Read Kahua 1 SIHONGA 17 Bible Online

1 SIHONGA 17 - Kahua bible

1 SIHONGA 17

¹Na maneraha i Tavite ki oga tonge i ruma raha iana. Ta na tangiana ngaia ki unia me o Natane na Poropete ma ki vi tanga, ki vi: “Bâ, inê kê oga igê na ruma na bagorani na apinige ma na bokesi na suruheri iana na Araha ki oga ma igê na ruma na gahu.

²O Natane ki arami, ki vi: “Go katoa na tarana go takusia, suria God ki ngahisigo.”

³Ma igê na bungiana ngekana God ki vi tanga o Natane, ki vi:

⁴“Gu râ ma ku hagarongoa na kariaku o Tavite, vi inê kê vi vikê tanga: Igo ki asa iamu, vigu torea tangê na ruma ni rotu be gâga igê.

⁵Haganega me tenia na matena gê hagatahira igê na Isiraelita tenia i Esipito mataro me i ngekê, inê kê pe oga rârâ igê na ruma ni rotu. Inê kê bani oga rârâ ma igê na ruma na gahu, matena gê arârâ.

⁶Igê na ara ni rârâha iaku henira na Isiraelita, inê kê pe hagatea rârâ ta na hitangita na mane ni hagarahenga gê kasira, vi tanu hega kaniga pe tagarahia tangê na ruma ni rotu na bagorani na apinige.

⁷Gu hagarongoa na kariaku o Tavite, vi inê na Araha raramohaga huniê kê vi vikê tanga: Inê ma kê torego hura tenia na bâsuriana na sipi igê na bena ma kê kasigo ko bêngenira na kariaku na Isiraelita.

⁸Inê kê bani ngahisigo me tare i na ara ni agua go arâ igê. Inê kê bani mutera me na merongamu hato go sugarira taramu. Inê be katoa ke rongo raha na atamu mangagi na atata na mane ga raramohaga ngavê i maveta.

⁹Inê kê bani atea na agua tangara na kariaku na Isiraelita, hanana ga ogasia. Ngaira ka gâga i ngekana ma ki asa ta na enoni vige page hagamamasiaga apeta nikâ. Haganega me tenia na matena ga banu me igê na agua ikê, na merongata ka taharira tare. Ma na tarana ngekana ki hato, vige page akê me nikâ. Inê kê surua, vigê mutera na merongamu hato ma na apaparaha iamu ke heheuri.

¹¹Matena go meme ma ko panepane henira na êvarimu, inê kê page kasia ta na hitangita o karemu ki maneraha urusigo ma kê page katoa na arahanga iana ki ama ni raramohaga nga.

¹²Ngaia nga ka na ani i page torea na ruma ni rotu tangê, ma inê kê page katoa na apaparaha iamu ke heheuri tare ki bê ki arâ.

¹³Inê kê page manga o vaemana ma ngaia ki page manga o kareku. Inê ki asa be page kasi renia, manga gê kasi renia o Saulo, gê kasia hura, hanana igo ko maneraha urusia.

¹⁴Inê be kasia ke bêngenira na kariaku ma ke bâsuria na arahanga iaku tare ki bê ki arâ. Na arahanga iana ki asa vige page hato.”

¹⁵O Natane ki hagarongoa o Tavite renigi na ara ni marâ God i hagamarutea renigi.

¹⁶Hoi, na maneraha o Tavite ki banu igê na ruma na gahu, i oga igê na bokesi na suruheri iana na Araha. Ngaia ki oga so ma ki nunginungi, ki vi: “Araha God, igo ko nakagami akê inê ma na ahemata iaku igê na tarana i pe marisimami.

¹⁷Henaka, ma igo Araha God ko ama ni kasigami akê nga. Igo ko bani nakagi na suruha iamu tangara na raraha iaku igê na matena i muri me. Ma igo Araha God ko katoê, vi inê ka na enoni raha.

¹⁸Na ta nikâ be visia tangago? Igo ko bani aitangisiê ngavê. Ma ki henaka, ma igo ko hagarahasiê inê na kariamu.

¹⁹Vikana nga ki na obaniha ma na katoha iamu. Igo ko bani katogi na tarani raha ngegana, hanana go hagagirarê renia na arahanga iaku i na matena i muri me.

²⁰Araha, i mareha rârâ tani vige maratoramu. Igami kami bani girara me, vi igo getego ma ko God.

²¹I maveta hagenani ki mareha rârâ ta na apaneni nuni vige maratorata na Isiraelita, suria go hagatahira, matena ga vora re na kare rakuraku, hanana go atera ka vora re na kariamu maremu. Na atamu ki rongo raha i maveta hagenani, suria go tamanira renigi na tagaraha raha ma na mena. Igo ko hagatahira na kariamu tenia i Esipito ma ko tarigenira hura na apanini nuni getera, matena na kariamu ka sugarira tarata.

²²Igo ko katora na Isiraelita ka vora re na kariamu hagahu ma igo Araha ko God iata.

²³Hoita Araha God, gu hagamonarigi tare na suruha iamu tangagami, inê ma na raraha iaku, ma ko katogi ka vagavaga me mave na tarani go bani visigi.

²⁴Na atamu ki page rongo raha ngavê ma tare ki bê ki arâ na enoni ka page vivi: ‘Na Araha God raramohaga hunia ki God iata na Isiraelita.’ Ma igo ko page katoa, vi na raraha iaku ki asa vige page hato.

²⁵Inê kê pe magu vi ve nungigo vikana, suria igo ko bani hagagirarê, vi na raraha iaku ka page heheuri ka maneraha.

²⁶Igo Araha, igo nga ko God. Igo ko naka na suruha koro iamu ngekê tangê.

²⁷Inê kê nungigo, ku korokoro tangara na raraha iaku, hanana ngaira ka page ama ni vagevagesia nga ka korohamu. Igo Araha, ko bani koro tangara, ma na korohamu ki page aharêsira tare ki bâ ki arâ.”