Read Kahua 1 SIHONGA 16 Bible Online

1 SIHONGA 16 - Kahua bible

1 SIHONGA 16

¹Ngaira ka torea râ na bokesi na suruheri tanga na ruma na gahu, i bani hagêrasia o Tavite tanga ma ka naka i rarona. Hemuri ngaira ka susu ma ka vogasi renigi na ngauha tanga ga ngê haku.

²Matena o Tavite ki susu ma ki vogasi hato, ngaia ki nungia na Araha, hanana i korokoro tangara na enoni.

³Hemuri ngaia ki vutungira na enoni hato renigi na ngêra. Na ara ni mane ma na ara ni gete i Isiraele ki toregi na guana na bereti gi tage, na agua na ganiana ga hahia ma tani na guani na vaini.

⁴O Tavite ki kasira tani na mane ni hagarahenga ka torea na hagarahenga tanga na Araha God iata na Isiraelita i maana na bokesi na suruheri, ka kiki ka hagarahasia.

⁵Ngaia ki kasia o Asapa ki torea na hagarahenga ma ki naka o Sekaraia ki tamania o Asapa. Ngaia ki kasira o Jeiele, o Semiramote, o Jegiele, o Matitia, o Eliaba, o Benaia, o Obete Etome mo Jeiele ka tarugigi na gita, matena o Asapa ki tarugigi na marâ ga tagitaginigi.

⁶Ngaia ki kasirerua na mane ni vogasiha o Benaia ma o Jagasiele karu uhigi na ahuri i maana na bokesi na suruheri igê na matena tanga.

⁷I ngekana nga o Tavite ki kasira moramora igê o Asapa ma na tamana na mane ni hagarahenga ka kiki ka hagarahasia na Araha.

⁸Mu visia koro na Araha. Mu tarohenia, i rongo raha na atana. Mu hagarongora na enoni hato i maveta renigi na tagaraha raha iana.

⁹Mu ki kamu visia raha na Araha. Mu visigi na mena iana.

¹⁰Mu ageage, suria igamu ka na kariana. Ge vagevage nogata na enoni hato. Ga rahesia na Araha.

¹¹Mu avarasia na Araha ke tamanigamu ma kamu rahesia tare.

¹²Mu takusigi na mena God i bani tanugi ma na tagaraha ma na suriha iana. Renia igamu nga ka na raraha iana o Jakobo. Ngaia ki na kariana na Araha. Renia igamu nga ka na raraha iana o Isiraele God i bani atea.

¹⁴Na Araha ka na God iaka. Na ramata iana ka tuguhira na enoni hato i maveta.

¹⁵Siana kamu bonotenia na suruheri God i bani naka henigamu. Na suruheri ngekê ki asa vige page hato.

¹⁶Na suruheri iana henia o Abarahamo. Na suruha iana tanga o Isako.

¹⁷Na Araha ki naka na suruheri henia o Jakobo. Na suruheri ngekê ki asa vige page hato.

¹⁸Ngaia ki vi: “Inê kê page haganahunigo renia na i Kanani. Ngaia ki na animu.”

¹⁹I nago na kariana God ka pe rako. Ngaira ka mamahuara i Kanani.

²⁰Ngaira ka arârâhigi na agua surigi na hinua.

²¹Ma God ki pe nakara na enoni i ngekana, hanana vige hagamamasiagara na kariana. Ngaia ki haganunura na maneraha i ngekana, hanana viga anumasira hete na kariana.

²²Ngaia ki vi: “Siana kamu erasira na kariaku hetakui. Siana kamu merongasira na poropete iaku.”

²³Maveta hagenani, mu kiria na Araha. I na ara ni tangiani mu tarohenia vi ngaia ki bani hagatahigia.

²⁴Mu tarohenia na raramohana raha tangara na enoni hato i maveta. Mu tarohenigi na tagaraha raha iana tangara na enoni hatohato.

²⁵Na Araha ki teha. I tuguhigia viga hagarahasia tare nga ma ka magutenia teharira na ataro hato.

²⁶Na ataro iata na enoni getera hato ka na marâ purua ma. Ma na Araha ki hagavoragi Na vavearo ma na bevoa tatara.

²⁷Na Araha ki bâ hahanetaga ma ki bagararaha. Na raramohana ma na bâkorohana karu raro i ruma ni rotu iana.

²⁸Igamu hato na enoni i maveta hagenani mu hagarahasia na Araha ma kamu hagahigasigi na bâbâhana ma na raramohana.

²⁹Mu hanetasia na Araha, i rongo raha na atana. Mu bêbanu i ruma ni rotu iana ma kamu vogasia. Mu rahesia maninga God na Araha.

³⁰Maveta hagenani, mu haneava renia. Ngaia ki naka na maveta ki nganganihaga igê na atohana ma ki asa vige suga râ tenia.

³¹Na ano ma na vavearo, muru vagevage. Hagarongora na enoni hato i maveta, renia vi na Araha ki marungira.

³²Na asi ma na ega hato igê, mu ngere vagevage. Na mu ma na ngêra igê, mu ageage.

³³Na apinige i bemu ka page ngere vagevage i maana na Araha, matena i arâ me ki marungia na maveta.

³⁴Ge hagarahasia na Araha, suria i takuigia. Na hetakuiha iana ki asa vige page hato.

³⁵Visia tanga: “God hagamauri iamami, gu takuigami. Gu megami aporo tenigi na agua mi totoko surigi, hanana mi visigo koro renia ma kami hagarahasia na atamu apuna.

³⁶Hagarahasia na Araha God na Isiraelita ga rahesia. Hagarahasia i ngekê ma tare ki bâ ki arâ. Hemuri na enoni hato ka vivi: “Monari”, ma ka hagarahasia na Araha.

³⁷Na maneraha o Tavite ki kasira o Asapa ma na tamana na mane ni hagarahenga ka torea tare na hagarahenga i maana na bokesi na suruheri. Ki tuguhira viga katogi na tagaraha iata i na ara ni tangiani surigi na ramata.

³⁸O Obeti Etome karena o Jetutuni ma na mane tangahuru ge ono matara ke varu na goana ki tuguhira, viga tamanira. O Gosa mo Obeti Etome karu torea na anumasiana na maani ruma.

³⁹O Tavite ki kasira o Satoke ma na tamana na mane ni vogasiha ka torea na hagarahenga tanga na Araha igê na agua ni hagarahenga i Gibeone.

⁴⁰I na ara ni mavoraro ma i na ara ni manurahi ki tuguhira ga susu igê na bea ni vogasiha surigi na ramata iana na Araha tangara na Isiraelita.

⁴¹Henira ngaira ka oga o Hemane mo Jetutuni ma na mane ga bani atera ka kiria ma ka hagarahasia na Araha, ka vi: “Na hetakuiha iana ki asa, vige page hato.”

⁴²O Hemane mo Jetutuni karu torera na mane ga ahuri, ka tarugigi na gita ma na marâ ga tagitaginigi, matena na ani getera ka kiria ma ka hagarahasia na Araha. Na goana o Jehutuni ka anumasigi na maani ruma.

⁴³Hemuri na enoni hato ka aporo i pasita, ma o Tavite ki aporo i pasina, hanana i oga henia na ahemata iana.