Read Kahua 1 SIHONGA 19 Bible Online

1 SIHONGA 19 - Kahua bible

1 SIHONGA 19

¹Rârâ ma o Nagasi na maneraha i Amone ki me ma o Ganunu o karena ki urusia ki maneraha.

²Na maneraha o Tavite ki vi: “Inê be katoa na hekomaniha henia o Ganunu, suria o Nagasi o vaemana ki bani kato vikana tangê.” Vikê o Tavite ki kasira na mane tora tamasinga, ka hagarongoa o Ganunu, vi ngaia ki hetaki nogana. Matena na mane tora tamasinga ka ata râ i Amone,

³na enoni raha i pasita na Amonita ka vi tanga na maneraha o Ganunu, ka vi: “Go takusia vari vi o Tavite ki hagatorangenira me na mane ngegana, hanana viga hagarongogo, vi ngaia ki hetaki nogana ma ki hagahigasia o vaemamu? Mareha vê! Ngaia ki kasira me ikê, hanana ma viga arâ bâbâ i hinua, hanana vi henahuraua!”

⁴O Ganunu ki hagatotongora na mane tora tamasinga iana o Tavite, ki gurigi na taboturita, ki rete mukugi na gupini na tuguni iata ma ki kasira vê ka aporo.

⁵Ngaira ka maki ngavê vige aporo. Matena o Tavite ki rongo vikana, ngaia ki kasi tamasinga tangara, ka oga i Jeriko rârâ ma ki gagahi aporo na taboturita, ma hemuri ka kahu aporo me.

⁶Na maneraha o Ganunu ma na Amonita ka kahu tahetara, vi ngaira ka katoa o Tavite ki merongasira. Tahema ngaira ka vatevatera na mane ni me ni Mesopotamia ma i Maka me Soba i Siria henigi na kati ni me iata renigi na 30,000 na kilo na siliva.

⁷Na 32,000 na kati ni me ga taharigi ma na mane ni me iana na maneraha ni Maka ka arâ i Raba ka tênga hagarangia i Meteba. Na Amonita nikâ surigi na hinua hato iata ka haku me ma ka nanê ni hearihatana.

⁸O Tavite ki rongo vikana ma ki hagatorangenia o Joaba henira na mane ni me hato, hanana ga meraheariha.

⁹Na Amonita ka tavo uga hura tenia i Raba na hinua raha iata ma ka ura harahara i maana na maanipara ni hinua. Na maneraha ga râ me ka tamanira, ngaira ka ura harahara nogata igê na bena.

¹⁰O Joaba ki bâsira na mane ni me na merongana ga page taharia, tani i matona ma tani i murina. Vikê ngaia ki atera na mane ni me ramo na Isiraelita ma ki nakara ka ura harahara nogata ka maatira na me ni Siria.

¹¹Ngaia ki naka o Abisai o vesina ki bêngenira na mane ni me getera iana. O Abisai ki nakara ka ura harahara ka maatira nogata na Amonita.

¹²O Joaba ki vi tanga o Abisai, ki vi: “Manga go bâsia, vi na me ni Siria ka ramoramo tehariê inê, hoi, go arâ me ko tamaniê. Ma ki manga inê ma kê bâsira na Amonita ga ramoramo teharigo igo, hoi inê kê page arâ vê kê tamanigo.

¹³Go ramoramo! Siana ko magu! Ge ramo ke meraheariha nga pusira na kariaka ma na hinua iana God iaka. Ge vora me mave na takoha iana na Araha.

¹⁴O Joaba ma na me iana ka guru râ ka sugarira na me ni Siria, ma na me ni Siria ka gava.

¹⁵Matena na Amonita ka bâsira na me ni Siria ga gava, ngaira ka gavatenia o Abisai ma ka banu aporo i hinua. Hemuri o Joaba ki aporo i Jerusaleme.

¹⁶Na me ni Siria ka kahu tahetara, vi ngaira ka so renira na Isiraelita. Tahema ngaira ka hagahakura na mane ni me tenigi na hinua i Siria i na apanena akê na ve i Uparatesi. Ngaira ka kasia o Sopaka ki bêngenira. O Sopaka ki bêngenira na mane ni me iana o Hatatesere na maneraha i Soba.

¹⁷Matena o Tavite ki rongo vikana, ngaia ki hagahakura na mane ni me na Isiraelita, ki tarêhia na ve i Jotano, ma ki katora na me iana ka ura harahara ka maatira na me ni Siria. Na hearihatana ki haganega.

¹⁸Na Isiraelita ka sugarira bê aporo na me ni Siria. O Tavite ma na mane ni me iana ka nahuira ka me na 7,000 na me igê na kati ni me ma na 40,000 na mane ni me na mane ni ano. Ngaira ka nahuia nikâ ki me o Sopaka i bêngenira na me ni Siria.

¹⁹Matena na maneraha ga oga i ruguhana o Hatatesere ka tahetara, vi ngaira ka so renira na Isiraelita, ngaira ka heaganari henia o Tavite viga gâga i ruguhana.

²⁰Vikê na ai ni Siria ka usi vige tamanira nikâ na Amonita.