Read Kahua 1 SIHONGA 18 Bible Online

1 SIHONGA 18 - Kahua bible

1 SIHONGA 18

¹Ki rârâ ma na maneraha o Tavite ki taharira nikâ na Pilisitina ma ki teharira. Ngaia ki hatungia tenira hanana vige marungigi nikâ na hinua i Gata ma na kere hinua hagarangia.

²Ngaia ki teharira nikâ na Moabita ma ki katora ka oga i ruguhana ma ka vuria na takesi tanga.

³Hemuri ngaia ki taharia o Hatatesere na maneraha i Soba i Siria hagarangia na apanena i Hamate, suria i uhungia vi naka aporo na apanena i ve i Uparatesi i ruguhana.

⁴O Tavite ki henahuraura na rehagaro gi tage na kati ni me, na rehagaro gi pi na mane ni me igê na hosi ma na 20,000 na mane ni me na ani ga râ ma. Ngaia ki nakara na 200 na hosi tangagi na 100 na kati ni me ma ki raharugura na ani getera hato.

⁵Matena na ai ni Siria ga oga i Tamasiko ka hagatorangenira na mane ni me, hanana viga tamania o Hatatesere, o Tavite ki taharira ma ki mutera na 22,000 na me iata.

⁶Ngaia ki nakara totoko na mane ni me iana ka tênga igê na apanena iata na ai ni Siria. Vikê na ai ni Siria ka oga i ruguhana o Tavite ma ka vuria na takesi tanga.

⁷O Tavite ki henahuraugi na bêata na golo iata na mane ga bêngenira na mane ni me iana o Hatatesere ma ki migirâ tanga i Jerusaleme.

⁸Ngaia ki tora nikâ rako na marâ ga mangagi na poro ni hagakoroha tenirerua na hinua i Tibigate me Kune, i marungirerua o Hatatesere. Renigi na marâ ngegana o Salomo ki tagarahigi na baga na apira raha, na u, ma na marâ ga obanigi tanga na ruma ni rotu.

⁹O Tou na maneraha i Hamate ki rongo, vi o Tavite ki teharira na mane ni me hato iana o Hatatesere.

¹⁰O Tou ma o Hatatesere karu heariha tare. Tahema o Tou ki hagatorangenia o Hatorama o karena, ki râ ki hagamauru koro tanga na maneraha o Tavite, ma ki hagarahasia, suria i teharia o Hatatesere. O Hatorama ki tagarenigi na mahatanga na golo, na siliva ma na marâ manga na poro ni hagakoroha tanga o Tavite.

¹¹Na maneraha o Tavite ki nakagi râ tanga na rotu henigi na siliva ma na golo i bani henahuraugi tenira na enoni i na agua getigi i bani teharigi: na ani i Etome, i Moaba, i Amone, i Pilisitia ma ngaira na Amalekita.

¹²O Abisai o karena ka Seruia ki teharira na Etomita igê na maruguna Marasiga ma ki mutera na 18,000 na mane ni me ni Etome.

¹³Ngaia ki kasira totoko na mane ni me ka tênga suria i Etome hagenani, ma na ai ni Etome ka oga i ruguhana na maneraha o Tavite. Na Araha ki katoa o Tavite ki tehateha tare igê na ara ni hearihatani hato.

¹⁴O Tavite ki marungia i Isiraele hagenani, ma ki katogi na koroha ma na otoha ka aharêsira tare na kariana.

¹⁵O Abisai vesina o Joaba ki bêngenira na mane ni me. O Josapata o karena o Agilute ki na mane ni segesegeha.

¹⁶O Satoke karena o Agitube mo Abimeleki karena o Abiatare ngairerua karu mane ni vogasiha. O Savasa ki na mane ni segesegeha igê na hagatamasinga.

¹⁷O Benaia karena o Joiata ki bêngenira na mane ni me ga anumasia o Tavite. O karena o Tavite ka na enoni raha igê na gavumane iana o Tavite.