Read Kahua 1 SIHONGA 14 Bible Online

1 SIHONGA 14 - Kahua bible

1 SIHONGA 14

¹O Girama na maneraha i Taire ki hagatorangenira na mane ka râ tanga o Tavite ka metamasi, hanana vi ngaira ke tagarahia na ruma raha iana. Ngaia ki vatea renigi na bagorani na apinige ma renira na mane ga manisingenia na tagaraha ni ruma renigi na apinige ma na hê.

²Ngekana o Tavite ki tahetara, vi na Araha ki naka ki maneraha ramo i Isiraele, hanana na enoni ka gâga igê na ramana.

³I ngekana i Jerusaleme o Tavite ki torera akê nikâ tani na gete ma ki aparara akê nikâ o karena ma ka karena.

⁴Nga na atata na karena i aparara i Jerusaleme kani igê: o Samua, o Sobaba, o Natane, o Salomo,

⁵o Ibigare, o Elisua, o Elepeleti,

⁶o Noga, o Nepege, o Japia,

⁷o Elisama, o Beliata mo Elipeleti.

⁸Matena na Pilisitina ka rongo, vi o Tavite ki maneraha ki marungia i Isiraele hagenani, na mane ni me iata ka râ, hanana viga hagatotongoa. Vikê o Tavite ki tavo uga vurusira.

⁹Na Pilisitina ka ata râ igê na maruguna i Repaimi ma ka haganega ka rurugu igê.

¹⁰O Tavite ki hagatea God, ki vi: “I hega, i koro ma vari vigê taharira na Pilisitina?” I hega igo ko page katoê vari kê teharira?” Na Araha ki arami, ki vi: “Ua. Gu taharira. Inê kê page katogo ko tehateha.”

¹¹Vikê o Tavite ki taharira i Bala Perasimi ma ki teharira igê. Ngaia ki vi: “God ki katoê kê musira na merongaku gê manga na maganuha.” Tahema ka hêtana na agua ngekana vi Bala Perasimi, i vi ‘Na Araha ni musiha’.

¹²Matena na Pilisitina ka gava, ngaira ka panigi na nunuta na ataro iata, ma o Tavite ki haribona ka sungigi.

¹³Ki page arihu ma na Pilisitina ka aporo me nikâ igê na maruguna i Repaimi ma ka rurugu nikâ igê.

¹⁴Nikâ o Tavite ki hagatea God. God ki arami ki vi: “Siana ko taharira ikê ma ku rihu hete ma ku nanê ku taharira i na apanena râ hagarangigi na apinige.

¹⁵Matena go rongoa na tavo ni uga igê na bêni na apinige, hoi, go taharira, suria inê nga kanigê page tavo uga taramu, hanana gê teharira na mane ni me ni Pilisitia.”

¹⁶Suria o Tavite ki tê viteana God, tahema ki sugarira bê aporo na Pilisitina tenia i Gibeone ki râ tare tanga i Gesere.

¹⁷O Tavite ki rongo raha na atana surigi na ara ni hinua, ma na Araha ki katora na enoni hato i maveta ka magutenia o Tavite.