Read Kahua 1 SIHONGA 23 Bible Online

1 SIHONGA 23 - Kahua bible

1 SIHONGA 23

¹Matena o Tavite ki gemêa ngavê, ngaia ki kasia o Salomo o karena ki maneraha urusia i Isiraele.

²Na maneraha o Tavite ki hagahakura me na meraha hato iata na Isiraelita ma ngaira hato na mane ni vogasiha ma na mane ni hagarahenga na raraha iana o Levi,

³ga tonga na harisi 30 ma ki akê na harisi iata. Ngaira hato haku ka vora na 38,000.

⁴Tenira ngaira na maneraha ki atera na 24,000 tanga ga bâsuria na ruma ni rotu; na 6,000 na mane tanga na segesegeha ma ni hagatamasinga;

⁵na 4,000 ga mane ni anumasiana na ruma ni rotu ma na 4,000 tangagi na tarotaroha, na tagitaginiha, na uhinga, hanana ga hagarahasia na Araha renigi na marâ ngegana, na maneraha i nakagi tangagi vikana.

⁶O Tavite ki voasira na raraha iana o Levi ka vora na apaneni me gi oru surigi na hagosi ninuni iata hehegitigi o Geresone, o Kehata ma o Merari.

⁷O Geresone ki apararerua o karena gi rua: o Latane mo Simi.

⁸O Latane ki aparara o karena gi oru: o Jegiele, o Setama ma o Joele. Ngaira ka na bêni na hagosi ninuni na raraha iana o Latane.

⁹O Simi hagenago ki aparara o karena gi oru: o Selomiti, o Gasiele ma o Harane.

¹⁰Na ruata o Simi ki aparara o karena ge he: o Jagata na bêbê ni kare ma ka kahu râ me o Sisa, o Jeusi ma o Beria. Na raraha iaterua hegitigi o Jeusi ma o Beria ka pe rako. Tahema na hagosi ninuni iaterua hegitigi ka hakurerua karu vora na hagosi ninuni gi tage ma.

¹²O Kehata ki aparara o karena ge he: o Amarama, o Jisare, o Geberone ma o Usiele.

¹³O Amarama ka no vaematerua o Arone ma o Moise. Ga hagapunarira o Arone ma na raraha iana ka heheuri hagahu ka taugi na marâ apuna ni hagarahenga i rarona na kiboru apuna, ka sungigi na marâ ni sungiha i sigini koro tanga na Araha, ka tagara tanga ma ka nungia ki korokoro tangara na enoni.

¹⁴O karena o Moise na kariana koro God ga hagatonganira na raraha iana o Levi.

¹⁵O Moise ki apararerua o karena gi rua: o Geresome ma o Eliesere.

¹⁶I berarogata o karena o Geresome o Sebuele kani raha tangara.

¹⁷O Eliesere ki apara o karena gi tage ma: o Regabia. Na raraha iana o Regabia ka rako era.

¹⁸O Jisare na ruata o karena o Kehata ki apara o Selomiti na bêna hagosi ninuni iana.

¹⁹O Geberone na oruta o karena o Kehata ki aparara o karena ge he: o Jeria na bêbê ni kare ma ka kahu râ me o Amaria, o Jagasiele ma o Jekamama.

²⁰O Usiele na heta o karena o Kehata ki apararerua o karena gi rua: o Mika na bêbê ni kare ma o Jisia.

²¹O Merari ki apararerua o karena gi rua: o Magali ma o Musi. O Magali ki apararerua noga o karena gi rua: o Elasare ma o Kisi.

²²O Elasare ki pe apara kare mane rârâ, nga noga ma na kare hehene, ma ki me. Ka karena ka êragira o goata mêri o karena o Kisi.

²³O Musi na ruata o karena o Merari ki aparara o karena gi oru: o Magali, o Etere ma o Jeremote.

²⁴Ngaira nga ka na raraha iana o Levi surigi na hagosi ninuni ma na ahemata iata hehegitigi. Ga segegi so na atani hehegitigi na ara ni hitangita. Na ara ni hitangita na raraha iana o Levi i tonga na 20 na harisi ma ki akê, ki nahunia na tagaraha tanga na ruma ni rotu iana na Araha.

²⁵O Tavite ki vi: “Na Araha God iata na Isiraelita ki bani haganahunira na kariana renia na marapeha ma ngaia marena ki page gâga hagahu i Jerusaleme.

²⁶Vikana na raraha iana o Levi ki hato vige kahu tugia rârâ nikâ na ruma na gahu apuna iana na Araha ma na marâ hato tanga na hagarahenga.”

²⁷Suria o Tavite ki haribona hagenago ma ki me, tahema ngaira ka segegi so na atata na raraha hato iana o Levi, matena ga tonga na 20 na harisi iata,

²⁸ma ka atera tangagi na tagaraha igê: tanga ga tamanira na mane ni vogasiha na raraha iana o Aroni igê na hagarahenga i ruma ni rotu; tanga ga maningaigi na marâ apuna hato tanga na hagarahenga;

²⁹tanga ga bâsurigi na bereti ni vogasiha tanga God, na palaua tanga na vogasiha, na bereti manihinihi ga pe ahunga, na marâ ni hagababaniha henia na makona na palaua tanga ma na palaua hetorariga henia na oile ni olive; tanga ga hagararingenigi na higahigani na marâ tanga na vogasiha ma ka hagevovogi;

³⁰tanga ga hagarahasia ma ka visia raha na Araha igê na ara ni mavoraro ma igê na ara ni manurahi

³¹ma igê na ara ni mateni ga susu tanga na Araha igê na tangiani ni mamaroha, igê na tangiani na hageha haoru ma igê na tangiani raha getigi. Ngaira ka segegi so vi ti ma gi hita na raraha iana o Levi kani tanga ga heheuri ka katogi na tagaraha ngegana igê na mateni tange. Na hagarahenga tanga na Araha ka na tagaraha hagahu iata na raraha iana o Levi.

³²Na tagaraha iata kani igê: ga katogi na tagaraha i ruma na gahu apuna iana na Araha ma i ruma ni rotu ma ka tamanira na goata na mane ni vogasiha na raraha iana o Aroni igê na hagarahenga i ruma ni rotu.