mane ni me.

¹⁵Igê na hageha hagenago igê na harisi, ngaira ka tarêhia na ve i Jotano, matena i maganu raha, ma ka tarigenira hura na enoni ga ogasigi na maruguni bêkê ma bêso na ve i Jotano.

¹⁶I ta na tangiana tani na me tenirerua na varo ninuni iaterua hegitigi o Benamino mo Juta ka râ tanga na agua ga pararihia i oga igê o Tavite.

¹⁷O Tavite ki hura vurusira ma ki vi tangara, ki vi: “Manga vi igamu ma kamu râ me igê na komaniha, hanana vigamu tamaniê, hoi mu arâ me kamu hakunigami. Ma ki manga vi igamu ma kamu râ me tangê igê na eraha, hanana mu rakuê ma kamu tagareniê tangara na merongaku, henaka vi inê ki mareha rârâ vi ve hagaerasigamu, hoi, God iata na êvarika ki page girara ma ki page hagaitangigamu.”

¹⁸Na raramohana God ki angaria o Amasai na hitangita na me ngegana. Vikana o Amasai ki ngere raha, ki vi: “Tavite karena o Isai, igami kami pane henigo. Mu tavoraha, igo ma na kariamu. God ki tamanigamu.” O Tavite ki nakara ka hakunia ma ki kasira ka bêngenira na mane ni me iana. O Amasa ki bêngenira na 30 na mane ni me ramo i rongo raha na atata.

¹⁹Tani na mane ni me tenia na varo ninuni iana o Manase ka pane henia o Tavite, matena i tavo uga henira na Pilisitina, hanana i meheariha na maneraha o Saulo. O Tavite ki pe tamanira na Pilisitina, suria na maneraha iata ka paia o Tavite ki aporo i Sikilaga, suria ngaira ka tako, ka vi: “Manga vi ngaia ma ki panepane aporo henia na maneraha o Saulo, e, igia ka page meme.”

²⁰Igênga nga na atata na mane ni me tenia na varo ninuni iana o Manase, ga pane henia o Tavite, matena i aporo me i Sikilaga: o Atanaga, o Josabata, o Jetiaele, o Mikaele, o Josabata, o Elihu ma o Siletai. Matena ga oga igê na apanena iana o Manase, na ara ni hitangita ki bêngenira na rehagaro gi tage na mane ni me.

²¹Ngaira ka tamania o Tavite, i kasira ka hagesurira na mane ni me iana renia na hearihatana, suria ngaira hato ka na mane ni me ramo ngavê. Hemuri ngaira ka bêngenira na mane ni me iata na Isiraelita.

²²I na ara ni tangiana ka ama ni arâ nga me na mane ni me, hanana ga hakunira na mane ni me iana o Tavite. Ki page arihu ma na mane ni me iana o Tavite ka gahu ngavê.

²³Matena o Tavite ki oga i Heberone, rako na mane ni me ga manisingenia na hearihatana, ka hakunira na mane ni me iana o Tavite, hanana ga katoa ki maneraha urusia o Saulo, manga na Araha i bani surua. Tenia na varo ninuni iana o Juta: na 6, 800 na mane ni me, ga tangaru renigi na bêata ma na ora ma ka manisingenia na hearihatana. Tenia na varo ninuni iana o Simeone: na 7, 100 na mane ni me, ga manisingenia na hearihatana. Tenia na varo ninuni iana o Levi: na 4, 600 na mane ni me. I berarogata na 3, 700 na mane ni me ka na kariana o Jehoiata, na raraha iana o Aroni. Nikâ o Satoke henira na 22 o goana, ga bêngenira na mane ni me. O Satoke ki na mane haoru, i manisingenia na hearihatana. Tenia na varo ninuni iana o Benamino: na 3, 000 na mane ni me ma, suria rako ngavê na me tenia na varo ninuni iana o Benamino ka ama ni pane henia nga o Saulo, suria o Saulo ki na raraha iana o Benamino. Tenia na varo ninuni iana o Eparaimi: na 20, 800 na mane ni me ramo i rongo raha na atata igê na (...)

³⁸Ngaira hato na mane ni me ngegana ga tangaru ka nanê ni hearihatana, ngaira ka râ i Heberone. Ngaira ka togeaga, hanana ga katoa o Tavite ki maneraha tanga i Isiraele hagenani. Ma ngaira hato na enoni i Isiraele ga pe râ me, ngaira ka tako vikana nogata.

³⁹Na mane ni me ngegana ka oga i Heberone surigi na tangiani gi oru henia o Tavite ma ka magoto renigi na ngauha ma na tonoha, ga bani hagarêgi na goata.

⁴⁰Na goata hagatê tenigi na varo ninuni iata hehegitigi o Isakare, o Sebuluni ma o Napatali ka râ me nogata henira na tonki, na kamelo ma na hosi ni toraha ma na puruka na voemavo, ga rutangenigi rako na ngêra: na palaua, na guani na fiki, na guani na vaini, na vaini ma na oile ni olive. Ngaira ka merarâ me nikâ na puruka ma na sipi tanga ga nahuira ka ngaura. Na tarana ngekana ki hagabângenia vi na Isiraelita hato ka vagevage ngavê.