Read Kahua 1 SIHONGA 22 Bible Online

1 SIHONGA 22 - Kahua bible

1 SIHONGA 22

¹Vikê o Tavite ki vi: “Ikê nga ka na agua tanga na ruma ni rotu iana na Araha God. Ikê nga ka na bea ni vogasiha tangara na Isiraelita ga susu igê.”

²Na maneraha o Tavite ki bonasira na ai ni mahuara hato ga oga i Isiraele ka haku me. Ngaia ki hagatagarahira. Tani ka retegi na hê tanga ga tagarahia re na ruma ni rotu.

³Ngaia ki nakagi rako era na aiani tanga ga tagarahigi re na nila ma na marâ ga taugi haku na apinige na maani ruma, ma ki nakagi rako ngavê nikâ na kapa higa, i asa vige hagararingenigi na higahihani.

⁴Na apinige na bagora ka rako teha ngavê nikâ, suria na ai ni Taire me Sitone ka toregi me.

⁵O Tavite ki tako, ki vi: “Na ruma ni rotu o kareku o Salomo ki page torea ki araria ge bâkoro ngavê ma ke rongo raha i maveta. Ma o Salomo ki kere mane mênga ma ki pe takotako bâkoro mênga. Vikê ki tâ i apeku inê, vigê hagarê tanga na tagarahiana na ruma ni rotu.” Vikana o Tavite ki nanê renigi na ara ni marâ tanga na tagarahiana na ruma ni rotu, ma hemuri ki kahu me.

⁶Ngaia ki unia me o Salomo o karena ma ki bonasia, hanana vi tagarahia na ruma ni rotu tanga na Araha God iata na Isiraelita.

⁷O Tavite ki vi tanga, ki vi: “O kareku, inê kê obania vi ve torea na ruma ni rotu, hanana ve hagarahasia igê na Araha God iaku.

⁸Ma na Araha ki tamasi tangê, ki vi, ‘Suria igo ko mutera rako na enoni ma ko katogi rako na hearihatani, ma suria inê kê bâsigi i tata berabera na gaputa na enoni, tahema inê kê pe obanigo vigu torea na ruma ni rotu tangê.

⁹Henaka, ma inê kê vi, vi igo ko page apara na kare mane. Ngaia ki page maneraha igê na matena na agua ki gâga igê na marapeha, suria inê kê page katora na merongana hato ka naka vê ki gâga suri parongana. Ngaia na atana ka no Salomo, i vi Marapeha, suria na matena i maneraha igê, inê kê page katoa i Isiraele ki gâga igê na marapeha ma ki asitatara.

¹⁰Ngaia nga kani page torea na ruma ni rotu tangê. Ngaia ki page manga o kareku ma inê be manga o vaemana. Na apaparaha iana ka page heheuri ka marungia i Isiraele tare ki bê ki arâ.

¹¹“Hoita o kareku, na Araha God iamu ke ngahisigo ma ke hagamonaria na suruha iana, hanana ge katogo, ku tagara hagahatungia maninga na tagarahiana na ruma ni rotu tanga.

¹²Na Araha God iamu ke haganahunigo renigi na takoha mataha ma na giraraha mora, hanana go marungia i Isiraele suria na buka ni ramata iana.

¹³Manga go marupegi na ramata hato, na Araha i bani vatea renigi o Moise tangara na Isiraelita, igo ko page tavoraha bâkoro. Go togeaga nga ma ko ramoramo. Siana ko magu. Siana ko naka ta na marâ ki hagamagusigo.

¹⁴“Tanga na ruma ni rotu, renigi na tagaraha raha iaku inê kê bani rurugi haku na 3,000,000 kilo na golo ma na 30,000,000 kilo na siliva tanga na ruma ni rotu henigi rako teha ngavê na kapa higa ma na aiani ma na bagorani na apinige ma na hê. Henaka, ma igo ko rurugi haku nga nikâ tani.

¹⁵Igo ko nahunira rako na mane tagara. Tani ka paparigi na hê. Tani ka pangapanga. Tani ka manisingenia na tagaraha ni apinige ma tani ka manisingenigi na tagaraha

¹⁶ni golo, ni siliva, ni kapa higa ma ni aiani. Ngaira ka rako teha ngavê. Hoi, gu haganega ku tagara ma na Araha ke ngahisigo.”

¹⁷O Tavite ki bonasira na enoni raha hato i Isiraele ka tamania o Salomo.

¹⁸Ngaia ki vi: “Na Araha God iami ki bani ngahisigamu ma ki bani katogamu kamu asitatara tenira na merongami. Ngaia ki katoê kê teharira na enoni hato ga bani oga hagenago taraka igê na agua ikê. Na agua ngekê kani iata God ma na kariana.

¹⁹Hoi, mu tagara tanga na Araha i mêrihami hagenani. Mu haganega nga kamu tagarahia na ruma ni rotu, hanana mu nakagi na bokesi na suruheri iana na Araha ma na marâ hato apuna getigi tanga na hagarahenga tanga na Araha igê.”