Read Kahua 1 SIHONGA 15 Bible Online

1 SIHONGA 15 - Kahua bible

1 SIHONGA 15

¹O Tavite ki tagarahigi na ruma i Hinua iana o Tavite tanga ngaia marena. Ngaia ki hagarêa nikâ na agua tanga na bokesi na suruheri iana God ma ki hagêrasia na ruma na gahu igê.

²Hemuri ngaia ki vi: “Ngaira ma na mane ni hagarahenga kaniga torea na bokesi na suruheri, suria ngaira nga ka na ani na Araha ki bani atera hanana ga torea ma hanana ga tagara tanga God tare.”

³Vikê o Tavite ki bonasira na Isiraelita hato ka haku me i Jerusaleme, hanana ga torea na bokesi na suruheri tanga na agua o Tavite ki bani hagarêa tanga.

⁴Hemuri ngaia ki kasi tamasinga ka râ me na raraha iana o Aroni ma na raraha iana o Levi na mane ni hagarahenga. I berarogata ngaia ki atera na ani igê.

⁵Tenia na hagosi ninuni iana o Kehata na raraha iana o Levi: na 120 na mane i ruguhana o Uriele.

⁶Tenia na hagosi ninuni iana o Merari: na 220 na mane i ruguhana o Asaia.

⁷Tenia na hagosi ninuni iana o Geresome: na 130 na mane i ruguhana o Joele.

⁸Tenia na hagosi ninuni iana o Elisapane: na 200 na mane i ruguhana o Semaia.

⁹Tenia na hagosi ninuni iana o Geberone: na 80 na mane i ruguhana o Eliele.

¹⁰Tenia na hagosi ninuni iana o Usiele: na 112 na mane i ruguhana o Aminataba.

¹¹Hemuri o Tavite ki unira me na mane ni vogasiha o Satoke ma o Abiatare ma na mane ni hagarahenga gi ono: o Uriele, o Asaia, o Joele, o Semaia, o Eliele mo Aminataba.

¹²Ngaia ki vi tangara na mane ni hagarahenga, ki vi: “Igamu nga ka na bêni na aparaha iana o Levi. Igamu ma na goami na mane ni hagarahenga getera, mu hagamatarotarogamu maremi, hanana mu girara mu torea na bokesi na suruheri iana na Araha God iata na Isiraelita tanga na agua gê bani hagarêa tanga.

¹³Suria igamu kamu pe torea matena i hato râ ikini, tahema na Araha God iaka ki hagaitangigia, suria igia ka pe râ surigi na ramata iana, manga ko hanana.”

¹⁴Hoi, na mane ni vogasiha ma na mane ni hagarahenga ka hagamatarotarora mareta, hanana ga torea na bokesi na suruheri iana na Araha God iata na Isiraelita.

¹⁵Na mane ni hagarahenga ka tugia surigi na tamasinga iana na Araha tanga o Moise.

¹⁶O Tavite ki bonasira na bêni na raraha iana o Levi, hanana ga atera na mane ni hagarahenga ka kiki, ka vagevage ma ka tarugigi na gita ma na marâ ga tagitaginigi.

¹⁷Tenigi na hagosi ninuni iata hehegitigi na mane ni kiha, ngaira ka atera na mane ga tagitaginigi na marâ. Ngaira kani igê: o Hemana o karena o Joele, o Asapa o goana karena o Berekia, ma o Etane karena o Kusaiahu tenia na hagosi ninuni iana o Merari. Tani na raraha iana o Levi ka tamanira ma ka tarugigi na gita ga akê na ringeni. Ngaira kani igê: o Sekaria, o Beni, o Jasiele, o Semiramote, o Jegiele, o Uni, o Eliaba, o Maseia, ma o Benaia. Ngaira ka atera nikâ tani na raraha iana o Levi, ka tarugigi na gita ga so na ringeni. Ngaira kani igê: o Matitia, o Elipelehu, o Mikineiahu, o Obeti Etome, o Jeiele ma o Asasiahu. Ngairerua o Obeti Etome ma o Jeiele karu mane ni anumasiana na ruma ni rotu.

²²Ngaira ka atea o Kenania na hitangita na meraha iata na raraha iana o Levi ki hagagara na tugiana na bokesi na suruheri, suria ngaia ki manisingenia na hagagaraniha.

²³Ngaira ka atera o Berekia, o Elekana, o Obete Etome mo Jehia, hanana ga bâbâsuria na bokesi na suruheri. Ngaira ka atera na mane ni vogasiha o Sebania, o Josapata, o Natanele, o Amasai, o Sekaria, o Benaia ma o Eliesere ka uhigi na ahuri ka nanago tarana na bokesi na suruheri.

²⁵Vikê na maneraha o Tavite, na enoni raha iata na Isiraelita ma na mane ga bêngenira na mane ni me, ngaira ka râ tanga na ruma iana o Obete Etome, hanana ga torea na bokesi na suruheri. Ngaira ka vagevage.

²⁶Ngaira ka susu renira na puruka gi pi ma na sipi gi pi, hanana God ki korokoro tangara na mane ni hagarahenga, ga tugia na bokesi na suruheri.

²⁷O Tavite, na mane ni hagarahenga ga tugia na bokesi na suruheri, ma na ani ga kiki mo Genania i torera, ngaira hato ka tuguni siki, nga noga ma o Tavite ki rere vê nikâ igê na anga ni girarasiha.

²⁸Hoi, na Isiraelita hato ga râ henia na bokesi na suruheri, ka akê tanga i Jerusaleme. Ngaira ka ngerengere vagevage. Ngaira ka uhigi na ahuri ma ka tarugigi na gita ma na marâ ga tagitaginigi.

²⁹Matena ga mebanu na bokesi na suruheri i hinua, ka Mikale ka karena o Saulo ki kirihi hura igê na mabaha. Ngaia ki bâsia na maneraha o Tavite i mâmâ i rekereke, suria i vagevage, ma ngaia ki kitakita.