Read Kahua 1 SIHONGA 20 Bible Online

1 SIHONGA 20 - Kahua bible

1 SIHONGA 20

¹Ga hato noga na hageha gi oru igê na harisi haoru, ma ki haganega na matena na hagahisi. Ngaia ki na matena iata na maneraha ga arâ tare igê tanga na hearihatana. O Joaba ki bêngenira na mane ni me tanga i Amone, hanana ga meraheariha na Amonita. Na maneraha o Tavite ki oga so ma i Jerusaleme. O Joaba ma na me iana ka ura rihia na hinua i Raba, ka taharia ma ka ruhuruhua.

²Igê na bêna na nununa o Moleki na harasita na Amonita ki oga igê na tarepuri na golo. Na higahigana na tarepuri ki na 30 kilo. Igê na tarepuri ki oga igê na hê i raha na mena. O Tavite ki tavoa râ na hê ngekana tenia na tarepuri ma ki naka igê na anina marena. Ngaia ki rurugu nikâ rako na marâ tenia na hinua.

³Ngaia ki henahuraura vê na ai ni hinua ma ki hagatagarahira, ka tagara renigi na marâ ni reteha, na piki ma na akesi. Ngaia ki katora vikana nikâ na enoni surigi na hinua hato getigi i Amone. Hemuri ngaia ma na mane ni me iana ka aporo i Jerusaleme.

⁴Hemuri ngaira ka meraheariha nikâ na Pilisitina i Gesere. Ngaia ki na matena o Sibekai ni Gusa i nahuia ki me o Sipai, na mane i borahu ma ki ramo ngavê. Ngaira na Pilisitina ka so renira na Isiraelita.

⁵Hemuri ngaira ka meraheariha nikâ na Pilisitina ma o Elegana karena o Jaire ki nahuia ki me o Lagimi vesina o Goliate ni Gata. Na ora iana ki raha manga na apeni rimana na mane.

⁶Hemuri ngaira ka heariha nikâ i Gata. I ngekana ki oga igê na mane i borahu ma ki ramo ngavê. Na rimana gi rua karu tonga renigi na kakêna ge ono, ma ki tagenaterua ma nikâ na êgana gi rua. Ngaia ki na raraha iata na mane ga borahu ma ka ramo ngavê, ga oga hagenago tarata i ngekana.

⁷Ngaia ki hagaramo tangara na Isiraelita ma o Jonatana karena o Sima o veogana o Tavite ki nahuia ki me.

⁸O Tavite ma na me iana ka nahuia ka me na mane gi oru ngegana. Ngaira ka na raraha iata na mane ni Gata ga borahu ma ka ramo ngavê.